எல்.ஐ.சி.க்கு பங்குகள் விற்று ரூ. 400 கோடி திரட்ட இந்தியன் ஓவர்சீஸ் வங்கி திட்டம்

இந்திய ஆயுள் காப்பீட்டு நிறுவனத்துக்கு (எல்.ஐ.சி.) பங்குகளை விற்பதன் மூலமாக ரூ. 400 கோடி திரட்ட இந்தியன் ஓவர்சீஸ் வங்கி (ஐ.ஓ.பி.) திட்டமிட்டுள்ளதாக அதன் தலைவரும் நிர்வாக இயக்குநருமான எம்.நரேந்திரா தெரிவித்திருக்கிறார்.

இந்தியன் ஓவர்சீஸ் வங்கியின் 78-வது நிறுவன தினத்தையொட்டி புது தில்லியில் திங்கள்கிழமை நடைபெற்ற நிகழ்ச்சியில் கலந்துகொண்ட பின்பு செய்தியாளர்களிடம் அவர் கூறியது: மத்திய அரசு இந்த நிதி ஆண்டு, ஐ.ஓ.பி.யில் கூடுதல் மூலதனமாக ரூ. 1,200 கோடி செலுத்தியிருக்கிறது. இதையடுத்து, வங்கியில் மத்திய அரசின் பங்கு 79.01 சதவீதமாக அதிகரித்திருக்கிறது. கூடுதல் மூலதனம் செலுத்துவதற்கு முன்பு மத்திய அரசின் பங்கு 73.80 சதவீதமாக இருந்தது.

இதைத் தவிர 8.15 கோடி பங்குகளை இந்திய ஆயுள் காப்பீட்டு நிறுவனத்துக்கு (எல்.ஐ.சி.) அளிப்பதன் மூலம் ரூ. 400 கோடி திரட்ட ஐ.ஓ.பி. திட்டமிட்டிருக்கிறது. எல்.ஐ.சி.க்கு அல்லது அந்நிறுவனத்தின் பல்வேறு நிதித் திட்டங்களுக்கு முன்னுரிமை முறையில் பங்குகள் அளிக்க ஆலோசனை நடைபெற்றுவருகிறது. பங்கு விலை ரூ. 48.84 என்ற மதிப்பில் இருக்கக் கூடும். பங்கு விற்பனை தொடர்பாக, வங்கியின் நிர்வாக குழுவின் ஒப்புதல் பெற இம்மாதம் 26-ஆம் தேதி சிறப்புக் கூட்டம் நடைபெற உள்ளது என்று எம். நரேந்திரா கூறினார்.

வங்கியின் நிறுவன தினத்தையொட்டி நடைபெற்ற நிகழ்ச்சியில் கலந்துகொண்டு, மத்திய அமைச்சர் ப. சிதம்பரம் 111 புதிய கிளைகளைத் திறந்துவைத்தார். இத்துடன் வங்கியின் கிளைகள் எண்ணிக்கை 3,250 ஆகியுள்ளது. மேலும் 78 ஏடிஎம்களையும் சிதம்பரம் திறந்துவைத்துள்ளார். ஐ.ஓ.பி.க்கு வெளிநாடுகளில் 10 கிளைகளும் மூன்று பிரதிநிதி அலுவலகங்களும் உள்ளன.