கடன்பத்திரங்கள் மூலம் ரூ. 1,500 கோடி திரட்ட கனரா வங்கி திட்டம்

பொதுத் துறை வங்கியான கனரா வங்கி அதன் மூலதனத்தை அதிகரிக்கும் வகையில், கடன்பத்திரங்களை வெளியிட்டு ரூ.1,500 கோடி திரட்டத் திட்டமிட்டுள்ளது. இத் தகவலை இவ் வங்கியின் உயரதிகாரிகள் வெள்ளிக்கிழமை தெரிவித்துள்ளனர்.

பேசல்-ஐஐஐ கடன்பத்திரங்களை வெளியிட்டு, ரூ.1,500 கோடி திரட்டத் திட்டமிட்டுள்ளதாக இவ் வங்கி மும்பை பங்குச் சந்தைக்கு எழுதியுள்ள கடிதத்தில் தெரிவித்துள்ளது.

இது தவிர, இவ் வங்கியில் வரும் மார்ச் மாதத்துக்குள் ரூ.500 கோடி முதலீடு செய்ய மத்திய அரசு திட்டமிட்டுள்ளது. இதற்காக முன்னுரிமைப் பங்குகளை அரசுக்கு அளிப்பது தொடர்பாக முடிவுசெய்ய பங்கு முதலீட்டாளர்களின் சிறப்பு பொதுக்குழுக் கூட்டத்தை இவ் வங்கி வரும் 30 தேதி கூட்டியுள்ளது.

பொருள்களைத் தயாரிக்கும் நிறுவனங்களுக்குத் தேவையான கடனுதவியை அளிக்கவும், பொதுத் துறை வங்கிகளின் ரொக்க இருப்பு விகிதத்தை நிலைப்படுத்தவும் இவ் வங்கியில் மத்திய அரசு முதலீடு செய்யவுள்ளது.

கடந்த நிதியாண்டில் பொதுத் துறை வங்கிகளில் மத்திய அரசு ரூ.12,517 கோடியை முதலீடு செய்துள்ளது. நடப்பு நிதியாண்டில் இது ரூ.14,000 கோடியாக அதிகரிக்கும் என எதிர்பார்க்கப்படுகிறது.