இன்போசிஸ் நிகர லாபம் 13.4% உயர்வு: ஊழியர்களை தக்க வைக்க பங்குகள் வழங்க திட்டம்- இன்போசிஸ் பங்கு 9 சதவீதம் சரிவு

இன்போசிஸ் நிறுவனத்தின் ஜூன் காலாண்டு நிகர லாபம் 13.4 சதவீதம் உயர்ந்து ரூ.3,436 கோடியாக இருக்கிறது. கடந்த வருடம் இதே காலாண்டில் ரூ.3,028 கோடியாக இருந்தது. ஆனால் முந்தைய மார்ச் காலாண்டுடன் ஒப்பிடும் போது நிகர லாபம் 4.47 சதவீதம் சரிந்திருக்கிறது. மார்ச் காலாண்டு நிகர லாபம் ரூ.3,597 கோடி. ஜூன் காலாண்டில் மொத்த வருமானம் 17 சதவீதம் உயர்ந்து ரூ.16,782 கோடியாக இருக்கிறது.

ஆச்சரியம் அளிக்கும் வகையில் நடப்பு நிதி ஆண்டில் நிறுவனத்தின் வளர்ச்சி எதிர்பார்ப்பு 10.5 சதவீதம் முதல் 12 சதவீதம் வரை இருக்கும் என்று நிறுவனம் கணித்திருக்கிறது. ஐடி துறையின் வளர்ச்சியையும் நாஸ்காம் இதே விகிதத்தில் கணித்திருக்கிறது. ஆனால் முன்னதாக 11.5 சதவீதம் முதல் 13.5 சதவீத வளர்ச்சி இருக்கும் என்று நிறுவனம் கூறியிருந்தது.

வளர்ச்சி குறையும் என்று கணித்திருந்தாலும் 2020-ம் ஆண்டுக்கு நிர்ணயம் செய்த இலக்கில் மாற்றம் இல்லை என்று நிறுவனத்தின் தலைமைச் செயல் அதிகாரி விஷால் சிக்கா தெரிவித்திருக்கிறார். 2020-ம் ஆண்டில் 2,000 கோடி டாலர் வருமானத்தை எட்டுவது லட்சியமாகும். ஓரிரு காலாண்டில் உருவாகும் தேக்கநிலையால் அந்த இலக்கை அடைவதில் எந்த பாதிப்பும் இருக்காது. நாங்கள் சரியான பாதையில் செல்கிறோம்.

ஐரோப்பிய யூனியனில் இருந்து பிரிட்டன் வெளியேறியது குறுகிய காலத்துக்கு ஏற்ற இறக்க சூழல் இருந்தாலும் நீண்ட கால அடிப்படையில் புதிய வாய்ப்புகள் உருவாகி உள்ளது. இதுவரை எங்க ளுக்கு எந்த பாதிப்பும் ஏற்பட வில்லை. என்ன பாதிப்பு ஏற்படும் என்பது இப்போதே கூறுவது கடினம் என்று சிக்கா கூறினார்.

பங்கு சரிவு

வளர்ச்சி குறையும் என்ற கணிப்பு காரணமாக இன்போசிஸ் பங்கு 9 சதவீதம் வரை சரிந்தது. வர்த்தகத்தின் இடையே 10 சதவீதம் வரை சரிந்தாலும் வர்த்தகத்தின் முடிவில் 8.81 சதவீதம் சரிந்து ரூ.1,072-ல் முடிவடைந்தது. இதன் காரணமாக இந்த நிறுவனத்தின் சந்தை மதிப்பு ரூ.23,459 கோடி அளவுக்கு சரிந்தது. இதர ஐடி பங்குகளான டிசிஎஸ், விப்ரோ, ஹெக்ஸாவேர் உள்ளிட்ட பங்குகளும் சரிந்தன.

ஊழியர்களுக்கு பங்குகள்

நிறுவனத்தில் இருந்து ஊழியர்கள் வெளியேறுவதைத் தடுக்க அவர்களுக்கு பங்குகள் (இஎஸ்ஓபி) வழங்க நிறுவனம் திட்டமிட்டிருக்கிறது. ஏற்கெனவே இருந்த திட்டத்தை மீண்டும் நிறுவனம் அறிமுகம் செய்திருக்கிறது. கடந்த ஜூன் காலாண்டில் பணியாளர்கள் வெளியேறும் விகிதம் 21 சதவீதமாக இருந்தது. கடந்த மார்ச் காலாண்டில் 17.3 சதவீதமாகவும், கடந்த வருடம் இதே காலாண்டில் 19.2 சதவீதமாகவும் இருந்தது.

13 வருடங்களுக்கு பிறகு மீண்டும் இந்த திட்டத்தை அறிமுகப்படுத்துகிறோம். ஜூனியர் நிலை அதிகாரிகளில் இருந்து மத்திய நிலை அதிகாரிகள் 7,500 பேருக்கு இந்தத் திட்டத்தை அமல்படுத்த இருக்கிறோம். உயர்நிலை அதிகாரிகளுக்கும் விரைவில் விரிவுபடுத்த இருப்பதாக நிறுவனத்தின் தலைமைச் செயல்பாட்டு அதிகாரி யூபி பிரவீண் ராவ் தெரிவித்தார். ஜூன் இறுதியில் 1,97,050 பணியாளர்கள் உள்ளனர்.