உங்கள் போர்ட்ஃபோலியோவில் அவசியம் இருக்க வேண்டிய 12 ஃபண்டுகள்!

உங்கள் போர்ட்ஃபோலியோவில் அவசியம் இருக்க வேண்டிய 12 ஃபண்டுகள்!
சொக்கலிங்கம் பழனியப்பன் டைரக்டர், ப்ரகலா வெல்த் மேனேஜ்மென்ட் பி.லிட்.



நம்மில் பல முதலீட்டாளர்கள் இப்போது மியூச்சுவல் ஃபண்டில் முதலீடு செய்கிறார்கள். மாதம்தோறும் எஸ்.ஐ.பி மூலம் நம்மவர்கள் முதலீடு செய்யும் தொகை ரூ.3,000 கோடிக்கும் மேல். இந்தத் தொகை குறுகிய காலத்தில் கொஞ்சம் குறைந்தாலும், எதிர்காலத்தில் வளர்ந்துகொண்டே செல்லவே நிறைய வாய்ப்பு இருக்கிறது. ஏனென்றால் வங்கிகளில் எஃப்.டி-யின் வட்டி விகிதம் வெகுவாகக் குறைந்துவிட்டது. ரூ.500 மற்றும் ரூ.1,000 செல்லாது என்ற அரசாங்கத்தின் அறிவிப்பினால், ரியல் எஸ்டேட்டிலும் விலை சரிவு ஏற்படும் அபாயம் உருவாகி இருக்கிறது. ஆகவே, இனிவரும் காலத்தில் முதலீடுகள்  அதிகமாக மியூச்சுவல் ஃபண்டுகளுக்குத்தான் வரும்.

பங்குச் சந்தையிலும் இறக்கம் என்றாலும், பங்குச் சந்தைக்கு ஏறுவதும் இறங்குவது சகஜம். மேலும், மியூச்சுவல் ஃபண்டுகளில், சந்தை இறக்கத்தில் இருந்தாலும், வேண்டுமளவுக்கு பணத்தை தேவைப்பட்டபோது எடுத்துக் கொள்ளலாம்.

இன்றைய நிலையில், வெவ்வேறு விதமான முதலீட்டாளர்களுக்கு உன்னதமான 12 ஃபண்டுகளை       (7 வகையான ரிஸ்க் லெவலில்) தேர்வு செய்து தந்துள்ளோம்.  ரிஸ்க் லெவல் 1-ல் உங்களது முதலீடு மிக பாதுகாப்பானதாக இருக்கும். அதே சமயம், வருமானம் 1 வருட ஃபிக்ஸட் டெபாசிட் வருமானத்தை ஒட்டித்தான் இருக்கும். ரிஸ்க் லெவல் 7-லில், ரிஸ்க் மற்றும் ரிவார்ட் ஆகிய இரண்டுமே அதிகமாக இருக்கும்.

ரிஸ்க் லெவல் 1 – 3-ல் இருக்கும் ஃபண்டுகளில், மொத்த முதலீடுகளை எப்போது வேண்டுமானாலும் தாராளமாக மேற்கொள்ளலாம். ரிஸ்க் லெவல் 4 – 7-ல் இருக்கும் ஃபண்டுகளில் மொத்த முதலீடுகளை எஸ்.டி.பி (சிஸ்டமேட்டிக் டிரான்ஸ்ஃபர் பிளான்) மூலமாக மேற்கொள்ளலாம். அனைத்து ஃபண்டுகளிலும்   எஸ்.ஐ.பி-யை ஆரம்பிப்பதற்கு எந்தத் தருணமும் நல்ல தருணமே!

இந்த 7 ரிஸ்க் லெவலில் இருக்கும் ஃபண்டுகளில் சில சிறந்த ஃபண்டுகளை இங்கே தேர்வு செய்து, அவற்றைப் பற்றிய குறிப்புகளையும் தந்துள்ளோம்.

ரிஸ்க் லெவல் - 1



டி.ஹெச்.எஃப்.எல் பிரமெரிக்கா அல்ட்ரா ஷார்ட் டேர்ம் ஃபண்ட்:

இந்த ஃபண்டில் நுழைவு/ வெளியேற்றுக் கட்டணம் ஏதும் கிடை யாது. ஒரு வருட எஃப்டி  வட்டியை ஒட்டி இந்த ஃபண்டின் வருமானம் இருக்கும். இந்த ஃபண்ட் தனது 80 சதவிகித முதலீட்டை AAA மற்றும் A1+ ரேட்டிங் கொண்ட முதலீடுகளில் வைத்துள்ளது. குறைந்தபட்சம் மூன்று மாதங்களுக்கு தேவை இல்லாத பணத்தை இதில் முதலீடு செய்யலாம்.



ரிலையன்ஸ் மணி மேனேஜர்:

இந்த ஃபண்ட் ரூ.16,000 கோடிக்கும் மேலான சொத்துக்களை நிர்வகித்து வருகிறது. இந்த ஃபண்டிலும் நுழைவு மற்றும் வெளியேற்றுக் கட்டணம் ஏதும் கிடையாது. இந்த ஃபண்டிலிருந்து ரூ.2 லட்சம்  வரைக்கும் 30 நிமிடங்களில் திரும்பப் பெற லாம். ஏடிஎம் கார்டையும், இந்த ஃபண்டில் முதலீடு செய்பவர்கள் பெற்றுக் கொள்ளலாம். தனது போர்ட்ஃபோலியோவில் 75 சதவிகிதத்துக்கும் அதிகமாக AAA மற்றும் A1+ ரேட்டிங் கொண்ட முதலீடுகளை வைத்துள்ளது.

இந்த இரு ஃபண்டுகளில் முதலீட்டாளர்கள் தங்களின் எமர்ஜென்ஸி ஃபண்டுகளை வைத்துக் கொள்ளலாம். எஸ்.ஐ.பி முறையிலும் முதலீடு செய்துகொள்ளலாம். ரெக்கரிங் டெபாசிட்டுக்குப் பதிலாகவும் இந்த ஃபண்டுகளில் முதலீடு செய்து கொள்ளலாம்.

இந்த ஃபண்டுகளில் இருந்து  3 வருடத்துக்குள் வெளியேறினால், உங்கள் வரி வரம்புக்கு உட்பட்டு வரி கட்ட வேண்டியிருக்கும். அதற்கு மேல் வெளியேறினால், பணவீக்கத்துக்கு  அட்ஜஸ்ட் செய்தபிறகு வரும் வருமானத்துக்கு 20% வரி கட்ட வேண்டும். முழுக்க கடன் பத்திரங்களில் முதலீடு செய்யப்படுவதால், பங்குச் சந்தைக்கும் இதற்கும் நேரடித் தொடர்பு இல்லை.


ரிஸ்க் லெவல் - 2


கோட்டக் இன்கம் ஆப்பர்சூனிட்டீஸ் ஃபண்ட்:

இது ஒரு அக்ரூவல் (accrual) ஃபண்ட் ஆகும். முழுக்க முழுக்க கார்ப்பரேட் பாண்டுகளில் முதலீடு செய்துள்ளது. நான்கில் மூன்று பகுதி, AAA மற்றும் AA ரேட்டிங் கொண்ட பேப்பர்களில் முதலீடு செய்யப்பட்டுள்ளது. தற்போதைய யீல்ட் டு மெச்சூரிட்டி 8.79% ஆகும். ஒரு வருட லாக்-இன் இந்த ஃபண்டில் உள்ளது.



யூடிஐ இன்கம் ஆப்பர்ச்சூனிட்டீஸ் ஃபண்ட்:

இதுவும் ஒரு அக்ரூவல் ஃபண்டாகும். சுமார் 70 சதவிகித AAA மற்றும் AA ரேட்டிங் கொண்ட பேப்பர்களில் முதலீடு செய்யப்பட்டுள்ளது. சிறிய அளவு மத்திய அரசாங்க பாண்டுகளும் இந்த ஃபண்டில் உள்ளது. இந்த இரண்டு ஃபண்டு களிலும் மூன்று வருட எஃப்டிக்குப் பதிலாக முதலீடு செய்யலாம்.

இந்த ஃபண்டுகளில் இருந்து மூன்று வருடத்துக்குள் வெளியேறினால், உங்கள் வரி வருமானத்துக்கு உட்பட்டு வரி கட்ட வேண்டி இருக்கும். அதற்கு மேல் வெளியேறினால், பணவீக்கத்துக்கு  அட்ஜஸ்ட் செய்தபிறகு வரும் வருமானத்துக்கு 20% வரி கட்ட வேண்டும். கடன் பத்திரங்களில் முதலீடு செய்யப்படுவதால், பங்குச் சந்தைக்கும் இதற்கும் நேரடி தொடர்பு இல்லை.

ரிஸ்க் லெவல் - 3

ஐசிஐசிஐ புரூ ஈக்விட்டி இன்கம் ஃபண்ட்:

இந்த ஃபண்ட், தனது போர்ட்ஃபோலியோவில் ஒரு பகுதியைப் பங்குகளிலும், இன்னொரு பகுதியை ஆர்பிட்ரேஜ் வாய்ப்புகளிலும், எஞ்சியதைக் கடன் சார்ந்த முதலீடுகளிலும் முதலீடு செய்கிறது.
இந்த விதமான ஃபண்டுகளை மூன்றரை ஆண்டுகள் வைத்திருந்தால்,  எஃப்டியை விட சற்று கூடுதலான வருமானம் கிடைக்கும்.  இதில் கிடைக்கும் டிவிடெண்டுக்கு வரி இல்லை. ஓராண்டுக்கு மேல் வைத்திருந்தால், லாபத்துக்கு வரி கிடையாது.  

ரிஸ்க் லெவல் - 4

ஹெச்.டி.எஃப்.சி பேலன்ஸ்ட் ஃபண்ட்:

இந்த ஃபண்ட் ஏறத்தாழ 70 சதவிகிதத்தை பங்கு சார்ந்த முதலீடுகளிலும், எஞ்சியதைக் கடன் சார்ந்த முதலீடுகளிலும் முதலீடு செய்துள்ளது. நல்ல டிராக் ரெக்கார்டு இது ஒரு அக்ரெஸிவ் பேலன்ஸ்டு ஃபண்ட் ஆகும்.

பிர்லா சன்லைஃப் பேலன்ஸ்ட் 95 ஃபண்ட்:

நீண்ட கால செயல்பாடும் நல்ல டிராக் ரெக்கார்டும் உள்ள பேலன்ஸ்டு ஃபண்டுகளில் இதுவும் ஒன்று. இந்த ஃபண்டும் 70 சதவிகிதத்தை பங்கு சார்ந்த முதலீடுகளிலும், எஞ்சியதைக் கடன் சார்ந்த முதலீடுகளிலும் வைத்துள்ளது.

இந்த இரண்டு ஃபண்டுகளும் வருமான வரிக்கு ஈக்விட்டி ஃபண்டுகளாக எடுத்துக் கொள்ளப்படும். ஆகவே, ஒரு வருடத்துக்கு மேல் வைத்திருக்கையில் வரும் வருமானத்துக்கு வரி இல்லை. குழந்தைகளின் கல்விச் செலவுக்காக முதலீடு செய்வதற்கு இந்த வகை ஃபண்டுகள் ஒரு நல்ல ஆப்ஷன்.



ரிஸ்க் லெவல் - 5

ஐசிஐசிஐ புரூ ஃபோக்கஸ்டு புளூசிப் ஈக்விட்டி:

சந்தையில் ப்யூர் லார்ஜ்கேப் ஃபண்டுகள் மிகவும் குறைவு. அவற்றில் இந்த ஃபண்டும், அடுத்து வரும் ஃப்ராங்க்ளின் புளூசிப் ஃபண்டும் அடங்கும்.

இந்த ஃபண்ட் தனது போர்ட்ஃபோலியோவில் 95 சதவிகிதத்தை லார்ஜ் கேப் பங்குகளில் முதலீடு செய்துள்ளது. இந்த ஃபண்டின் ஆல்ஃபா 5.37 என்ற அளவிலும் பீட்டா ஒன்றாகவும் உள்ளது.

ஃப்ராங்க்ளின் இந்தியா புளூசிப் ஃபண்ட்:

இந்த ஃபண்டும் ஒரு ப்யூர் லார்ஜ்கேப் ஃபண்ட் ஆகும். இதன் போர்ட்ஃபோலியோவில் 96 சதவிகிதத்தை லார்ஜ் கேப் பங்குகளில் முதலீடு செய்யப்பட்டுள்ளது. இந்த ஃபண்ட் 20 ஆண்டு களுக்கும் மேலாக  செயல்பட்டு வருகிறது. இதன் ஆல்ஃபா 5.25-ஆகவும், பீட்டா 0.96.

இந்த இரண்டு ஃபண்டுகளும் கன்ஸர்வேட்டிவ் ஈக்விட்டி முதலீட்டாளர்களுக்கு சிறந்த ஃபண்டு களாகும். இந்த ஃபண்டுகளில் ஒரு வருடத்துக்குள்  வெளியேறினால், 1% வெளியேற்றுக் கட்டணம் உள்ளது. ஒரு வருடத்துக்கு மேல் வைத்திருக்கையில், வருமானம் வரி கட்ட வேண்டியதில்லை.

ரிஸ்க் லெவல் 6

மோத்திலால் ஓஸ்வால் மோஸ்ட் ஃபோக்கஸ்டு மல்ட்டிகேப் 35:

சமீபத்தில் ஆரம்பித்து சிறப்பாகச் செயல்பட்டு வரும் ஃபண்டுகளில் இதுவும் ஒன்று. இதன் போர்ட்ஃபோலியோவில் 67% லார்ஜ்கேப் பங்கு களும், 33% மிட்கேப் பங்குகளும் உள்ளது. இதில் வெளியேற்றுக் கட்டணம் இல்லை.  

எல் அண்ட் டி வேல்யூ ஃபண்ட் :

இந்த ஃபண்ட் தனது போர்ட்ஃபோலியோவில் 50 சதவிகிதத்தை லார்ஜ்கேப் பங்குகளிலும், மீதியை மிட் அண்ட் ஸ்மால்கேப் பங்குகளிலும் முதலீடு செய்துள்ளது. இந்த ஃபண்டில் எந்தப் பங்கும் 4 சதவிகிதத்துக்கு அதிகமாக இல்லை. இது வேல்யூ வியூகத்தைக் கடைப்பிடிக்கும் ஃபண்டாகும்.

இந்த ஃபண்டில் ஒரு ஆண்டுக்குள் வெளியேறினால் 1% வெளியேற்றுக் கட்டணம். இந்த ஃபண்டுகளை ஒரு வருடத்துக்கு மேல் வைத்திருந்தால், வருமான வரி கிடையாது.



ரிஸ்க் லெவல் 7

மிரே அஸெட் எமெர்ஜிங் புளூசிப் ஃபண்ட் :

இது ஒரு மிட்கேப் ஃபண்ட் ஆகும். தனது போர்ட்ஃபோலியோவில் 66 சதவிகிதத்தை மிட் அண்ட் ஸ்மால்கேப் பங்குகளிலும், எஞ்சியதை லார்ஜ்கேப் பங்குகளிலும் வைத்துள்ளது. 68 பங்குகளை தனது போர்ட்ஃபோலியோவில் வைத்துள்ளது. இந்த ஃபண்டின் ஆல்ஃபா 25.86 ஆகவும், பீட்டா 0.90 என்ற அளவிலும் உள்ளது.

இதில் எஸ்ஐபி அல்லது எஸ்டிபி மூலம்தான் முதலீடு செய்ய முடியும். அதற்கும் அதிகபட்சம் ரூ.25,000 என வரையறை செய்து உள்ளது. 182 நாட்கள் மற்றும் 365 நாட்களுக்குள் வெளியேறினால் முறையே 2% மற்றும் 1% வெளியேற்றுக் கட்டணமாக வசூலிக்கப்படுகிறது.