குறையும் குரூப் இன்ஷூரன்ஸ் கவரேஜ்: எப்படி சமாளிக்கலாம் ?

இன்ஷூரன்ஸ் நிறுவனங்களைக் கட்டுப்படுத்தும் அமைப்பான ஐஆர்டிஏ, குரூப் ஹெல்த் இன்ஷூரன்ஸ் பாலிசிகளுக்கான பிரீமியமானது, க்ளைம் விகிதத்தின் அடிப்படையில் இருக்க வேண்டும் எனத் தெரிவித்துள்ளது. பிரீமியத்தில் தள்ளுபடி வழங்குவதை நெறிமுறைப்படுத்த வேண்டும் என்று சொன்னதுடன், மருத்துவப் பணவீக்க விகிதம் நாளுக்குநாள் அதிகரித்து வருவதால், அதையும் கணக்கில் எடுத்துக் கொண்டு பிரீமியத்தை நிர்ணயிக்க வேண்டும் என்று தெரிவித்துள்ளது.

ஐஆர்டிஏ சொல்லியிருக்கிற இந்த நெறிமுறைகள் அமல்படுத்தப்பட்டால், ஹெல்த் இன்ஷூரன்ஸ் பாலிசிகளுக்கான பிரீமியம் வசூலிப்பதற்கு ஒரு பெஞ்ச்மார்க் உருவாக்கப்படும். இந்த பெஞ்ச்மார்க்குக்கு குறைவாக பிரீமியம் வசூலிக்க முடியாத நிலை உருவாகும். இதனால், ஹெல்த் இன்ஷூரன்ஸ் பாலிசிகளுக்கு இன்ஷூரன்ஸ் நிறுவனங்கள் பிரீமியத்தில் தள்ளுபடி வழங்குவது கடினமாகிவிடும்.



மேலும், நிறுவனங்களும் செலவு குறைப்பு நடவடிக்கை காரணமாக குரூப் இன்ஷூரன்ஸ் கவரேஜைக் குறைக்க வாய்ப்புள்ளது. சில நிறுவனங்கள் இதை ஏற்கெனவே செய்தும் வருகின்றன.

கவரேஜ் குறைப்பினால் நேரடியாகப் பாதிக்கப்படுவது அலுவலகங்களில் வேலை பார்க்கும் ஊழியர்கள்தான். இந்த கவரேஜ் குறைப்பை என்ன செய்து சமாளிக்கலாம் என்பது குறித்து டிவிஎஸ் இன்ஷூரன்ஸ் புரோக்கிங் நிறுவனத்தின் பொது மேலாளர் வி.குருநாதன் விளக்கமாக எடுத்துச் சொன்னார்.

“குரூப் ஹெல்த் இன்ஷூரன்ஸ் பாலிசி கவரேஜ் என்பது அந்த நிறுவனத்தில் வேலை பார்க்கும் வரைதான் கிடைக்கும்.

தனி பாலிசி அவசியம்!

அலுவலகங்களில் வேலை பார்க்கும் ஊழியர்கள், நிறுவனம் வழங்கும் குரூப் ஹெல்த் இன்ஷூரன்ஸை மட்டுமே முழுவதுமாக நம்பியிருக்காமல், தனது குடும்பத்துக்கென தனியாக ஒரு ஹெல்த் இன்ஷூரன்ஸ் பாலிசியை எடுப்பது நல்லது. மேலும், சில நிறுவனங்கள் வழங்கும் குரூப் ஹெல்த் இன்ஷூரன்ஸ் பாலிசிகளுக்கான பிரீமியத்தை ஊழியர்களிடம் வசூலிக்கும்.

இதுபோன்ற நிறுவனங்களில் பணிபுரியும் ஊழியர்களுக்கு தனியாக ஹெல்த் இன்ஷூரன்ஸ் பாலிசி கட்டாயம் தேவை. ஏனெனில், குரூப் ஹெல்த் இன்ஷூரன்ஸ் பாலிசிக்கு பிரீமியம் செலுத்துவது நீங்கள்தான். தனியாக பாலிசி எடுத்தால், வேலையைவிட்டுச் செல்லும்போது அல்லது கவரேஜ் குறைப்பு ஆகியவற்றினால் பாதிப்பு வருவதை இதன்மூலம் தடுக்க முடியும்.
மேலும், க்ளைம் விகிதம் அதிகமாகும் போது பிரீமியமும் அதிகரிக்கும். இதையும் நீங்கள்தான் செலுத்த வேண்டியிருக்கும். எனவே, இன்னும் சற்றுக் கூடுதலாக பிரீமியம் செலுத்தி, தனியாக ஹெல்த் இன்ஷூரன்ஸ் பாலிசி எடுப்பது புத்திசாலித்தனமாக இருக்கும். பாலிசியில் க்ளைம் செய்யாத வருடங் களில் போனஸ் அல்லது கூடுதல் கவரேஜ் கிடைக்க வாய்ப்புள்ளது. இதனால் பிரீமியத்தைக் கணிசமாக மிச்சப்படுத்த முடியும்.

கைகொடுக்கும் டாப்-அப்!

நிறுவனங்கள் வழங்கும் குரூப் ஹெல்த் இன்ஷூரன்ஸ் பாலிசிக்கு சூப்பர் டாப்-அப் திட்டங்களைப் பல இன்ஷூரன்ஸ் நிறுவனங்கள் வைத்துள்ளன. இதை எடுத்துக் கொள்வதன் மூலம் பிரீமியம் மிகவும் குறையும். சில நிறுவனங்கள் வழங்கும் ஃப்ளோட்டர் பாலிசியில் பெற்றோரை யும் சேர்த்துக்கொள்ளும் வசதியை வைத்துள்ளன.

இந்தவகையான பாலிசிகளை எடுக்கும்போது பெற்றோர்களுக்கும் கவரேஜ் கிடைத்துவிடும். மேலும், பாலிசியை இளம் வயதிலேயே எடுப்பது சிறந்ததாக இருக்கும். அப்போதுதான் காத்திருப்புக் காலம், ஏற்கெனவே உள்ள வியாதிகளுக்கு க்ளைம் போன்ற சிக்கல்களில் இருந்து தப்பிக்க முடியும்” என்கிற ஆலோசனையைத் தந்து முடித்தார்.
இனி குரூப் ஹெல்த் இன்ஷூரன்ஸுடன் தனியே ஒரு பாலிசி எடுத்துக்கொள்வீர்கள்தானே?