எப்படி தேர்வு செய்வது?(Mutual Fund)

மியூச்சுவல் ஃபண்ட் முதலீடு பற்றி எல்லோருக்கும் தெரியும் என்றுதான் நினைத்துக் கொண்டிருந்தேன். ஆனால், சமீபத்தில் எனது அலுவலகத்திற்கு ஒரு போன் வந்தது. போனில் பேசிய பெண், மியூச்சுவல் ஃபண்டில் பணம் போட்டால் பாதுகாப்பாக இருக்குமா? எங்களைப் போன்ற சாதாரண மனிதர்கள் நல்ல ஃபண்டுகளை எப்படி கண்டுபிடிப்பது என்று கேட்டார்.

அப்போது தான் மியூச்சுவல் ஃபண்ட் பற்றிய அடிப்படை விஷயங்கள் இன்னும் பலருக்கும் போய் சேரவில்லை என்பதைப் புரிந்து கொண்டேன்'' என்கிறார் நிதி ஆலோசகர் ரமேஷ் பட். மியூச்சுவல் ஃபண்ட் பற்றிய அடிப்படை விஷயங்களை விளக்கிச் சொல்லவும் செய்தார்.

மியூச்சுவல் ஃபண்ட் என்பது..!

பங்கில் நேரடியாக முதலீடு செய்ய முடியாதவர்கள், விஷயம் தெரிந்த ஒருவர் மூலம் முதலீடு செய்வதுதான் மியூச்சுவல் ஃபண்ட். நாம் தரும் பணத்தை ஃபண்டை நிர்வகிக்கும் மேனேஜர் பங்கு களில் முதலீடு செய்வார். இப்படி முதலீடு செய்யப்படும் பணம், பங்குச் சந்தையின் ஏற்ற இறக்கத் திற்கு ஏற்ப வருமானம் தரும்.

ஏன் மியூச்சுவல் ஃபண்ட்?

நிதி, முதலீடு விஷயத்தில் நாம் யாரும் வல்லுநர் கிடையாது. நமக்கு உடம்பு சரியில்லை எனில், டாக்டரிடம் போகிற மாதிரி, நம் பணத்தை முதலீடு செய்து லாபம் சம்பாதிக்க மியூச்சுவல் ஃபண்ட் மேனேஜர் நமக்கு உதவுவார்.

கடந்த பத்து, இருபது ஆண்டுகளில் தொழில் துறையோடு சேவைத் துறையையும் சார்ந்தே பொருளாதாரம் இயங்கி வருகிறது. இதனால் உலகில் நடக்கும் எல்லா விஷயங்களும் பங்குச் சந்தையில் உடனுக்குடன் பிரதிபலிக்கும் என்பதால் தனிநபர்கள் கொஞ்சம் தடுமாறவே செய்வார்கள். இது மாதிரி தடுமாறுகிறவர்களுக்கு மியூச்சுவல் ஃபண்ட் நல்லதொரு வாய்ப்பு.

அடுத்த முக்கியமான நன்மை, பரவலான முதலீடு. ஒரு சில பங்குகளில் மட்டுமே பணத்தைப் போட்டு வைக்காமல், லார்ஜ், மிட்கேப் என பல பங்குகளிலும் பணத்தை முதலீடு செய்வதன் மூலம் நஷ்டம் அடைவதற்கான வாய்ப்பைக் குறைப்பது.

எப்படி தேர்வு செய்வது?

ஒவ்வொருவருக்கும் ஒரு லட்சியம் இருக்கும். வீடு வாங்குவது, பிள்ளைகளை மருத்துவராக்குவது, ஓய்வு காலத்தில் வெளிநாட்டுக்குச் சுற்றுலா செல்வது என லட்சியங்கள் மாறும். முதலில் உங்கள் வாழ்க்கை லட்சியம் என்ன என்பதை தீர்மானியுங்கள். அந்த லட்சியத்தை அடைய நமக்கு எவ்வளவு பணம் தேவைப்படும் என்பதைக் கணித்துக் கொள்ளுங்கள்.

அடுத்து, நீங்கள் எந்த நோக்கத்திற்காக முதலீடு செய்ய வேண்டும் என்பதை யோசியுங்கள். வரி சேமிப்புக்காக, நிரந்தர வருமானத்துக்காக, அதிக வருமானத்துக்காக, நீண்ட கால திட்டத்திற்கு என இதில் எந்த நோக்கத்துக்காக முதலீடு செய்யப் போகிறீர்கள் என்பதை முதலில் தீர்மானியுங்கள்.

முதலீட்டாளர்கள் மூன்று வகையாக இருக்கிறார்கள். குறைந்த ரிஸ்க் எடுக்க விரும்புகிறவர்கள், சுமாரான ரிஸ்க்கை அனுமதிப்பவர்கள், அதிக ரிஸ்க் எடுத்தாலும் லாபம் கிடைக்க வேண்டும் என நினைப்பவர்கள். குறைந்த ரிஸ்க் எடுக்க நினைப்பவர்கள் கடன் ஃபண்டுகளில் முதலீடு செய்யலாம்.

கடன் ஃபண்ட் என்பது அரசு கடன் பத்திரங்களில் முதலீடு செய்யப்படுகிறது. நடுத்தரமான ரிஸ்க்கை அனுமதிப்பவர்கள் இண்டெக்ஸ் ஃபண்ட், பேலன்ஸ்டு ஃபண்ட் மற்றும் அசெட் அலகேஷன் ஃபண்டுகளில் முதலீடு செய்யலாம். அதிக ரிஸ்க் எடுக்க விரும்புகிறவர்கள் ஈக்விட்டி மற்றும் மிட்கேப் ஃபண்டுகளை தேர்ந்தெடுக்கலாம்.



செயல்பாடு மற்றும் மேனேஜ்மென்ட்!

ஒரு ஃபண்டில் முதலீடு செய்யும்முன் அதன் கடந்த கால செயல்பாடுகளை வைத்து மட்டுமே எதிர்காலத்தில் நன்கு செயல்படும் என சொல்ல முடியாது. அந்த ஃபண்டை போன்ற மற்ற ஃபண்டுகளுடன் ஒப்பிட்டு பார்க்க வேண்டும். அதாவது, மிட்கேப் ஃபண்டுகளில் முதலீடு செய்யும்போது அதே வேறு மிட்கேப் ஃபண்டுகளை ஒப்பிட்டுப் பார்க்க வேண்டும்.

அதேபோல ஃபண்ட் மேனேஜ்மென்ட், ஃபண்ட் மேனேஜரின் திறமை, அவரின் செயல்பாடு போன்ற விஷயங் களையும் தெரிந்து கொள்ள வேண்டும்.

ஈக்விட்டி டைவர்சிஃபைட் ஃபண்டில் முதலீடு செய்யும் போது அதில் திரட்டப்படும் நிதி சென்செக்ஸ் பங்குகளில் முதலீடு செய்யப்படும். அதனால், சென்செக்ஸ் எவ்வளவு வருமானம் தந்திருக் கிறது. சென்செக்ஸைவிட ஈக்விட்டி டைவர்சிஃபைட் ஃபண்டுகள் நல்ல வருமானம் தந்தால், அப்போது ஈக்விட்டி டைவர்சிஃபைட் ஃபண்டில் முதலீடு செய்யலாம். சென்செக்ஸைவிட ஈக்விட்டி டைவர்சிஃபைட் ஃபண்ட் குறைந்த வருமானம் தந்தால் அந்த ஃபண்ட் நல்ல ஃபண்ட் அல்ல என தீர்மானித்து விடலாம்.

ஃபண்ட் அளவு!

ஃபண்ட் நிர்வகிக்கும் சொத்து மதிப்பைப் பார்த்து ஒரு ஃபண்டை தேர்வு செய்யலாம். அதாவது, அதிகப்படியாகச் சொத்து மதிப்பை கொண்ட ஃபண்டுகள்கூட சில நேரங்களில் நன்றாகச் செயல்பட முடியாமல் போகும். குறைவான சொத்து மதிப்பைக் கொண்ட ஃபண்டுகள் நன்றாகச் செயல்படும். எனவே, நடுத்தரமான அளவில் நிர்வகிக்கும் சொத்து மதிப்பைக் கொண்ட ஃபண்டுகளைத் தேர்தெடுப்பது நல்லது.

ஃபண்ட் செலவு!

ஒரு ஃபண்ட் செயல் படுவதற்காக மார்க்கெட்டிங், விற்பனைச் செலவு, ஆடிட்டிங் செலவு போன்ற செலவுகள் ஃபண்ட் நிறுவனத்தின் செலவு விகிதத்தில் வரும். இந்த செலவு விகிதங்கள் அதிகளவில் இருக்கும் ஃபண்டுகளைத் தேர்வு செய்யக்கூடாது. நீண்ட காலத்தில் முதலீடு செய்யும் போது, இதுபோன்ற காரணங்களால் நமக்கு கிடைக்க
வேண்டிய வருமானம் குறையும். டிவிடெண்ட் உள்ளிட்ட மொத்த வருமானத்தையும் கவனிக்க வேண்டும்.

ஃபாலோ-அப் வேண்டும்!

சிலர் ஃபண்டில் முதலீடு செய்துவிட்டு அதுபற்றி சுத்தமாக மறந்துவிடுகிறார்கள். ஒரு ஃபண்ட் எப்படி செயல் படுகிறது? பாசிட்டிவ்-ஆக இருக்கிறதா? என்பது போன்ற எதையும் கண்டுகொள்ள மாட்டார்கள். சிலரோ தினம் அந்த ஃபண்ட் என்.ஏ.வி. என்ன? நேற்றைவிட ஐந்து பைசா என்.ஏ.வி. இறங்கியுள்ளதே என்று நினைத்து தேவையில்லாமல் வருத்தப்படுவார்கள். இந்த இரண்டு அணுகுமுறையும் தவறு. குறைந்தபட்சம் மூன்று மாதங்களுக்கு ஒருமுறை நம் போர்ட்ஃபோலியோ எப்படி செயல்படுகிறது என்பதை சரி பார்த்து, சரியாகச் செயல்படாத ஃபண்டுகளிலிருந்து வெளியேறி விடலாம்.
இந்த அடிப்படை விஷயங்களை நீங்கள் புரிந்து கொண்டாலே போதும், யார் வேண்டுமானாலும் மியூச்சுவல் ஃபண்ட் முதலீட்டில் கலக்கலாம்.