ஃபண்ட் பரிந்துரை :

ஃபண்ட் பரிந்துரை : ஹெச்டிஎஃப்சி மிட் கேப் ஆப்பர்ச்சூனிட்டீஸ் ஃபண்ட் முதலீடு செய்க!
சொக்கலிங்கம் பழனியப்பன்,டைரக்டர், ப்ரகலா வெல்த் மேனேஜ்மென்ட் பி.லிட்

இந்த ஃபண்ட் பெயரில் குறிப்பிட்டுள்ளதுபோல, மிட் - ஸ்மால் கேப் பங்குகளில் முதலீடு செய்யும் பங்கு சார்ந்த திட்டமாகும். இதன் ஃபண்ட் மேனேஜர் சிராக் சேத்தல்வத் ஆவார். இந்த ஃபண்ட் ஏறக்குறைய 62 சதவிகிதத்தை மிட் கேப் பங்குகளிலும், 23 சதவிகிதத்தை ஸ்மால் கேப் பங்குகளிலும், எஞ்சியதை லார்ஜ் கேப் பங்குகளிலும் முதலீடு செய்துள்ளது.

இந்த ஃபண்ட் மேனேஜர் இந்த ஃபண்டையும் இன்னும் ஓரிரு ஃபண்டுகளையும் தொடர்ந்து நல்ல முறையில் நிர்வகித்து வருகிறார். இந்த ஃபண்ட் ஆரம்பித்ததிலிருந்து இதன் ஃபண்ட் மேனேஜராக இவரே உள்ளார். இவர் நல்ல, தரமான நிறுவனங்களையே இந்த ஃபண்டின் போர்ட்ஃபோலியோவில் வைத்துள்ளார்.

பொதுவாக, மிட் மற்றும் ஸ்மால் கேப் பங்குகளில் இந்தியச் சந்தையில் முதலீடு செய்ய நிறைய பொறுமை வேண்டும். அந்தப் பொறுமை இந்த ஃபண்ட் மேனேஜரிடம் உள்ளது. தரமான நிறுவனங்களை வைத்துள்ளதால், இந்த ஃபண்ட் சந்தை இறங்குமுகமாக இருக்கும்போது, திடமாக நிற்கும். மிட் - ஸ்மால் கேப் ஃபண்ட் என்றாலே ரிஸ்க் மற்றும் ரிவார்டு ஆகிய இரண்டுமே அதிகமாக இருக்கும்.


கடந்த ஆண்டுகளில் (2008 மற்றும் 2011-ம் ஆண்டுகளைத் தவிர) இந்த ஃபண்ட் நிஃப்டி 50 குறியீட்டைவிட அதிகமான வருமானத்தைத் தந்துள்ளது. சந்தை வீழ்ச்சியில் இருக்கும்போது, சந்தையைவிட அதிகமாக விழும்; அதே சமயம், சந்தை காளையின் பிடியில் இருக்கும்போது, சந்தையைவிட மிகவும் அதிகமான வருமானத்தைத் தரும்.

உதாரணத்துக்கு, 2009-ம் ஆண்டு, சந்தை 18.64% வருமானத்தைத் தந்தது. ஆனால், இந்த ஃபண்ட் 94.40% வருமானத்தைத் தந்தது. அதேசமயம், 2011-ம் ஆண்டுச் சந்தை 6.31% வருமானத்தைத் தந்தது. ஆனால், இந்த ஃபண்டின் வருமானம் 18.31% ஆகும்.

இந்த ஃபண்ட் நிஃப்டி குறியீட்டுடன் ஒப்பிடும்போது, நிதி மற்றும் எஃப்எம்சிஜி துறையில் அண்டர்வெயிட்டாகவும்  (under weight)  ஆகவும், ஹெல்த்கேர், இன்ஜினீயரிங் மற்றும் கெமிக்கல்ஸ் துறையில் ஓவர்வெயிட்டாகவும் (over weight) உள்ளது. இது மிட் கேப் ஃபண்டாக இருந்தபோதிலும் அதன் பீட்டா (0.89) சந்தையைவிட குறைவாகவே உள்ளது.

இந்த ஃபண்ட் ஆரம்பித்தபோது  (25.06.2007) ஒருவர் செய்த முதலீடான ரூ.1 லட்சம், தற்போது ரூ.2,83,700-ஆக உள்ளது. இந்த ஃபண்ட் நிர்வகிக்கும் சொத்தோ ரூ.3,000 கோடிக்கு மேல்.

நேரடியாக மிட் கேப் பங்குகளில் முதலீடு செய்ய திணறுபவர்களுக்கு இந்த ஃபண்ட் ஒரு நல்ல முதலீட்டுக் கருவி. இளம்வயதினர், செல்வத்தைப் பன்மடங்காக்க விரும்புபவர்கள், அதிக ரிஸ்க் எடுக்க முடிந்தவர்கள், நீண்ட நாள் காத்திருக்க முடிந்தவர்கள், குறுகிய காலத்தில் பணம் தேவைப்படாதவர்கள், மிட்-ஸ்மால் கேப் நிறுவனங்கள் இனிவரும் காலத்தில் வேகமாக வளரும் என நினைப்பவர்கள் போன்ற அனைவரும் இந்த ஃபண்டில் தாராளமாகவும், மொத்தமாகவும், எஸ்ஐபி மற்றும் எஸ்டிபி முறையிலும் முதலீடு செய்யலாம்.



முதலீட்டுக் காலம்!

இந்த ஃபண்டில் அதிகமாக மிட் கேப் மற்றும் ஸ்மால் கேப் பங்குகள் இடம் பெற்றுள்ளதால், நீண்ட காலத்தில்தான் வருமானம் தரக்கூடியதாக இருக்கிறது.



யார் முதலீடு செய்யக் கூடாது?

குறுகிய காலத்தில் பணம் தேவைப்படுபவர்கள், உறுதியான, நிலையான வருமானத்தை  விரும்பு பவர்கள், ரிஸ்க் எடுக்கத் தயங்குபவர்கள் ஆகியோர் இந்த ஃபண்டில் முதலீடு செய்வதைத் தவிர்ப்பதே நல்லது!

-- ந.விகடன்

ஃபண்ட் பரிந்துரை: யூடிஐ டிரான்ஸ்போர்ட்டேஷன் அண்ட் லாஜிஸ்டிக்ஸ் ஃபண்ட்: அதிக ரிஸ்க் எடுப்பவர்களுக்கு ஏற்ற ஃபண்ட்!

இந்த வாரம் முதலீட்டுக்கு உகந்த துறை சார்ந்த ஃபண்டுகளில் ஒன்றான யூடிஐ டிரான்ஸ்போர்ட்டேஷன் அண்ட் லாஜிஸ்டிக்ஸ் ஃபண்ட் குறித்துப் பார்ப்போம். இந்த ஃபண்ட் போக்குவரத்து மற்றும் லாஜிஸ்டிக்ஸ் துறைகளில் உள்ள நிறுவனப் பங்குகளில் முதலீடு செய்கிறது. கடந்த சில வருடங்களாக இந்தத் துறைப் பங்குகள் முதலீட்டாளர்களுக்கு நல்ல வருமானத்தை ஈட்டித் தந்துள்ளன. இனிவரும் அடுத்தச் சில ஆண்டுகளுக்குப் பொருளாதாரம் நன்றாக இருக்கும் என்பதால், ஆட்டோமொபைல், லாஜிஸ்டிக்ஸ் மற்றும் இந்தத் துறைகளைச் சார்ந்த பிற நிறுவனங்களின் செயல்பாடும் நன்றாக இருக்கும். ஆகவே, இந்த ஃபண்டின் செயல்பாடும் நன்றாக இருக்கும்.



இது துறை சார்ந்த ஃபண்ட் என்பதால் ரிஸ்க் சற்று அதிகம். ஆகவே, புதிதாக மியூச்சுவல் ஃபண்ட் முதலீட்டில் நுழைபவர் கள் மற்றும் சிறு முதலீட்டாளர்கள் இந்த ஃபண்டில் முதலீடு செய்ய வேண்டாம். மேலும், குறிக்கோள் வைத்துத் திட்டமிடுபவர்களும் இந்த ஃபண்டில் முதலீடு செய்ய வேண்டாம். மியூச்சுவல் ஃபண்ட் முதலீட்டில் நல்ல அனுபவம் உள்ளவர்கள், அதிக ரிஸ்க் எடுக்கக்கூடியவர்கள், சரியான நேரம் பார்த்து வெளியேறத் தெரிந்தவர்கள், செல்வத்தைப் பெருக்க நினைப்பவர்கள் மட்டுமே இந்த ஃபண்டில் முதலீடு செய்யலாம்.

இந்த ஃபண்டின் மேனேஜர் அனூப் பாஸ்கர் மற்றும் டய்லின் ஜெரால்டு பால் பிண்டோ ஆவார்கள். அனூப் பாஸ்கர் நன்றாகச் செயல்பட்டு வரும் யூடிஐ ஆப்பர்சூனிட்டீஸ் மற்றும் யூடிஐ ஈக்விட்டி போன்ற திட்டங்களையும் நிர்வகித்து வருகிறார்.

இந்த ஃபண்ட் தற்போது ரூ.542 கோடி மதிப்புள்ள சொத்துக்களை நிர்வகித்து வருகிறது. இதன்போர்ட் ஃபோலியோவில் ஆட்டோ மொபைல் துறை சார்ந்த பங்குகள் 65 சதவிகிதத்துக்கும் அதிகமாக இடம்பெற்றுள்ளன. அதற்கு அடுத்தபடியாக, சர்வீசஸ் (10.64%) மற்றும் இன்ஜினீயரிங் (9.61%) துறைகள் இடம் பெற்றுள்ளன.

இந்த ஃபண்டின் டாப் 5 பங்குகள் மாருதி சுஸூகி, ஹீரோ மோட்டோகார்ப், பஜாஜ் ஆட்டோ, போஸ்ச் மற்றும் டாடா மோட்டார்ஸ் ஆகும். இவை தவிர, ஆட்டோ மொபைல் பாகங்கள் தயாரிக்கும் நிறுவனப் பங்குகளும் இடம் பெற்றுள்ளன. லாஜிஸ்டிக்ஸ் துறையிலிருந்து, விஆர்எல் லாஜிஸ்டிக்ஸ், அதானி போர்ட்ஸ், கன்டெய்னர் கார்ப், கேட்வே டிஸ்ட்ரிபார்க்ஸ் போன்ற நிறுவனப் பங்குகள் இடம்பெற்றுள்ளன.

2007-ம் ஆண்டு சந்தை உச்சத்தில் இருந்தபோது, இந்த ஃபண்டிலிருந்து எந்த வருமான மும் (-0.97%) இல்லை. 2008-ம் ஆண்டு சந்தை அடிபட்டபோது, இந்த ஃபண்டும் சந்தையை யொட்டி நன்கு விலை இறங்கியது. 2009-ம் வருடம் 132.13 சதவிகித வருமானத்தைக் கொடுத்தது. அதேபோல், சென்ற வருடம் (2014) 103.96 சதவிகித வருமானத்தைத் தந்துள்ளது.  2008-ம் ஆண்டிலிருந்து தொடர்ந்து நிஃப்டியை பீட் செய்துள்ளது. மேலும், கடந்த 1, 3, 5 மற்றும் 10 வருட கால கட்டங்களில் இதன் கேட்டகிரி ஆவரேஜைத் தொடர்ந்து பீட் செய்துள்ளது. இந்த ஃபண்ட் ஆரம்பித்தபோது (ஏப். 07, 2004),  ஒருவர் செய்த முதலீடான ரூ.1 லட்சம், தற்போது ரூ.8,48,004-ஆக உள்ளது. இது சிஏஜிஆர் அடிப்படையில் 20.90% வருமானமாகும்.



இந்த ஃபண்டின் பீட்டா (1.17) சந்தையைவிடச் சற்று அதிகமாக வும், இதன் ஆல்ஃபா மிக உன்னதமாக 20.63 என்ற அளவி லும் உள்ளது. இதன் டேர்னோவர் 14% என்ற அளவில் மிகவும் குறைவாக இருப்பது, வாங்கிய பங்குகளின் மீது இருக்கும் மேனேஜரின் மனஉறுதியைக் காண்பிக்கிறது.

ஹை ரிஸ்க் ஹை ரிவார்டு கேட்டகிரியில் வரும் இந்த ஃபண்டில் செல்வத்தைப் பெருக்க நினைப்பவர்கள் தாராளமாக முதலீடு செய்யலாம்.









யாருக்கு உகந்தது?

ஏற்கெனவே மியூச்சுவல் ஃபண்டுகளில் முதலீடு செய்து உள்ளவர்கள், போர்ட் ஃபோலியோவை பரவலாக்க விரும்புபவர்கள், இளம் வயதினர், பணம் அதிகம் உள்ளவர்கள், செல்வத்தைப் பெருக்க நினைப் பவர்கள், அதிக ரிஸ்க் எடுக்கக் கூடியவர்கள், பணம் உடனடித் தேவை இல்லாதவர்கள்.

யார் முதலீடு செய்யக்கூடாது?

முதன்முறையாக மியூச்சுவல் ஃபண்டில் முதலீடு செய்பவர்கள், குறிக்கோளுக்காக முதலீடு செய்பவர்கள், சிறிய முதலீடு உள்ளவர்கள், குறுகிய காலத்தில் பணம் தேவைப்படுபவர்கள், உறுதியான/ நிலையான வருமானத்தை விரும்புபவர்கள், அதிக ரிஸ்க் எடுக்கத் தயங்குபவர்கள்.

----------------------------------------------------------------------------------------------------------------------------------------------------------------------------------------


எனக்கு இப்போது 45 வயது. என் ஓய்வுக்காலத்துக்குப்பின், தொடர்ந்து வருமானம் கிடைக்கிற மாதிரி மியூச்சுவல் ஃபண்டுகளில் முதலீடு செய்ய விரும்புகிறேன். மாதமொன்றுக்கு ரூ.10,000 என்னால் முதலீடு செய்ய முடியும். அடுத்த 15 ஆண்டுகளுக்குப்பின் எனக்குப் பணம் கிடைக்கத் தொடங்கினால் போதும்.

ஆர்.அன்பு.

‘‘உங்களின் தேவை 15 வருடம் கழித்துத்தான் என்பதால், நீங்கள் பங்கு சார்ந்த டைவர்ஸிஃபைடு திட்டங்களில் முதலீடு செய்துகொள்ளலாம். மாதத்துக்கு ரூ.10,000 முதலீடு செய்யும்போது, ஆண்டு வருமானம் கன்ஸர்வேட்டிவ்வாக 12 சதவிகிதமாகக் கிடைக்கும் என்று எடுத்துக் கொள்ளும்பட்சத்தில், உங்களுக்கு ஏறக்குறைய ரூ.45 லட்சம் கிடைக்கும். இதைவிட அதிகமாகக் கிடைக்கவும் வாய்ப்புள்ளது. நீங்கள் பிஎன்பி பரிபாஸ் ஈக்விட்டி ஃபண்ட் – ரூ.5,000, மிரே இந்தியா எமெர்ஜிங் புளூசிப் ஃபண்ட் – ரூ.5,000 ஆகிய மியூச்சுவல் ஃபண்டுகளில் நீங்கள் முதலீடு செய்துகொள்ளலாம்.’’

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

--ந.விகடன்

ஃபண்ட் பரிந்துரை: ஹெச்டிஎஃப்சி ஈக்விட்டி ஃபண்ட்: ஏற்கெனவே உள்ள முதலீட்டைத் தொடரலாம்!

இந்தியாவிலேயே மிக அதிகமான தொகையை ஒரு ஃபண்ட் நிர்வாகம் செய்கிறது என்றால், அது ஹெச்டிஎஃப்சி ஈக்விட்டி ஃபண்ட்தான். இந்தத் திட்டம் ரூ.18,000 கோடிக்கும் மேலான சொத்துக்களை நிர்வகித்து வருகிறது.



இதன் ஃபண்ட் மேனேஜர், இந்திய மியூச்சுவல் ஃபண்ட் உலகில் மிகவும் பரிச்சயமான பிரஷாந்த் ஜெயின். இவர், இந்த ஃபண்ட் தவிர, ஹெச்டிஎஃப்சி டாப் 200, ஹெச்டிஎஃப்சி புரூடென்ஸ், ஹெச்டிஎஃப்சி இன்ஃப்ரா மற்றும் ஹெச்டிஎஃப்சி எம்ஐபி போன்ற ஃபண்டுகளையும் நிர்வகித்து வருகிறார். இந்த 5 ஃபண்டுகளையும் சேர்த்தால், இவர் நிர்வகிக்கும் தொகை ரூ.45,000 கோடிக்கும் மேல்.

இந்த ஃபண்ட் ஆரம்பித்த போது (ஜனவரி 01, 1995) ஒருவர் செய்த முதலீடான ரூ.1 லட்சம், தற்போது (ஜூலை 20, 2015) ரூ.48,12,620-ஆக உள்ளது. இது கூட்டுவட்டி அடிப்படையில் 20.73% ஆண்டு வருமானமாகும்.

இந்த ஃபண்ட் ஒரு லார்ஜ் + மிட் கேப் திட்டமாகும். 77 சதவிகிதத்தை லார்ஜ் கேப் பங்கு களிலும், எஞ்சியதை மிட் அண்ட் ஸ்மால் கேப் பங்குகளிலும் முதலீடு செய்துள்ளது. இதன் டாப் ஹோல்டிங்ஸாக எஸ்பிஐ, ஐசிஐசிஐ பேங்க், எல் அண்ட் டி, இன்போஃசிஸ் மற்றும் மாருதி சுஸூகி உள்ளன.

கடந்த சில ஆண்டுகளில் இந்த ஃபண்டின் சற்று தளர்ச்சியான செயல்பாட்டுக்குக் காரணம், எஸ்பிஐ பங்குகளில் உள்ள இதன் முதலீடாகும். ஃபண்ட் மேனேஜர் இந்தப் பங்கின் மேல் வைத்துள்ள நம்பிக்கையின் காரணமாக, இன்றளவிலும் இந்தப் பங்கு டாப் ஹோல்டிங்ஸாக உள்ளது.

ஃபைனான்ஸ் இதன் டாப் துறை சார்ந்த முதலீடாக உள்ளது. இந்த ஃபண்ட் ஆட்டோ மொபைல் மற்றும் இன்ஜினீயரிங் துறை களில் ஓவர்வெயிட்டாகவும், எனர்ஜி மற்றும் டெக்னாலஜி துறைகளில் அண்டர் வெயிட் டாகவும் உள்ளது.

இந்த ஃபண்டின் பீட்டா 1.23 என்ற அளவில் உள்ளது. இது, சந்தை உயரும்போது அதிகமாக உயருவதையும், சந்தை குறையும் போது அதிகமாகக் குறைவதையும் காண்பிக்கிறது. ஆகவேதான், இந்த ஃபண்ட் கரடிச் சந்தையை விட காளைச் சந்தையில் நன்றாகச் செயல்படுகிறது.

இதன் ஆல்ஃபா 2.84 என்ற அளவில் உள்ளது. இதைப் போன்ற பிற ஃபண்டுகளுடன் ஒப்பிடும்போது, இது சற்றுக் குறைவுதான்.



இந்த ஃபண்ட் கடந்த ஓராண்டு காலத்தில் 13.70 சதவிகிதமும், 3 ஆண்டு காலத்தில் 23.07 சதவிகிதமும், 5 ஆண்டு காலத்தில் 13.17 சதவிகிதமும் 10 ஆண்டு காலத்தில் 19.96 சதவிகித மும் ஆண்டுக் கூட்டு வட்டி வருமானம் தந்துள்ளது.

கடந்த 1, 3, 5 மற்றும் 10 வருடங்களில் நிஃப்டி 50-யைவிட 1.44% முதல் 5.57% வரை அதிக வருமானத்தைக் கொடுத்துள்ளது. அதேசமயத்தில், இதனுடைய கேட்டகிரி ஆவரேஜுடன் ஒப்பிடுகையில், கடந்த ஓராண்டில் (-9.39) மற்றும் மூன்று (-0.45) வருடங்களில் குறைந்த வருவாய் தந்துள்ளது.

ஐந்து வருட காலகட்டத்தில் கேட்டகிரி ஆவரேஜை ஒட்டியே வருமானத்தைக் கொடுத்துள்ளது. இதுவே, நமது ‘ஹோல்டு’ பரிந்துரைக்கு முக்கியக் காரணம். நமது எதிர்பார்ப்பு, கேட்டகிரி ஆவரேஜைவிட அதிக வருமானத்தைத் தரவேண்டும் என்பதே.



இந்த ஃபண்ட் பல ஏற்ற இறக்கங்களைக் கண்டுள்ளது. மேலும், 20 வருடத்துக்கும் மேலான பாரம்பர்யத்தைக் கொண்டுள்ளது. ஃபண்ட் மேனேஜர் தனது பலத்தைத் தொடர்ச்சியாக கடந்த 20 வருடங்களில் நிரூபித்துள்ளார். ஆகவே, இந்த ஃபண்டின் செயல்பாடு திரும்ப எழுந்துவரும் என்பதில் எந்தவித சந்தேகமுமில்லை.

ஏற்கெனவே இந்த ஃபண்டில் முதலீடு செய்துள்ள கன்ஸர் வேட்டிவ் மற்றும் மாடரேட் முதலீட்டாளர்கள், இந்த ஃபண்டில் தங்களுக்கு உள்ள முதலீட்டை தக்கவைத்துக் கொள்ளலாம். அக்ரெஸிவ் முதலீட்டாளர்கள் மற்றும் குறுகிய காலச் செயல்பாட்டை எதிர்பார்ப்பவர்கள் இந்த ஃபண்டிலிருந்து வேறு திட்டங்களுக்கு மாறிக் கொள்ளலாம்.



யாருக்கு உகந்தது?

ஏற்கெனவே மியூச்சுவல் ஃபண்டுகளில் முதலீடு செய்துள்ளவர்கள், அனைத்து வயதினர், பணம் அதிகம் உள்ளவர்கள், செல்வத்தைப் பெருக்க நினைப்பவர்கள், ரிஸ்க் எடுக்கக் கூடியவர்கள், பணம் உடனடித் தேவை இல்லாதவர்கள்.

யார் முதலீடு செய்யக்கூடாது?

குறுகிய காலத்தில் பணம் தேவைப்படுபவர்கள், உறுதி யான/ நிலையான வருமானத்தை விரும்புபவர்கள், அதிக ரிஸ்க் எடுக்கத் தயங்குபவர்கள்.

ஃபண்ட் பரிந்துரை: நீண்ட காலத்தில் செல்வத்தைப் பெருக்க நினைப்பவர்களுக்கு..!
சுந்தரம் செலக்ட் மிட் கேப் ஃபண்ட்

இந்த வாரம் முதலீட் டுக்கு உகந்த மிட் மற்றும் ஸ்மால் கேப் திட்டங்களில் ஒன்றான சுந்தரம் செலக்ட் மிட் கேப் ஃபண்ட் குறித்துப் பார்ப்போம்.

இந்த ஃபண்ட் ஜூலை 2002ல் ஆரம்பிக்கப்பட்டது. இது முழுக்க முழுக்க மிட் மற்றும் ஸ்மால் கேப் பங்குகளிலேயே தனது முதலீட்டை வைத்துக் கொள்கிறது. சுமார் 13 வருடங் களுக்கு முன்னால் இந்த ஃபண்ட் ஆரம்பித்தபோது ஒருவர் செய்த முதலீடான ரூ.1 லட்சம், தற்போது ரூ.35,14,484-ஆக உள்ளது. இது கூட்டு வட்டி அடிப்படையில் ஆண்டுக்கு 31.50%. மக்கள் பாஷையில் சொல்லப்போனால், இது இரண்டரை வட்டிக்கும் அதிகமாகும்.



நாம் ஏற்கெனவே பலமுறை சொல்லியிருப்பதுபோல், இந்த அளவு வருமானத்தை வேறு எந்த சொத்துக்களும் (ரியல் எஸ்டேட், தங்கம் உட்பட) கொடுத்திருக்க வாய்ப்பில்லை. இந்த முழு லாபத்துக்கும் வருமான வரி ஏதும் கட்ட வேண்டாம் என்பது கூடுதல் போனஸ் ஆகும்.

இதன் ஃபண்ட் மேனேஜர் ஆர்.கிருஷ்ணகுமார். சென்னையில் ஃபண்ட் நிர்வாகத்தைக் கொண்டுள்ள வெகுசில நிறுவனங்களில் சுந்தரமும் ஒன்று. தற்போது ரூ.3,000 கோடிக்கும் மேலான சொத்துக்களை இந்த ஃபண்ட் நிர்வகித்து வருகிறது.

இந்த ஃபண்ட் தற்போது 97 சதவிகிதத்துக்கும் அதிகமாக பங்கு முதலீட்டில் வைத்துள்ளது. 61 பங்குகளை தனது போர்ட் ஃபோலியோவில் கொண்டுள்ளது. வைத்திருக்கும் பங்குகளின் ஆவரேஜ் சந்தை மதிப்பு ரூ.8,111 கோடியாகும்.

இதன் போர்ட்ஃபோலி யோவில் இருக்கும் டாப் துறை கள் ஃபைனான்ஸ், இன்ஜினீயரிங், கன்ஸ்ட்ரக்‌ஷன், டெக்ஸ்டைல்ஸ் மற்றும் ஆட்டோமொபைல்.

எஸ்ஆர்எஃப், ஃபேக் பியரிங்ஸ், பஜாஜ் ஃபைனான்ஸ், வேப்கோ இந்தியா, யுனைடெட் பாஸ்பரஸ் போன்ற பங்குகள் இதன் டாப் ஹோல்டிங்ஸாக உள்ளன.

இந்த ஃபண்ட் ஃபைனான்ஸ், ஐ.டி, எஃப்எம்சிஜி மற்றும் ஹெல்த்கேர் துறைகளில் அண்டர்வெயிட்டாகவும், இன்ஜினீயரிங், டெக்ஸ்டைல்ஸ், கன்ஸ்ட்ரக்‌ஷன் மற்றும் சர்வீசஸ் துறைகளில் ஓவர்வெயிட்டாகவும் உள்ளது.

ஆகவே, குறியீட்டை ஒட்டியே செயல்படும் ஏராளமான ஃபண்டுகளுக்கு மத்தியில், இந்த ஃபண்ட் சற்று வித்தியாசமான போர்ட்ஃபோலியோவைக் கொண்டுள்ளது.



ஒரேமாதிரியான போர்ட் ஃபோலியோவைக் கொண்டுள்ள ஃபண்டுகள் வேண்டாம் என நினைப்பவர்களுக்கு இந்த ஃபண்ட் கனகச்சிதமாகப் பொருந்தும்.

இந்த ஃபண்ட் மிட் மற்றும் ஸ்மால் கேப் பங்குகளில் முதலீடு செய்வதால், கரடிச் சந்தையை விட காளைச் சந்தையில் நன்றாகச் செயல்படும்.

இந்த ஃபண்டின் ஆல்ஃபா 14.39 என்ற அளவில் மிகவும் உன்னதமாக உள்ளது. அதே சமயத்தில், இந்த ஃபண்டின் பீட்டா (0.98) சந்தையை ஒட்டியே உள்ளது.





கடந்த 1, 3, 5, மற்றும் 10 வருட காலகட்டங்களில் நிஃப்டியை விட கணிசமாக அதிக வருமானம் தந்துள்ளது குறிப்பிட்டுச் சொல்ல வேண்டிய விஷயம்! மேலும், இதன் கேட்டகிரி ஆவரேஜைவிட கடந்த காலங்களில் 2 – 6.50% அதிக வருமானத்தைக் கொடுத்துள்ளது.

இந்த ஃபண்ட் மிட் அண்ட் ஸ்மால் கேப் பங்குகளில் முதலீடு செய்வதால், ஹை ரிஸ்க் – ஹை ரிவார்டு கேட்டகிரியில் வருகிறது. ஆகவே, நீண்ட காலத்தில் செல்வத்தைப் பெருக்க நினைப் பவர்களுக்கு மிகவும் பொருந்தும்.

மேலும், நீண்ட காலத் தேவை களான ஓய்வுக்காலம்  போன்ற நோக்கத்துக்காக முதலீடு செய்பவர்கள் ஒரு லார்ஜ் கேப் ஃபண்டோடு இந்த ஃபண்டையும் சேர்த்து முதலீடு செய்யலாம்.



யாருக்கு ஏற்றது?

இளம் வயதினர், பணம் அதிகம் உள்ளவர்கள், செல்வத்தைப் பெருக்க நினைப்ப வர்கள், அதிக ரிஸ்க் எடுக்கக் கூடியவர்கள், பணம் உடனடித் தேவை இல்லாதவர்களுக்கு இந்த ஃபண்ட் ஏற்றது!

யார் முதலீடு செய்யக்கூடாது?

குறுகிய காலத்தில் பணம் தேவைப்படுபவர்கள், உறுதி யான/ நிலையான வருமானத்தை விரும்புபவர்கள், அதிக ரிஸ்க் எடுக்கத் தயங்குபவர்கள் இந்த ஃபண்டில் முதலீடு செய்யக் கூடாது!.
------------------------------------------------------------------------------------------------------------------------------------------------------------------------------------------


எனக்கு வயது 30. என் மனைவி பிஎட் படிக்கிறார். இரண்டரை வயதில் ஒரு மகள். மாதம் 30,000 சம்பாதிக்கிறேன். அத்தியாவசிய செலவு போக 20,000 மிச்சமாகிறது. இதை, குறுகிய கால தேவை, மகளின் கல்வி மற்றும் திருமண செலவு, ஓய்வுக்கால தேவை ஆகியவற்றுக்காகச் சேமிக்க விரும்புகிறேன். ஓரளவு ரிஸ்க் எடுக்க விரும்புகிறேன். எனக்கு சேமிப்புக்கான ஆலோசனைக் கூறவும்!

செல்வராஜ், நாமக்கல்.


‘‘உங்களிடம் மாதம் ரூ.20,000 உபரியாக உள்ளதாகக் கூறியுள்ளீர்கள். இதை மூன்று பங்காக கீழ்க்கண்டவாறு பிரித்துக் கொள்ளுங்கள்:

1. குறுகிய காலத் தேவைகளுக்கு – ரூ.6,000

2. மகள் நலனுக்கு – ரூ.7,000

3. ஓய்வுக்காலத்துக்கு – ரூ.7,000

மேலே கூறியுள்ள நோக்கங்களுக்காக, கீழ்க்கண்ட ஃபண்டுகளில் எஸ்ஐபி முறையில் உங்களின் முதலீட்டை செய்து கொள்ளுங்கள்:

குறுகிய காலத் தேவைகளுக்கு – ரெலிகர் இன்வெஸ்கோ கிரெடிட் ஆப்பர்சூனிட்டீஸ் ஃபண்ட் – மாதத்துக்கு ரூ.6,000.

மகள் நலனுக்கு – டாடா பேலன்ஸ்டு ஃபண்ட் – மாதத்துக்கு ரூ.7,000.

ஓய்வுக்காலத்துக்கு – மிரே இந்தியா ஆப்பர்சூனிட்டீஸ் ஃபண்ட் – மாதத்துக்கு ரூ.7,000.’’

ஃபண்ட் பரிந்துரை: ஹை ரிஸ்க் ஹை ரிவார்டு!
ஃப்ராங்க்ளின் இந்தியா பிரைமா ஃபண்ட்

சென்ற வாரம் மிட் மற்றும் ஸ்மால் கேப் திட்டங்களில் ஒன்றான சுந்தரம் செலக்ட் மிட் கேப் ஃபண்ட் குறித்துப் பார்த்தோம். இந்த வாரம் அதே கேட்டகிரியில் முதலீட்டுக்கு உகந்த ஃப்ராங்க்ளின் இந்தியா பிரைமா ஃபண்ட் குறித்துப் பார்ப்போம்.

நமக்குக் கிடைக்கும் மிட் கேப் ஃபண்ட் திட்டங்களில் ஃப்ராங்க்ளின் இந்தியா பிரைமா ஃபண்டை பெஸ்ட் என்று  கூறிவிட முடியாது. என்றாலும், இந்தத் திட்டத்தின் நீண்ட காலச் செயல்பாடு இந்த ஃபண்டுக்கு ஒரு சாதகமான அம்சம்.



மேலும், கடந்த சில ஆண்டு களுக்கு முன் ஆர்.ஜானகிராமன் இந்த ஃபண்டின் நிர்வாகப் பொறுப்பை எடுத்துக் கொண்டுள் ளார். அவருடன் ரோஷி ஜெயின் என்பவரும் கூடுதல் ஃபண்ட் மேனேஜராக உள்ளார்.

ஆர்.ஜானகிராமன் ஒரு கைதேர்ந்த ஃபண்ட் மேனேஜர் ஆவார். மேலும். ஃப்ராங்க்ளின் ஃபண்ட் நிறுவனம் ஒரு நல்ல செயல்முறையைக் கொண்டுள்ள நிறுவனமாகும். இவையே நாம் இந்த ஃபண்டை பரிந்துரைப்பதற்குக் காரணமாகும்.

கடந்த 1, 3 மற்றும் 5 வருடங்களில் 1.74% - 3.90% அளவு கேட்டகிரி ஆவரேஜைவிட அதிக வருமானத்தைக் கொடுத்துள்ளது. இந்த ஃபண்ட் கடந்த 10 வருட காலத்தில் கேட்டகிரியை ஒட்டியே வருமானத்தைக் கொடுத்துள்ளது. இந்த ஃபண்ட் ஆரம்பித்தபோது (டிசம்பர் 01, 1993) ஒருவர் செய்த முதலீடான ரூ.1 லட்சம், தற்போது (ஜூலை 31, 2015) ரூ.69.11 லட்சமாக உள்ளது. இது கூட்டுவட்டி அடிப்படையில் ஆண்டுக்கு 21.58% ஆகும்.

இந்த மிட் அண்ட் ஸ்மால் கேப் ஃபண்ட் தற்போது ரூ.3,576 கோடி மதிப்புள்ள சொத்துக்களை நிர்வகித்து வருகிறது. இதன் போர்ட்ஃபோலியோவில் 69 சதவிகிதம் மிட் அண்ட் ஸ்மால் கேப் பங்குகளிலும், எஞ்சியது லார்ஜ் கேப் பங்குகளிலும் முதலீடு செய்யப்பட்டுள்ளது.

யெஸ் பேங்க், அமர ராஜா பேட்டரீஸ், டோரண்ட் பார்மா, ஃபினோலெக்ஸ் கேபிள்ஸ், ஹெச்டிஎஃப்சி பேங்க் போன்றவை இதன் டாப் ஹோல்டிங்ஸாக உள்ளன.

இதன் போர்ட்ஃபோலியோவில் கேஷ் ஏறக்குறைய 8 சதவிகிதம் உள்ளது. இந்த ஃபண்டின் பீட்டா சந்தையையொட்டி 0.95 என்ற அளவில் உள்ளது. ஆல்ஃபா 16.24 என்ற அளவில் மிகவும் உன்னத மாக உள்ளது.



கெமிக்கல்ஸ், இன்ஜினீயரிங் மற்றும் சர்வீசஸ் துறைகளில் ஓவர்வெயிட்டாகவும், ஃபைனான்ஸ், ஹெல்த்கேர் மற்றும் ஆட்டோமொபைல் துறைகளில் அண்டர் வெயிட்டா கவும் உள்ளது. எந்த ஒரு பங்கும் 5 சதவிகிதத்துக்கு மிகாமல் உள்ளது.

இந்த ஃபண்டின் டிவிடெண்ட் ஆப்ஷனின் என்ஏவி ரூ.58.49 ஆகும். கடந்த 17 ஆண்டுகளாக (1999-லிருந்து) தொடர்ந்து இந்த ஃபண்ட் டிவிடெண்டை வழங்கி வருகிறது.





கடந்த எட்டு வருடங்களாக ஜூன் மாதத்தில் டிவிடெண்டை வழங்கி வருகிறது. தொடர்ச்சி யான டிவிடெண்ட் டிராக் ரெக்கார்டு இருப்பதால், டிவிடெண்டை எதிர்பார்ப் பவர்களுக்கு இது ஒரு நல்ல ஃபண்டாக அமையும்.

ஹை ரிஸ்க் ஹை ரிவார்டு கேட்டகிரியை நாடுபவர்களுக்கு இந்த ஃபண்ட் மிகவும் பொருத்தமாக இருக்கும்.



யாருக்கு ஏற்றது?

இளம் வயதினர், பணம் அதிகம் உள்ளவர்கள், செல்வத்தைப் பெருக்க நினைப்பவர்கள், அதிக ரிஸ்க் எடுக்கக்கூடியவர்கள், பணம் உடனடித் தேவை இல்லாதவர்கள்.

யார் முதலீடு செய்யக் கூடாது?

குறுகிய காலத்தில் பணம் தேவைப்படுபவர்கள், உறுதி யான/ நிலையான வருமானத்தை விரும்புபவர்கள், அதிக ரிஸ்க் எடுக்கத் தயங்குபவர்கள்.

-----------------------------------------------------------------------------------------------------------------------------------------------------------------------------------------

ஃபண்ட் Q&A

ஐசிஐசிஐ வேல்யூ டிஸ்கவரி ஃபண்டில் மாதம் 10,000 ரூபாயை கடந்த மூன்று ஆண்டுகளாக முதலீடு செய்து வருகிறேன். இதைத் தொடரலாமா? இந்தப் பணம் அடுத்த ஐந்து ஆண்டுகளுக்கு எனக்குத் தேவை இல்லை!

ஜெரோம், சென்னை.

“ஐசிஐசிஐ புரூ. வேல்யூ டிஸ்கவரி ஃபண்ட் ஒரு மிட் கேப் ஃபண்டாக உருவெடுத்து, தற்போது ஒரு லார்ஜ் மற்றும் மிட் கேப் ஃபண்டாக மாறியுள்ளது. இந்த மாற்றத்துக்கு ஒரு முக்கியக் காரணம், அந்த ஃபண்ட் நிர்வகிக்கும் சொத்து மதிப்பு கடந்த காலங்களில் கணிசமாகப் பெருகி இருப்பதுதான்.

தற்போது, ரூ.10,000 கோடிக்கும் மேலான சொத்துக்களை இந்த ஃபண்ட் நிர்வகித்து வருகிறது. கடந்த பத்து வருடங்களில் ஆண்டுக்கு 21.21 சதவிகிதம் கூட்டு வட்டி அடிப்படையில் வருமானத்தைக் கொடுத்துள்ளது.

ஆரம்பத்தில் (ஆகஸ்ட் 16, 2004) முதலீடு செய்தவர்களுக்கு ஆண்டுக்கு 25.32 சதவிகித வருமானத்தைக் கூட்டு வட்டி அடிப்படையில் கொடுத்துள்ளது. இந்த ஃபண்ட் நல்ல செயல்பாட் டுடன் இருப்பதால், இந்தத் திட்டத்தில் நீங்கள் தொடர்ந்து முதலீட்டை மேற்கொண்டு வரலாம்.''

---------------------------------------------------------------------------------------------------------------------------------------------------------------------------------------

எனக்கு அடுத்த 5 ஆண்டுகளில் 3 முதல் 5 லட்சம் ரூபாய் தேவை. எந்த ஃபண்டுகளில், மாதம் எவ்வளவு முதலீடு செய்தால் அந்தத் தொகை கிடைக்கும்?

ஆனந்தபத்மநாபன்.

“நீங்கள் அடுத்த ஐந்து வருடங்களுக்கு எஸ்ஐபி முறையில் கீழ்க்கண்ட ஃபண்டுகளில் முதலீடு செய்யலாம்.

* ஃப்ராங்க்ளின் இந்தியா பிரைமா பிளஸ் ஃபண்ட் – ரூ 2,500

* பி.என்.பி பரிபாஸ் ஈக்விட்டி ஃபண்ட் – ரூ 2,500.''

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

---ந.விகடன்

ஃபண்ட் பரிந்துரை: 50 வயதைத் தாண்டியவர்களுக்கு ஏற்ற முதலீடு!

16/08/2015

ஓரிரு ஆண்டுகள் முன்பு வரை மியூச்சுவல் ஃபண்ட் சார்ந்த கடன் திட்டங்களில் முதலீடு செய்யும்போது, ஓராண்டுக்கு மேல் வைத்திருக்கும்பட்சத்தில் லாங் டேர்ம் கேப்பிட்டல் கெயின்ஸ் (LTCG) வரி கட்ட வேண்டியிருக்கும். ஆனால், சமீபத்திய மாறுதல்களினால், மூன்றாண்டுகளுக்கு மேல் வைத்திருந்தால்தான் லாங் டேர்ம் கேப்பிட்டல் கெயின்ஸ் வரி பொருந்தும்.

இந்த மாற்றத்தினால் எம்ஐபி திட்டங்களில் முதலீடு செய்யும் பல முதலீட்டாளர்கள், மாற்றுத் திட்டத்தை தேடினார்கள். இந்த தேடுதலில் உருவானதுதான் ஈக்விட்டி சேவர் அல்லது ஈக்விட்டி சேவிங்ஸ் அல்லது ஈக்விட்டி இன்கம் ஃபண்டுகள் என்று அழைக்கப்படும் கேட்டகிரி. இந்த கேட்டகிரி யிலிருந்து சமீப காலத்தில் நிறைய என்எஃப்ஓ-க்கள் வந்த வண்ணம் உள்ளன.



இந்த  கேட்டகிரி  ஃபண்டுகளில் எம்ஐபி போன்ற அல்லது அதைவிட சற்றுக் கூடுதலான வருமானம் கிடைக்கும்; அதே சமயத்தில், ஒரு வருடத்துக்கு மேல் வைத்திருக்கையில், வரும் லாபத்துக்கு எந்தவிதமான வரியும் கட்ட வேண்டாம். ஏனென்றால் இந்த ஃபண்டுக்கு ஈக்விட்டி டிடெக்‌ஷன் பொருந் தும். அப்படியென்றால், இந்த வகை ஃபண்டுகளின் அமைப்பு எவ்வாறு இருக்கும் என்ற கேள்வி உங்கள் மனதில் எழுகிறதா?

இந்த வகை ஃபண்டுகள் பொதுவாக மூன்று வகையாக தங்களின் முதலீட்டைப் பிரித்துக் கொள்கின்றன. ஒரு பகுதியை கடன் சார்ந்த உபகரணங்களிலும், மற்றொரு பகுதியை பங்கு சார்ந்த முதலீட்டிலும், மூன்றாவது பகுதியை ஆர்பிட்ரேஜ் வாய்ப்புகளிலும் முதலீடு செய்கின்றன. இந்த ஆர்பிட்ரேஜ்  வாய்ப்புகள் முழுவதும் பங்கு சார்ந்த உபகரணங்களிலேயே எடுக்கப்படுகின்றன. அதாவது, பங்குகளை ஒரு தொகைக்கு வாங்கிவிட்டு, அதே அளவு தொகைக்கு ஈடாக ஃப்யூச்சர்ஸ் சந்தையில் விற்றுவிடுவார்கள். மேற்கூறியதற்கு உல்டாவாகவும் நடக்கலாம். இவ்வாறு வாங்குவதற்கும் விற்பதற்கும் உண்டான வித்தியாசம்தான் லாபம்.



இந்த வித்தியாசம் பொதுவாக, ஒரு ஆண்டு ஃபிக்ஸட் டெபாசிட் வட்டிக்கு சமமாக இருக்கும். ஆக, இந்தவிதமான ஃபண்டுகளின் வருமானம் ஏறக்குறைய 60% கடன் சார்ந்த முதலீடுகளில் வரும் வருமானத்தைப் போலவும், எஞ்சியது பங்கு சார்ந்த முதலீட்டி லிருந்து வரும் வருமானத்தைப் போலவும் இருக்கும்.

ஐசிஐசிஐ புரூ பேலன்ஸ்டு அட்வான்டேஜ் ஃபண்ட் மேற்கூறிய கேட்டகிரியில் வராவிட்டாலும், ஏறக்குறைய நாம் மேலே கூறிய கருத்தில்தான் செயல்பட்டு வருகிறது.

இந்த ஃபண்ட் 35% வரை கடன் சார்ந்த உபகரணங்களில் முதலீடு செய்கிறது. எஞ்சியது ஈக்விட்டி மற்றும் ஈக்விட்டி டெரிவேட்டிவ்களில் முதலீடு செய்யப்படுகிறது.

அதே சமயத்தில், சந்தைகள் மிகவும் கீழிறங்கி இருந்தால், 80% வரை நேரடி பங்குகளில் முதலீடு செய்யவும் ஆப்ஷன் ஏற்படுத்திக் கொண்டு உள்ளது. தற்போது ஏறக்குறைய 33% கடன் சார்ந்த முதலீடுகளிலும், 51% பங்கு மற்றும் பங்கு சார்ந்த முதலீடுகளிலும், எஞ்சிய பணம் ரொக்கமாகவும் உள்ளது.

இந்த ஃபண்ட் ஆரம்பிக்கப் பட்டது டிசம்பர் 2006 -ம் ஆண்டு.  இந்த ஃபண்டின் முக்கிய நோக்கம், குறைந்த ஏற்ற இறக்கத்தில், சீரான வருமானத்தைத் தருவதாகும்.

பங்குச் சந்தை உச்சத்தில் இருக்கும்போது, இந்த ஃபண்ட் தனது பங்கு சார்ந்த விகிதத்தை குறைத்துக் கொள்ளும். அதேபோல், சந்தை கீழே இருக்கும்போது பங்கு சார்ந்த முதலீட்டை (அதிகபட்சம் 80% வரை) அதிகப்படுத்திக் கொள்ளும்.



இவ்வாறு மாற்றிக் கொள்வதற்கு, பி/பிவி (Price/ Book Value) விகிதத்தை உபயோகித்துக் கொள்கிறது. தினசரி அடிப்்படை யில் இந்த மாற்றம் நிகழ்கிறது. இந்தப் பண்பாட்டினால், சந்தை ஏறும்போது பிற பேலன்ஸ்டு ஃபண்டுகளைப் போல் ஏறாது. அதேபோல், சந்தை இறங்கும் போது பிற பேலன்ஸ்டு ஃபண்டுகளைப் போல் விழவும் செய்யாது.

தற்போது ரூ.8,000 கோடிக்கும் மேலான சொத்துக்களை நிர்வகித்து வருகிறது. இதன் ஃபண்ட் மேனேஜர்கள் மனீஷ் குன்வானி மற்றும் அஷ்வின் ஜெயின் ஆவார்கள்.

இந்த ஃபண்ட் மாதாந்திர டிவிடெண்ட் ஆப்ஷனையும் கொண்டுள்ளது. செப்டம்பர் 2013-லிருந்து ஒவ்வொரு மாதமும் டிவிடெண்ட்டை தொடர்ந்து வழங்கியுள்ளது.

காலாண்டு மற்றும் வருடாந்திர டிவிடெண்ட் ஆப்ஷன்களும் உள்ளது. வழங்கப்படும் டிவிடெண்ட் டாக்ஸ் ஃப்ரீ ஆகும்.

குறைவான ஏற்ற இறக்கத்தில் பங்கு சார்ந்த முதலீடுகளில் முதலீடு செய்ய விரும்புபவர்கள், நீண்ட கால டெபாசிட்டைவிட சற்று அதிக வருமானத்தை விரும்புபவர்கள், தொடர்ச்சி யான பணவரத்தை விரும்புபவர் கள், சற்று கூடுதல் ரிஸ்க்கில் டாக்ஸ் ஃப்ரீ வருமானத்தை விரும்புபவர்கள் போன்ற அனைவரும் இந்த ஃபண்டில் முதலீடு செய்யலாம்.





யாருக்கு உகந்தது?

மியூச்சுவல் ஃபண்டுகளில் முதன்முறை முதலீடு செய்ய விரும்புபவர்கள், பேலன்ஸ்டு ஃபண்டுகளைவிட சற்று குறைவான ரிஸ்க் எடுக்க விரும்பு பவர்கள், குறைவான ஏற்ற இறக்கத்தை நாடுபவர்கள், 50 வயதைத் தாண்டியவர்கள், மீடியம் டேர்மில் பணம் தேவைப் படுபவர்கள், நீண்ட கால டெபாசிட்டை நாடுபவர்கள், கேஷ் ஃப்ளோ தேவைப் படுபவர்கள் இதில் முதலீடு செய்யலாம்!

யார் முதலீடு செய்யக்கூடாது?

குறுகிய காலத்தில் பணம் தேவைப்படுபவர்கள், உறுதியான/ நிலையான வருமானத்தை விரும்புபவர்கள், ரிஸ்க் எடுக்கத் தயங்குபவர்கள், அதிக காலம் காத்திருக்க முடிந்த வர்கள், செல்வத்தை உண்டு பண்ண விரும்புபவர்கள் இதில் முதலீடு செய்யக் கூடாது!

சொக்கலிங்கம் பழனியப்பன்

ஃபண்ட் பரிந்துரை: பணம் அதிகம் உள்ளவர்களுக்கு பக்காவான ஃபண்ட்!

சொக்கலிங்கம் பழனியப்பன்

கடந்த இரண்டு வருடங்களில் (14.8.2013 – 14.8.2015) லார்ஜ் கேப் குறியீடான நிஃப்டி 50-ன் வருமானம் 48.36 சதவிகிதம் ஆகும். அதே காலகட்டத்தில் மிட் கேப் குறியீடான நிஃப்டி மிட் கேப்-50 84.66 சதவிகித வருமானத்தைக் கொடுத்துள்ளது. இந்த வருமான வித்தியாசம், லார்ஜ் கேப் மற்றும் மிட் கேப் ஃபண்டுகளிலும் எதிரொலித்துள்ளது. ஆகவே, பெரும்பாலான மிட் கேப் ஃபண்டுகள் லார்ஜ் கேப் ஃபண்டுகளைவிட வருமானத்தை அள்ளிக் கொடுத்திருக்கும்.



முதலீட்டாளர்கள் இந்த வித்தியாசத்தைக் கண்டு தங்களது முதலீடு அனைத்தையும் மிட் மற்றும் ஸ்மால் கேப் ஃபண்டுகளுக்கு மாற்றும் தவறைச் செய்யக்கூடாது. சந்தை வெகுவாக இறங்கும்போது இதுவே பாதகமாக முடிந்து விடவும் வாய்ப்பு உண்டு என்பதை மறந்துவிடக்கூடாது.

டி.எஸ்.பி – பி.ஆர் டாப் 100 ஃபண்ட் முழுக்க முழுக்க லார்ஜ் கேப் பங்குகளில் முதலீடு செய்யும் ஒரு லார்ஜ் கேப் ஃபண்டாகும். சுமார் 95 சதவிகித முதலீட்டை லார்ஜ் கேப் நிறுவனப் பங்குகளில் முதலீடு செய்துள்ளது.

எஞ்சியதை மிட்கேப் பங்குகளில் முதலீடு செய்துள்ளது. ஹெச்டிஎஃப்சி பேங்க், ஆக்ஸிஸ் பேங்க், டிசிஎஸ், ஹெச்பிசிஎல், எல் அண்ட் டி போன்ற பங்குகள் இதன் டாப் ஹோல்டிங்ஸாக உள்ளன. ஃபைனான்ஸ், எனர்ஜி மற்றும் ஆட்டோமொபைல் துறைகளில் ஓவர்வெயிட்டாக உள்ளது. டெக்னாலஜி, எஃப்எம்சிஜி மற்றும் ஹெல்த்கேர் துறைகளில் அண்டர் வெயிட்டாக உள்ளது.

இந்த ஃபண்ட் ஆரம்பித்த போது (மார்ச் 10, 2003) ஒருவர் செய்த முதலீடான ரூ.1 லட்சம், தற்போது (ஆகஸ்ட் 14, 2015) ரூ.16,44,620 ரூபாயாக உள்ளது. இது கூட்டு வட்டி அடிப்படையில் 25.25 சதவிகித ஆண்டு வருமானமாகும். லார்ஜ் கேப் ஃபண்டுக்கு இது ஒரு உன்னதமான வருமானமாகும்.

இந்த ஃபண்டின் பீட்டா 1.07 என்ற அளவில் உள்ளது. இது சந்தை உயரும்போது சற்று அதிகமாக உயருவதையும், சந்தை குறையும்போது சற்று அதிகமாகக் குறைவதையும் காண்பிக்கிறது. இதன் ஆல்ஃபா 0.76 என்ற அளவில் உள்ளது. இதையொத்த பிற ஃபண்டுகளுடன் ஒப்பிடும்போது இது சற்றுக் குறைவுதான்.



கடந்த 1, 3, 5 மற்றும் 10 வருடங்களில் நிஃப்டி 50-யைவிட 1.76 முதல் 7.17 சதவிகிதம் அதிக வருமானத்தைக் கொடுத்துள்ளது. அதேசமயத்தில் இதனுடைய கேட்டகிரி ஆவரேஜுடன் ஒப்பிடுகையில் கடந்த ஒன்று (1.85%) மற்றும் பத்து (3.73%) வருடங்களில் கூடுதல் வருமானம் தந்துள்ளது. மூன்று மற்றும் ஐந்து வருட காலத்தில் கேட்டகிரி ஆவரேஜை ஒட்டியே வருமானத்தைக் கொடுத்துள்ளது.



மேலும், கடந்த மாதம் வரை இதன் நெடுநாளைய ஃபண்ட மேனேஜரான அபூர்வ ஷா மாற்றப்பட்டுள்ளார். இதுவே நமது ‘ஹோல்ட்’ பரிந்துரைக்கு முக்கிய காரணம். தற்போது இதன் ஃபண்ட் மேனேஜராக ஹரீஷ் ஜவேரி பொறுப்பேற்றுள்ளார். இதற்கு முன்பு இவர் டி.எஸ்.பி – பி.ஆர் ஃபோக்கஸ்டு 25 ஃபண்டின் மேனேஜராக இருந்தார்.

லார்ஜ் கேப் ஃபண்டுகள் ஒவ்வொருவரின் போர்ட்ஃபோலியோவிலும் இருக்கவேண்டியது அவசியம். இதை ஒரு முழுமையான லார்ஜ் கேப் ஃபண்ட் எனக் கூறலாம். யூடிஐ ஆப்பர்சூனிட்டீஸ் மற்றும் ஃப்ராங்க்ளின் இந்தியா ப்ளூசிப் ஃபண்டுகள் இதே கேட்டகிரியில் வரும்.





பொதுவாக, முற்றிலுமாக லார்ஜ் கேப் பங்குகளை ஃபோக்கஸ் செய்யும் ஃபண்டுகள் கடந்த ஓரிரண்டு வருடங்களில் மிட் கேப் அல்லது லார்ஜ் + மிட் கேப் ஃபண்டுகளோடு ஒப்பிடும்போது சற்று குறைவான வருமானத்தைத்தான் கொடுத்திருக்கும். ஆனால், போர்ட்ஃபோலியோவுக்கு ஸ்திரத்தன்மையைத் தரவல்லது லார்ஜ் கேப் ஃபண்டுகள்தான். ஆகவே, ஏற்கெனவே இந்த ஃபண்டில் முதலீடு செய்துள்ளவர்கள், முதலீட்டை தொடர்ந்து வரலாம். ஃபண்ட் மேனேஜர் மாற்றப்பட்டுள்ளதால், புதிதாக இந்த ஃபண்டில் நுழைய விருப்பமுள்ளவர்கள் சற்று பொறுத்திருந்து நுழையலாம்.

யாருக்கு உகந்தது?

முதன்முறை முதலீடு செய்யும் இளம் முதலீட்டாளர்கள், அனைத்து வயதினர், பணம் அதிகம் உள்ளவர்கள், செல்வத்தைப் பெருக்க நினைப்பவர்கள், ரிஸ்க் எடுக்கக் கூடியவர்கள், பணம் உடனடித் தேவை இல்லாதவர்கள்.

யார் முதலீடு செய்யக்கூடாது?

குறுகிய காலத்தில் பணம் தேவைப்படுபவர்கள், உறுதியான/ நிலையான வருமானத்தை விரும்புபவர்கள், அதிக ரிஸ்க் எடுக்கத் தயங்குபவர்கள்.

ந.விகடன்

ஃபண்ட் பரிந்துரை: ஹெச்டிஎஃப்சி டேக்ஸ் சேவர் ஃபண்ட்: வருமான வரி விலக்கை எதிர்பார்ப்பவர்களுக்கு ஏற்ற ஃபண்ட்!

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

வேறு எந்த சொத்து வகைகளிலும் (ரியல் எஸ்டேட், தங்கம், ஃபிக்ஸட் டெபாசிட் உட்பட) ஒரு சாதாரண முதலீட்டாளர் 130 மடங்குக்கு மேல் வருமானத்தைக் கண்டிருக்க முடியாது என்பது கவனத்தில் கொள்ள வேண்டிய விஷயம்!

இந்த ஃபண்டில் செய்யும் முதலீட்டில் ஒரு ஆண்டுக்கு ரூ.1.50 லட்சம் வரைக்கும், 80சி பிரிவின் கீழ் வரிவிலக்கு கிடைக்கும்.

இந்த ஃபண்டில் செய்யும் முதலீடுகளை மூன்று வருடத்துக்கு வெளியில் எடுக்க முடியாது. அதாவது, இதில் செய்யப்படும் முதலீட்டுக்கு மூன்று ஆண்டுகள் லாக்-இன் ஆகும்.

இந்த ஃபண்ட் தனது போர்ட்ஃபோலியோவில் சுமார் 65 சதவிகிதத்தை லார்ஜ் கேப் பங்குகளிலும், எஞ்சியதை மிட் அண்ட் ஸ்மால் கேப் பங்குகளிலும் முதலீடு செய்துள்ளது. எஸ்பிஐ, இன்ஃபோசிஸ், ஐசிஐசிஐ பேங்க் போன்ற பங்குகள் இதன் டாப் ஹோல்டிங்ஸாக உள்ளன. சீமென்ஸ், சத்பவ் இன்ஜினீயரிங், சுந்தரம் ஃபாஸனர்ஸ், ஃபெடரல் பேங்க் போன்ற மிட் அண்ட் ஸ்மால் கேப் பங்குகளும் இதன் போர்ட்ஃபோலியோவில் இடம்பெற்றுள்ளன. இந்த ஃபண்ட் ஃபைனான்ஸ், எனர்ஜி மற்றும் டெக்னாலஜி துறைகளில் அண்டர்வெயிட்டாகவும், இன்ஜினீயரிங், கன்ஸ்ட்ரக்‌ஷன் மற்றும் மெட்டல்ஸ் துறைகளில் ஓவர்வெயிட்டாகவும் உள்ளது.



இதன் போர்ட்ஃபோலியோ வின் பீட்டா 1.12 என்ற அளவில் சந்தையைவிட சற்று அதிகமாகவும், ஆல்ஃபா 4.19 என்ற அளவில் நன்றாகவும் உள்ளது.

இந்த ஃபண்ட் ஆரம்பித்தபோது (மார்ச் 31, 1996) ஒருவர் செய்த முதலீடான ரூ.1 லட்சம், தற்போது (ஆகஸ்ட் 21, 2015) ரூ.1,30,11,593-ஆக உள்ளது. இது கூட்டு வட்டி அடிப்படையில் 28.52% ஆண்டு வருமானமாகும்.

1998 முதல் 2000 வரை குரோத் ஆப்ஷனில் இந்த ஃபண்ட் டிவிடெண்ட் கொடுத்துள்ளது. அவ்வாறு கொடுக்கப்பட்ட டிவிடெண்ட், அன்றைய தினத்தில் உள்ள என்ஏவியில் ரீஇன்வெஸ்ட்மென்ட் செய்யப் பட்டதாக இந்தக் கணக்குக்கு எடுத்துக் கொள்ளப்பட்டுள்ளது.

சில்லறை முதலீட்டாளர் களுக்கு இது ஒரு உன்னதமான வருமானமாகும். வேறு எந்த சொத்து வகைகளிலும் (ரியல் எஸ்டேட், தங்கம், ஃபிக்ஸட் டெபாசிட் உட்பட) ஒரு சாதாரண முதலீட்டாளர் இந்த அளவு (130 மடங்குக்கு மேல்) வருமானத்தைக் கண்டிருக்க முடியாது.

கடந்த 1, 3, 5 மற்றும் 10 வருடங்களில் நிஃப்டி 50-யைவிட, 2.11% - 7.06% அதிக வருமானத்தைக் கொடுத்துள்ளது. அதேசமயத்தில், இதனுடைய கேட்டகிரி ஆவரேஜுடன் ஒப்பிடுகையில், கடந்த பத்து (1.63%) வருடங்களில் அவுட்பெர்ஃபார்ம் செய்துள்ளது. ஒன்று, மூன்று மற்றும் ஐந்து வருட காலகட்டத்தில் கேட்டகிரி ஆவரேஜைக் காட்டிலும் குறைவான வருமானத்தையே கொடுத்துள்ளது.





கடந்த ஒரு வருட காலத்தில் ஏறக்குறைய 12% கேட்டகிரி ஆவரேஜைவிட குறைவாகவும், 3 மற்றும் 5 வருட காலகட்டத்தில் கேட்டகிரி ஆவரேஜைவிட 1% குறைவான வருமானத்தையும் கொடுத்துள்ளது. நீண்ட காலத்தில் நல்ல செயல்பாட்டை கொண்டிருந்தாலும், கடந்த 5 வருடங்களாக கேட்டகிரி ஆவரேஜைவிட குறைவான வருமானத்தைக் கொடுத்துள்ளது தான், நமது ‘ஹோல்ட்’ பரிந்துரைக்கு முக்கியக் காரணம்.

தவிர, சந்தையில் உள்ள இதுமாதிரியான பிற இஎல்எஸ்எஸ் ஃபண்டுகளுடன் (பிஎன்பி பரிபாஸ் லாங் டேர்ம் ஈக்விட்டி, ஃப்ராங்க்ளின் இந்தியா டாக்ஸ் ஷீல்ட், ஆக்ஸிஸ் லாங் டேர்ம் ஈக்விட்டி) ஒப்பிடும்போது இந்த ஃபண்டின் வருமானம் சற்று குறைவாகத்தான் உள்ளது.

ஆகவே, புதிதாக முதலீடு செய்ய விரும்புபவர்கள் இந்த ஃபண்டை தற்சமயத்தில் தவிர்க்கலாம். ஏற்கெனவே எஸ்ஐபி முறையில் முதலீடு செய்து வருபவர்கள், அதிக வருமானத்தை விரும்பும் பட்சத்தில் வேறு ஃபண்டுகளுக்கு மாறிக் கொள்ளலாம்.

ஏற்கெனவே முதலீடு செய்து லாக்-இன் காலம் முடிந்துவிட்டால், அதே ஃபண்ட் நிறுவனத்தில் நன்றாகச் செயல்பட்டு வரும் வேறு திட்டங்களுக்கு மாறிக் கொள்ளலாம்.



நேரம் இல்லாதவர்கள், சந்தையை ஒட்டிய வருமானம் போதும் என்று நினைப்பவர்கள் அல்லது இந்த ஃபண்டின் செயல்பாடு திரும்ப எழுந்துவரும் வரை காத்திருக்க முடிந்தவர்கள் இதே ஃபண்டிலேயே முதலீட்டை தொடர்ந்து வரலாம்.

யாருக்கு உகந்தது?

சம்பாத்தியம் ரூ.2 லட்சத்துக்கு மேல் இருந்து 80C பிரிவின் கீழ் வருமான வரி விலக்கை எதிர்பார்ப்பவர்கள். அவ்வாறு செய்யும் முதலீட்டில் ரிஸ்க் எடுத்து, அவ்வாறு எடுக்கும் ரிஸ்க்குக்கு ஏற்றாற்போல் வருமானத்தை எதிர்பார்ப்பவர்கள்.





யார் முதலீடு செய்யக்கூடாது?

80சி பிரிவின் கீழ் வருமான வரிச்சலுகை தேவைப் படாதவர்கள், ரிஸ்க் எடுக்க விருப்பமில்லாதவர்கள், உறுதியான/ நிலையான வருமானத்தை விரும்புபவர்கள், பங்குச் சந்தை ஏற்ற இறக்கம் குறித்து போதிய ஞானம் இல்லாதவர்கள்.

சொக்கலிங்கம் பழனியப்பன்

ஃபண்ட் பரிந்துரை: யூடிஐ மாஸ்டர் ஷேர்: மீடியம் ரிஸ்க் எடுக்கக்கூடியவர்களுக்கு ஏற்ற ஃபண்ட்!

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

கடந்த 10 வருடங்களாக அக்டோபர் அல்லது நவம்பர் மாதத்தில் இந்த ஃபண்ட் டிவிடெண்ட்டைவழங்கி உள்ளது. இதன் போர்ட்ஃபோலியோ எப்போதும் முழுவதுமாக முதலீட்டில் இருக்கும். தற்போது 98% பங்கு சார்ந்த முதலீட்டிலும், எஞ்சியது கேஷாகவும் உள்ளது.

யூ.டி.ஐ மாஸ்டர் ஷேர் அக்டோபர் 1986-ஆம் ஆண்டு துவங்கப்பட்ட திட்டமாகும். அந்தக் காலத்தில் இந்தத் திட்டம் சந்தையில் லிஸ்ட் செய்யப்பட்டு, பங்குகளைப் போல வர்த்தகமானது. அந்தக் காலத்தில் பிற மியூச்சுவல் ஃபண்ட் திட்டங்களைப் போல இந்தத் திட்டமும் என்.ஏ.வி-யைவிட அதிக விலையில் வர்த்தகம் ஆகியதும் உண்டு. இந்திய மியூச்சுவல் ஃபண்ட் உலகில் அதிக வயது உடைய ஒரு சில திட்டங்களில் இதுவும் ஒன்று.

இந்தத் திட்டம் துவங்கி 28 வருடங்களுக்கு மேல் ஆகிவிட்டது. இது ஒரு லார்ஜ்கேப் திட்டமாகும். தறபோது போர்ட்ஃபோலியோ வில் 84 சதவிகிதத்துக்கும் அதிக மாக லார்ஜ் கேப் பங்குகளிலும், எஞ்சியது மிட் கேப் பங்குகளிலும் முதலீடு செய்யப்பட்டுள்ளது.



இதன் ஃபண்ட் மேனேஜர் ஸ்வாதி குல்கர்னி ஆவார். ஃபண்ட் மேனேஜ்மென்ட் துறையில் இருக்கும் வெகுசில பெண்களில் இவரும் ஒருவர் ஆவார். இவர் இந்த ஃபண்ட் நிறுவனத்தில் ஏறக்குறைய 20 ஆண்டுகளாக பணியாற்றி வருகிறார். இந்த ஃபண்ட் தவிர, யூடிஐ எம்.என்.சி, யூடிஐ டாப் 100, யூடிஐ டிவிடெண்ட் ஈல்ட் போன்ற ஃபண்டுகளையும் நிர்வகித்து வருகிறார்.

இந்த ஃபண்டில் முதலீடு செய்யச் சொல்லி நாம் பரிந்துரை செய்வதன் முக்கியக் காரணம் என்ன?

முதற் காரணம், தொடர்ந்து கடந்த கால் நூற்றாண்டாக ஒவ்வொரு வருடமும் டிவிடெண்ட்டை வழங்கி வருகிறது இந்த ஃபண்ட். இரண்டாவது காரணம், லார்ஜ் கேப் பங்குகளை மட்டுமே ஃபோக்கஸ் செய்து கடந்த 10 வருடங்களாக இந்த ஃபண்ட் செயல்பட்டு வருகிறது. மூன்றாவது காரணம், இந்த ஃபண்டின் கன்ஸர்வேட்டிவ் செயல்முறை.



கடந்த காலங்களில் முதலீட்டாளர்களுக்கு ஏறக்குறைய 7 – 8% டிவிடெண்ட் ஈல்ட் கிடைக்கும் அளவுக்கு தொடர்ந்து டிவிடெண்ட் வழங்கியுள்ளது. ஆகவே, கேஷ் ஃப்ளோவை எதிர்பார்ப்பவர்கள், கடந்த கால செயல்பாட்டை வைத்துப் பார்க்கும்போது, இந்த ஃபண்டில் முதலீடு செய்யலாம்.

சந்தை ஏற்ற இறக்கத்துக்கு ஏற்றாற்போல் தனது லார்ஜ் கேப் – மிட் கேப் சதவிகிதத்தை பெரிய அளவில் மாற்றாமல், எப்போதும் லார்ஜ் கேப் ஃபோக்கஸாக இருப்பது கன்ஸர்வேட்டிவ் முதலீட்டாளர்களுக்கு அல்லது முதன்முறையாக சந்தையில் நுழைபவர்களுக்கு பெரிதும் ஏற்றதாக இருக்கும்.



இந்த ஃபண்டின் கன்ஸர்வேட்டிவ் செயல்முறை – உதாரணத்துக்கு ஒரு பங்கில் 8 சதவிகிதத்துக்கு மேல் செல்லாமல் இருப்பது, ஒரு துறையில் 30 சதவிகிதத்துக்கு மிகாமல் முதலீட்டை வைத்துக் கொள்வது, டாப் 10 பங்குகளில் 50 சதவிகிதத்துக்கு மேல் செல்லாமல் பார்த்துக் கொள்வது போன்ற செயல்பாடுகள் இந்த ஃபண்டை தொடர்ச்சியாக நல்ல செயல் பாட்டில் வைத்துக் கொள்கிறது.

அதீத வருமானத்தைக் கொடுப்பது இந்த ஃபண்டின் நோக்கமல்ல. நிலையான வருமானத்தைக் கொடுப்பதுதான் இந்த ஃபண்டின் தலையாய கொள்கையாக உள்ளது.



இதே ஃபண்ட் மேனேஜர் இந்த ஃபண்டை கடந்த 8 ஆண்டுகளுக்கும் மேலாக நிர்வாகம் செய்து வருவதும் ஒரு பாஸிட்டிவ் அம்சமாகும்.

இந்த ஃபண்ட் தற்போது சிமென்ட், கேப்பிட்டல் எக்யூப்மென்ட்ஸ், ஆட்டோ, கட்டுமானம் போன்ற துறைகளில் ஓவர்வெயிட்டாகவும், நிதி, எனர்ஜி, மெட்டல்ஸ் போன்ற துறைகளில் அண்டர் வெயிட்டாகவும் உள்ளது. ஐ.டி மற்றும் ஃபார்மா துறைகளில் நியூட்ரல்-ஆக உள்ளது.

ஃபண்ட் துவங்கியபோது (அக்டோபர் 18, 1986) ஒருவர் இந்தத் திட்டத்தில் செய்த முதலீடான ரூ.1 லட்சம், தற்போது ரூ.1,51,60,057-ஆக உள்ளது. இது கூட்டு வட்டி அடிப்படையில் ஆண்டுக்கு 18.99% வருமானம் ஆகும். இந்தக் கணக்குக்கு டிவிடெண்ட், போனஸ் போன்ற அனைத்தும் இதே திட்டத்தி லேயே மறுமுதலீடு செய்ததாக எடுத்துக் கொள்ளப்பட்டுள்ளது.

இந்த ஃபண்டின் பீட்டா சந்தையை ஒட்டி 0.98 என்ற அளவில் உள்ளது. ஆல்ஃபா 3.78 என்ற அளவில் உள்ளது. ஃபண்டின் டேர்னோவர் 23 சதவிகிதமாக உள்ளது.

கடந்த 10 வருடங்களாக அக்டோபர் அல்லது நவம்பர் மாதத்தில் இந்த ஃபண்ட் டிவிடெண்ட்டை வழங்கி உள்ளது. இதன் போர்ட் ஃபோலியோ எப்போதும் முழுவதுமாக முதலீட்டில் இருக்கும். தற்போது 98% பங்கு சார்ந்த முதலீட்டிலும், எஞ்சியது கேஷாகவும் உள்ளது.

நாம் ஏற்கனவே கூறியது போல, கன்ஸர்வேட்டிவ் முதலீட்டாளர்கள், முதன்முறை முதலீட்டாளர்கள், தொடர்ந்து பங்கு சார்ந்த திட்டங்களில் டேக்ஸ் ஃப்ரீ டிவிடெண்ட் எதிர்பார்ப்பவர்கள் போன்ற அனைவரும் இந்தத் திட்டத்தில் முதலீடு செய்யலாம்



யாருக்கு உகந்தது?

மியூச்சுவல் ஃபண்டுகளில் முதன்முறையாக முதலீடு செய்பவர்கள், கன்ஸர்வேட்டிவ் முதலீட்டாளர்கள், தொடர்ந்து டிவிடெண்டை எதிர்பார்ப்பவர்கள், அனைத்து வயதினர், பணம் அதிகம் உள்ளவர்கள், மீடியம் ரிஸ்க் எடுக்கக் கூடியவர்கள், பணம் உடனடித் தேவை இல்லாதவர்கள்.

யார் முதலீடு செய்யக்கூடாது?

குறுகிய காலத்தில் பணம் தேவைப்படுபவர்கள், உறுதி யான/ நிலையான வருமானத்தை விரும்புபவர்கள், அதிக ரிஸ்க் எடுக்கத் தயங்குபவர்கள்.

------------------------------------------------------------------------------------------------------------------------------------------------------------------------------------

ஃபண்ட் பரிந்துரை
சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்
எஸ்பிஐ மேக்னம் பேலன்ஸ்டு ஃபண்ட்: கல்வித் தேவைக்கு முதலீடு செய்ய கரெக்ட் ஃபண்ட்!

பேலன்ஸ்டு ஃபண்டுகள் கலப்பின வகையைச் சார்ந்தவையாகும். இந்த வகை ஃபண்டுகளில் பொதுவாக 65 - 70 சதவிகிதம் பங்கு சார்ந்த முதலீடும், எஞ்சியது கடன் சார்ந்த முதலீடுகளிலும் செய்யப்படுகிறது. இதற்கு முந்தைய வாரங்களில் ஹெச்டிஎஃப்சி பேலன்ஸ்டு ஃபண்ட், பி.எஸ்.எல் 95, டாடா பேலன்ஸ்டு, ஹெச்டிஎஃப்சி சில்ரன்ஸ் கிஃப்ட் ஃபண்ட் – இன்வெஸ்ட்மென்ட் பிளான், ஐசிஐசிஐ புரூ பேலன்ஸ்டு அட்வான்டேஜ் ஃபண்ட் போன்ற பேலன்ஸ்டு ஃபண்டுகளைப் பற்றி அலசினோம். அந்த வரிசையில் இந்த வாரம் எஸ்.பி.ஐ பேலன்ஸ்டு ஃபண்ட் பற்றி அலசுவோம்.

இந்த ஃபண்ட் கடந்த காலகட்டங்களில் தொடர்ந்து தனது கேட்டகிரி ஆவரேஜைவிட நன்றாக செயல்பட்டுள்ளதே நாம் இந்த ஃபண்டில் முதலீடு செய்யச் சொல்லி பரிந்துரைப்பதற்கு முக்கியக் காரணமாகும். இந்த ஃபண்ட் தற்போது ரூ.2,293 கோடி மதிப்புள்ள சொத்துக்களை நிர்வகித்து வருகிறது. இது டிசம்பர் 1995-ல் துவங்கப்பட்ட ஃபண்ட் ஆகும். இதன் ஃபண்ட் மேனேஜர்கள் ஆர்.சீனிவாசன் மற்றும் தினேஷ் அஹுஜா ஆவார்கள்.

இந்த ஃபண்ட் தற்போது 68 சதவிகிதத்தை பங்கு சார்ந்த முதலீடுகளிலும், எஞ்சியதை கடன் சார்ந்த முதலீடுகளிலும் கொண்டுள்ளது. பங்கு சார்ந்த முதலீடுகளில் ஏறக்குறைய பாதி அளவுக்கு லார்ஜ்கேப் பங்குகளிலும், மீதியை ஸ்மால் மற்றும் மிட்கேப் பங்குகளிலும் முதலீடு செய்துள்ளது.



கடன் சார்ந்த முதலீடுகளில் மிகுதியாக மத்திய அரசாங்க பாண்டுகளில்தான் முதலீடு செய்யப்பட்டுள்ளது. பங்கு சார்ந்த முதலீடுகளில் ஹெச்டிஎஃப்சி பேங்க், கோல் இந்தியா, டாடா மோட்டார்ஸ் டிவிஆர் போன்றவை டாப் ஹோல்டிங்ஸாக உள்ளன.

இந்த ஃபண்டின் பீட்டா 0.81-ஆக உள்ளது. இது சந்தையைவிட குறைவான ஏற்ற இறக்கத்தை குறிக்கிறது. அதே சமயத்தில், இந்த ஃபண்டின் ஆல்ஃபா 10.53 என்ற அளவில் மிகவும் உன்னதமாக உள்ளது.



நீண்ட காலத்தில் இதுபோன்ற பிற ஃபண்டுகளுடன் ஒப்பிடும்போது இதன் செயல்பாடு சற்று மெதுவாக இருந்தாலும், கடந்த 1, 2, மற்றும் 3 ஆண்டுகளில் இந்த ஃபண்டின் வருமானம் டாப்பில் உள்ளது.

இதற்கு முக்கியக் காரணம், இதன் பங்கு சார்ந்த முதலீடுகளின் ஃபண்ட் மேனேஜரான ஆர்.சீனிவாசன் எனக் கூறலாம். அவர் இந்த ஃபண்டின் மேனேஜராக ஜனவரி 2012-ல் பொறுப்பேற்றார். அப்போதிருந்து இந்த ஃபண்டின் செயல்பாட்டில் வேகம் பிடித்துள்ளது. மேலும், மிட் அண்ட் ஸ்மால்கேப் எக்ஸ்போஸர் இந்த ஃபண்டுக்கு நல்ல வருமானத்தைக் கொடுத்துள்ளது.



இதன் டிவிடெண்ட் ஆப்ஷனின் என்.ஏ.வி ரூ.27.35 ஆகும். கடந்த மார்ச் 2013-லிருந்து ஒவ்வொரு காலாண்டும் தொடர்ந்து டிவிடெண்ட்டை வழங்கி வந்துள்ளது. டிவிடெண்ட்டை விரும்புபவர்கள் இந்த ஆப்ஷனில் செல்லலாம்.

சந்தையைவிட சற்று குறைவான ரிஸ்க்கை எடுக்க விரும்புபவர்கள், குழந்தைகளின் கல்லூரி படிப்புக்கு முதலீடு செய்ய விரும்புபவர்கள், பங்கு சார்ந்த மியூச்சுவல் ஃபண்டுகளில் முதன்முறை முதலீடு செய்பவர்கள் போன்ற அனைவரும் இந்த ஃபண்டில் முதலீடு செய்யலாம்.

யார் முதலீடு செய்யலாம்?

மியூச்சுவல் ஃபண்டுகளில் முதன்முறை முதலீடு செய்ய விரும்புபவர்கள், 100% ஈக்விட்டி ஃபண்டுகளைவிட சற்று குறைவான ரிஸ்க் எடுக்க விரும்புபவர்கள், சற்று குறைவான ஏற்ற இறக்கத்தை நாடுபவர்கள், 50 வயதைத் தாண்டியவர்கள், நடுத்தர காலத்தில் பணம் தேவைப்படுபவர்கள், குழந்தைகளின் கல்வித் தேவைக்கு முதலீடு செய்பவர்கள்.



யார் செய்யக் கூடாது?

குறுகிய காலத்தில் பணம் தேவைப்படுபவர்கள், உறுதியான/ நிலையான வருமானத்தை விரும்புபவர்கள், ரிஸ்க் எடுக்கத் தயங்குபவர்கள்.

ஃபண்ட் பரிந்துரை
சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்
எல் அண்ட் டி இந்தியா வேல்யூ ஃபண்ட்: இளம் வயதினருக்கு ஏற்ற ஃபண்ட்!

எல் அண்ட் டி இந்தியா வேல்யூ ஃபண்ட் ஒரு மல்ட்டி கேப் ஃபண்டாகும். ஜனவரி 2010-ல்ஆரம்பிக்கப்பட்ட இந்தத் திட்டம் தற்போது ரூ.362 கோடி மதிப்புள்ள சொத்துக்களை நிர்வகித்து வருகிறது. இதன் ஃபண்ட் மேனேஜர்கள் வேணுகோபால் மங்கத் மற்றும் அபிஜித் தக்‌ஷிகர் ஆவார்கள்.

இந்த ஃபண்ட் ஆரம்பித்த போது ஒருவர் செய்த முதலீடான ரூ.1 லட்சம், தற்போது ரூ,2,39,500-ஆக உள்ளது. இது சிஏஜிஆர் அடிப்படையில் ஆண்டுக்கு 16.63% வருமானமாகும்.

கடந்த 1, 3 மற்றும் 5 வருடங்களில் நிஃப்டி 50 குறியீட்டையும், கேட்டகிரி ஆவரேஜையும்விட அதிக லாபம் தந்துள்ளது. உதாரணத்துக்கு, கடந்த 5 வருடங்களில் இதன் கேட்டகிரி ஆவரேஜின் வருமானம் 9.50% ஆகும். அதே சமயத்தில் இந்த ஃபண்டின் வருமானம் 15.09% ஆகும்.

இந்த ஃபண்ட் தற்போது 35 சதவிகிதத்தை லார்ஜ் கேப் பங்குகளிலும், மீதியை மிட் அண்ட் ஸ்மால் கேப் பங்கு களிலும் முதலீடு செய்துள்ளது. சந்தையின் போக்கைப் பொறுத்து, இந்த அலோகேஷனை மாற்றிக்கொள்கிறது.



மிட் அண்ட் ஸ்மால் கேப் ஃபண்டுகளில் அதிகமாக முதலீடு செய்துள்ளதால், தனது ரிஸ்க்கை குறைப்பதற்காக 83 பங்குகளை போர்ட்ஃபோலியோவில் வைத்துள்ளது.

இந்த ஃபண்ட் வேல்யூ அடிப்படையில் தனது முதலீட்டை மேற்கொள்கிறது. உள்ளார்ந்த மதிப்பைவிட குறைவான விலையில் கிடைக்கும் பங்குகளை தனது போர்ட்ஃபோலியோவுக்கு தேர்வு செய்கிறது. ஆகவே, இதன் போர்ட்ஃபோலியோ பி/இ 17.15 என்ற அளவில் குறைவாக உள்ளது.



இதன் போர்ட்ஃபோலியோ வில் டாப் 10 பங்குகளின் வெயிட் ஏறக்குறைய 27 சதவிகிதமாக உள்ளது. பல லார்ஜ்கேப் ஃபண்டு களின் டாப் 10 ஹோல்டிங்ஸின் வெயிட் 40 - 50% வரை இருக்கும். போர்ட்ஃபோலியோவில் 5 சதவிகிதத்துக்கு அதிகமாக ஒரு பங்குகூட இல்லை.

டாப் ஹோல்டிங்ஸாக இன்ஃபோஸிஸ், ஐசிஐசிஐ பேங்க், ஹெச்பிசிஎல், யூபிஎல், ஆக்ஸிஸ் பேங்க் போன்றவை உள்ளன. டிவிஎஸ் ஸ்ரீசக்ரா, வர்தமான் டெக்ஸ்டைல்ஸ், ஃபெடரல் பேங்க், கேப்ரியல் இந்தியா போன்ற சிறிய மற்றும் நடுத்தர பங்குகளும் இதன் போர்ட்ஃபோலியோவில் இடம்பெற்றுள்ளன.



இந்த ஃபண்டின் பீட்டா சந்தையையொட்டி 1.02 என்ற அளவில் உள்ளது. அதே சமயத்தில் ஃபண்டின் ஆல்ஃபா 14.61 என்ற அளவில் மிகவும் உன்னதமாக உள்ளது. சந்தை ஏறும்போது இந்த ஃபண்டின் ஏற்றம் நன்றாக இருக்கும்; அதே சமயத்தில் சந்தை இறங்கும்போது,

இந்த ஃபண்ட் சந்தையைவிட சற்று அதிகமாக கீழே செல்லவும் வாய்ப்பிருக்கிறது. ஆகவே, இந்த ஃபண்ட் நீண்ட கால நோக்கில் அதிக வருமானத்தை எதிர்பார்ப்பவர்களுக்கு கச்சிதமாக பொருந்தும்.



இந்த ஃபண்ட் தற்போது ஃபைனான்ஸ், எனர்ஜி, டெக்னாலஜி, எஃப்எம்சிஜி போன்ற துறைகளில் அண்டர்வெயிட்டாகவும், கன்ஸ்ட்ரக்‌ஷன், கெமிக்கல்ஸ், இன்ஜினீயரிங், சர்வீசஸ் துறைகளில் ஓவர்வெயிட்டாகவும் உள்ளது.

இளம் வயதினர், ஹை ரிஸ்க்குடன்கூடிய ஹை ரிவார்ட்டை எதிர்பார்ப்பவர்கள், பணத்தைப் பெருக்க நினைப்பவர்கள் போன்ற அனைவரும் இந்த ஃபண்டில் முதலீடு செய்யலாம்.

யாருக்கு உகந்தது?

இளம் வயதினர், பணம் அதிகம் உள்ளவர்கள், செல்வத்தை பெருக்க நினைப்பவர்கள், அதிக ரிஸ்க் எடுக்கக் கூடியவர்கள், பணம் உடனடித் தேவை இல்லாதவர்கள்.



யார் முதலீடு செய்யக்கூடாது?

குறுகிய காலத்தில் பணம் தேவைப்படுபவர்கள், உறுதியான/ நிலையான வருமானத்தை விரும்புபவர்கள், ரிஸ்க் எடுக்கத் தயங்குபவர்கள்.

ஃபண்ட் பரிந்துரை
சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

பிர்லா சன் லைஃப் மீடியம் டேர்ம் பிளான்: அதிக வரி வரம்பில் இருப்பவர்களுக்கு ஏற்ற ஃபண்ட்!

கடன் சார்ந்த ஃபண்ட் திட்டமான பிர்லா சன்லைஃப் மீடியம் டேர்ம் பிளான் குறித்து இந்த வாரம் காண்போம். 3 வருடம் மற்றும் அதற்கு மேல் உள்ள காலகட்டத்துக்கு ஃபிக்ஸட் டெபாசிட்டில் முதலீடு செய்ய விரும்பும் முதலீட்டாளர்கள் இந்த ஃபண்டில் முதலீடு செய்யலாம்.

வட்டி விகிதங்கள் இறங்கிக் கொண்டிருக்கும் இந்த கால கட்டத்தில், எஃப்டியைவிட சற்று கூடுதல் வருமானம் இந்த ஃபண்டில் கிடைக்க வாய்ப்புள்ளது. பணவீக்கத்தை அட்ஜஸ்ட் செய்தபிறகு வருமான வரி கணக்கிடப்படுவதால், வரியும் மிகக் குறைவாகத்தான் செலுத்த வேண்டியிருக்கும். தவிர, எஃப்டியுடன் ஒப்பிடும்போது கடன் சார்ந்த மியூச்சுவல் ஃபண்டுகளில் ரிஸ்க் குறைவு.



உத்தரவாதமாக வருமானத்தை பெற விரும்புகிறவர்கள் இந்த ஃபண்டில் முதலீடு செய்ய வேண்டாம். அல்ட்ரா கன்ஸர்வேட்டிவ் முதலீட்டாளர்கள், இந்த ஃபண்டை தவிர்த்து, போர்ட்ஃபோலியோவில் அதிகமாக AAA ரேட்டிங் கொண்ட உபகரணங்களைக் கொண்ட ஃபண்டுகளாகப் பார்த்து முதலீடு செய்வது நன்று.

இது கிரெடிட் ஆப்பர்ச்சூனிட்டீஸ் ஃபண்ட வகையைச் சார்ந்த ஃபண்டாகும். இந்த ஃபண்ட் பெரும்பாலும் ஆவரேஜ் கிரெடிட் ரேட்டிங் கொண்ட கார்ப்பரேட் கடன் பத்திரங்களிலேயே முதலீடு செய்கிறது. இந்த ஃபண்ட் AA மற்றும் அதற்குக் கீழ் ரேட்டிங் உடைய, அதே சமயத்தில் அதிக யீல்டு தரக்கூடிய கார்ப்பரேட் பாண்டுகளில் அதிக அளவில் முதலீடு செய்து, அதிக வருமானத்தை முதலீட்டாளர்களுக்கு ஈட்டிக் கொடுக்கிறது.

இந்த ஃபண்டின் போர்ட்ஃபோலியோவில் AAA ரேட்டிங் கொண்ட பாண்டுகள் மற்றும் அரசாங்க பாண்டுகள் சுமார் 24% உள்ளது. AA ரேட்டிங் கொண்ட பாண்டுகள் சுமார் 35% உள்ளது. எஞ்சியது அதற்கு கீழ் ரேட்டிங் கொண்ட பாண்டுகளாகவும், கேஷாகவும் உள்ளது.

தற்போது ரூ.4,374 கோடி மதிப்புள்ள சொத்துக்களை நிர்வகித்து வருகிறது. கடந்த 1, 3 மற்றும் 5 வருடங்களில் இதன் கேட்டகிரியைவிட ஆண்டுக்கு 1.30% - 1.60% அதிக வருமானத்தைத் தந்துள்ளது.

இசிஎல் ஃபைனான்ஸ், அதானி பவர், டிரஷரி பில்ஸ், ஆர்கேஎன் ரீடெய்ல் மற்றும் ஆர்ஹெச்சி ஹோல்டிங்ஸ் ஆகிய நிறுவனப் பத்திரங்களில் 5 சதவிகிதத்துக்கும் அதிகமான ஹோல்டிங்ஸை வைத்துள்ளது.



இந்த ஃபண்டின் சராசரி முதிர்வு காலம் சற்று அதிகம் என்பதால், முதலீடு செய்த ஒரு வருடத்துக்குள் வெளியேறினால் 2 சதவிகிதமும், 1 – 2 வருடத்துக் குள் வெளியேறினால் 1% வெளியேற்றுக் கட்டணமாக வசூலிக்கப்படுகிறது.

இந்தத் திட்டத்தில் முதலீடு செய்பவர்கள் தங்களது முதலீட்டுக் காலத்தை குறைந்தது மூன்று ஆண்டுகளுக்கு மேலாக வைத்துக்கொள்வது நல்லது. மூன்று ஆண்டுகளுக்குள் வெளியேறும்போது, வரும் வருமானத்துக்கு, அவரவர் வருமான வரி வரம்பில் வரி கட்ட வேண்டிவரும். அதுவே மூன்று வருடத்துக்கு மேல் ஆகும்போது, நீண்ட கால கேப்பிட்டல் கெயின்ஸ் டாக்ஸ் உரித்தாகும். அது தற்போது, பணவீக்கத்துக்கு அட்ஜஸ்ட் செய்தபிறகு 20% ஆகும். அப்படி செலுத்தும்போது வருமான வரி மிகவும் சொற்பமாகவே வரும். ஆகவே, வருமான வரியின் உச்ச வரம்பில் இருப்பவர்களுக்கு, எஃப்டியுடன் ஒப்பிடும்போது, இந்த ஃபண்ட் ஒரு வரப்பிரசாதம்.

இந்த ஃபண்டில் டிவிடெண்ட் ஆப்ஷனும் உள்ளது. அதைவிட குரோத் ஆப்ஷனில் சென்று விட்டு, மூன்று ஆண்டுகள் கழித்து எஸ்டபிள்யூபி (SWP – Systematic Withdrawal Plan) முறை மூலம் மாதம்தோறும் அல்லது குறிப்பிட்ட இடைவெளிகளில் பணத்தை எடுத்துக்கொள்ளும் போது, வருமான வரி மிகவும் குறைவாக இருக்கும்.





ஆர்டிக்கு பதிலாக, எஸ்ஐபி முறையிலும் இந்த ஃபண்டில் சிறு முதலீட்டாளர்கள் தாராள மாக முதலீடு செய்யலாம். இந்த ஃபண்ட் போர்ட்ஃபோலியோ வில் கடன் சார்ந்த ஒதுக்கீட்டை நாடுபவர்களுக்கு சிறப்பான முதலீடாக அமையும்.

யாருக்கு உகந்தது?

பங்குச் சந்தை ரிஸ்க்கை எடுக்க விரும்பாதவர்கள், அதிக வரி வரம்பில் இருப்பவர்கள், வரிக்கு பிந்தைய வருமானத்தை அதிகமாக எதிர்பார்ப்பவர்கள், ஓய்வுக்காலத்தில் இருப்பவர்கள், செல்வத்தில் எக்காரணம் கொண்டும் தேய்மானத்தை விரும்பாதவர்கள், பணம் உடனடித் தேவை இல்லாதவர் கள், நடுத்தர காலத்தில் எஃப்டிக்கு நிகரான வருமானம் வேண்டும்போது எடுத்துக் கொள்ளும் வசதியை விரும்பு பவர்கள், எஃப்டியை அடிக்கடி புதுப்பிக்க விரும்பாதவர்கள்.

யார் முதலீடு செய்யக்கூடாது?

நீண்ட காலம் கழித்தே பணம் தேவைப்படுபவர்கள், குறிப்பிட்ட இடைவெளிகளில் உறுதியான/ நிலையான வருமானத்தை விரும்புபவர்கள், பங்குச் சந்தை ரிஸ்க்கை எடுக்க முடிந்தவர்கள்.

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

ஃப்ராங்க்ளின் இந்தியா ஸ்மாலர் கம்பெனீஸ் ஃபண்ட்: செல்வத்தைப் பெருக்க நினைப்பவர்களுக்கு ஏற்ற ஃபண்ட்!



ஃப்ராங்க்ளின் இந்தியா ஸ்மாலர் கம்பெனீஸ் ஃபண்ட், சிறிய நிறுவனப் பங்குகளில் முதலீடுசெய்யக்கூடிய ஃபண்டாகும். ஆனால், எதை சிறிய நிறுவனம் என்று எடுத்துக்கொள்வது?

இந்த ஃபண்டின் வரையறைப்படி, சிஎன்எக்ஸ் 500-ல் (இந்தியாவில் பங்குச் சந்தையில் 93 சதவிகித வர்த்தகம் இந்த 500 பங்குகளிலேயே நடக்கின்றன) உள்ள பங்குகளை சந்தை மதிப்பின்படி வரிசைப் படுத்தினால் வரக்கூடிய பட்டியலில், முதல் பெரிய 100 நிறுவனப் பங்குகளை பெரிய நிறுவனங்கள் என இந்த ஃபண்ட் எடுத்துக் கொள்கிறது. அதாவது, 101 முதல் 500 வரை இருக்கும் பங்குகளை சிறிய நிறுவனங்கள் என இந்த ஃபண்ட் வரையறுத்துள்ளது. அந்த 400 பங்குகளுக்குள்ளேயே தனது முதலீட்டை வைத்துக்கொள்கிறது இந்த ஃபண்ட்.

இந்த ஃபண்ட் ஆரம்பிக்கப்பட்டபோது (ஜனவரி 13, 2006) ஒரு குளோஸ் எண்டட் திட்டமாகத்தான் அறிமுகப்படுத்தப் பட்டது. 5 வருடங்கள் கழித்து (ஜனவரி 14, 2011) இந்த ஃபண்ட் ஓப்பன் எண்டட் திட்டமாக மாற்றப்பட்டது. இந்த ஃபண்டில் ஏறக்குறைய 85% மிட் மற்றும் ஸ்மால் கேப் நிறுவனப் பங்குகளிலும், மீதம் லார்ஜ் கேப் நிறுவனப் பங்குகளிலும் முதலீடு செய்யப்பட்டுள்ளது. அதிவேக வளர்ச்சியுடைய சிறிய நிறுவனப் பங்குகளை, இந்த ஃபண்ட் தனது போர்ட்ஃபோலியோவில் சேர்க்கிறது. ஆகவே, அதிக ரிஸ்க் மற்றும் ரிவார்டை எதிர்பார்ப்பவர்களுக்கே இந்த ஃபண்ட் பொருந்தும்.

இதன் தற்போதைய ஃபண்ட் மேனேஜர்கள் ஆர்.ஜானகிராமன் மற்றும் ரோஷி ஜெயின் ஆவார்கள். 2008-ம் ஆண்டிலிருந்து ஜானகிராமன் இதன் ஃபண்ட் மேனேஜராக உள்ளார். ரோஷி ஜெயின் 2014-ம் ஆண்டிலிருந்து ஃபண்டின் கூடுதல் மேனேஜராக உள்ளார்.



இந்த ஃபண்ட் தற்போது ரூ.2,400 கோடிக்கும் மேலான சொத்துக்களை நிர்வகித்து வருகிறது. இந்த ஃபண்டை நாம் பரிந்துரைக்கு எடுத்துக் கொண்டதின் முக்கிய காரணம், இதன் உன்னதமான வருமானம்தான். மேலும், ஆர். ஜானகிராமன் ஒரு கைதேர்ந்த ஃபண்ட் மேனேஜர். கூடுதலாக, ஃப்ராங்க்ளின் நிறுவனம் நல்ல செயல் முறையைக் கொண்டுள்ள ஃபண்ட் நிறுவனம். கடந்த 1, 3, 5, மற்றும் 7 வருட கால கட்டங்களில் 1.43% - 9.12% வரை கேட்டகிரி ஆவரேஜைவிட அதிக வருமானம் ஈட்டித் தந்துள்ளது. மேலும், இதன் ஆல்ஃபா 20.04 என்ற அளவில் மிக உன்னதமாகவும், இதன் பீட்டா சந்தையை ஒட்டி 0.97 என்ற அளவிலும் உள்ளது. போர்ட்ஃபோலியோவில் ஏறக்குறைய 70 பங்குகள் உள்ளதால், எந்த பங்கும் 3.50 சதவிகிதத்துக்கு அதிகமாக இல்லை. இந்த ஃபண்ட் வைத்தி ருக்கும் பங்குகளின் ஆவரேஜ் சந்தை மதிப்பு ரூ.5,328 கோடியாகும்.



பொதுவாக, லார்ஜ் கேப் மற்றும் மல்ட்டி கேப் மியூச்சுவல் ஃபண்டுகளின் போர்ட் ஃபோலியோக்களில், ஒரே மாதிரியான பங்குகளையே பார்ப்போம். இங்கு ஃபினோலெக்ஸ் கேபிள்ஸ், ரெப்கோ ஹோம் ஃபைனான்ஸ், அதுல், கிரீவ்ஸ் காட்டன், சியண்ட், ஜே.கே.லெக்சுமி சிமென்ட், நவ்நீத் எஜுகேஷன், எம்எம் ஃபோர்ஜிங்ஸ் போன்ற பல வித்தியாசமான பங்குகளை பார்க்கலாம். இந்த ஃபண்ட் இன்ஜினீயரிங், சர்வீசஸ், கன்ஸ்ட்ரக்‌ஷன், கெமிக்கல்ஸ், மெட்டல்ஸ் போன்ற துறைகளில் ஓவர்வெயிட்டாகவும், ஃபைனான்ஸ், டெக்னாலஜி, ஆட்டோமொபைல் போன்ற துறைகளில் அண்டர்வெயிட் டாகவும் உள்ளது. பங்குகளில் ஏறக்குறைய 92 சதவிகித முதலீடும், எஞ்சியது கேஷாகவும் உள்ளது.



ஆரம்பித்த சில வருடங்களுக்கு இந்த ஃபண்டின் செயல்பாடு சற்று சுமாராகத்தான் இருந்தது. இந்த ஃபண்டின் பெஞ்ச்மார்க்கான சி.என்.எக்ஸ் மிட்கேப் குறியீட்டுடன் ஒப்பிடும்போது 2007, 2008 மற்றும் 2010-ம் வருடங்களில் அண்டர் பெர்ஃபார்ம் செய்துள்ளது. இருந்தபோதிலும் கடந்த 5 வருடங்களாக தொடர்ச்சியாக தனது பெஞ்ச்மார்க்கை அவுட் பெர்ஃபார்ம் செய்துள்ளது.

இந்த ஃபண்ட் துவங்கியபோது (ஜனவரி 13, 2006) ஒருவர் செய்த முதலீடான ரூ.1 லட்சம், தற்போது ரூ.3,80,430-ஆக உள்ளது. இது சிஏஜிஆர் அடிப்படையில் 14.77% வருமானமாகும்.

பல நல்ல அம்சங்களைக் கொண்ட இந்த ஃபண்டில், ஹைரிஸ்க் எடுக்க விரும்பும் முதலீட்டாளர்கள் முதலீடு செய்யலாம்.



யாருக்கு உகந்தது?

இளம் வயதினர், பணம் அதிகம் உள்ளவர்கள், செல்வத்தைப் பெருக்க நினைப்பவர்கள், அதிக ரிஸ்க் எடுக்கக்கூடியவர்கள், பணம் உடனடித் தேவை இல்லாதவர்கள்.

யார் முதலீடு செய்யக்கூடாது?

குறுகிய காலத்தில் பணம் தேவைப்படுபவர்கள், உறுதியான/ நிலையான வருமானத்தை விரும்புபவர்கள், அதிக ரிஸ்க் எடுக்கத் தயங்குபவர்கள்.

ஃபண்ட் பரிந்துரை

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

டாடா ஃப்ளோட்டர் ஃபண்ட்: அவசரத் தேவைக்கு ஏற்ற ஃபண்ட்!


அல்ட்ரா ஷார்ட் டேர்ம் ஃபண்ட் வகையைச் சார்ந்த டாடா ஃப்ளோட்டர் ஃபண்ட் குறித்து இந்த வாரம் பார்ப்போம்.

இந்த ஃபண்ட் செப்டம்பர் 2005-ல் துவங்கப்பட்டது. தற்போது கிட்டத்தட்ட ரூ.3,500 கோடி மதிப்புள்ள சொத்துக்களை நிர்வகித்து வருகிறது. இதன் தற்போதைய ஃபண்ட் மேனேஜர் அகில் மிட்டல் ஆவார். இவர் ஜூன் 2014-லிருந்து இந்த ஃபண்டை மேலாண்மை செய்து வருகிறார்.

நம்மில் பலர் ஒரு பாதுகாப் பான உணர்வு கிடைப்பதற்காக, பெரிய தொகைகளை வங்கி சேமிப்புக் கணக்கில் குறைந்த வட்டியில் (வருடத்துக்கு 4%) பல மாதங்களுக்குப் போட்டு வைக்கிறோம். அதுபோல் குழந்தைகளுக்கு பள்ளிக் கட்டணம் கட்டுவதற்கு அல்லது இன்ஷூரன்ஸ் பிரீமியம் செலுத்துவதற்கு என வங்கி சேமிப்புக் கணக்கிலேயே விட்டு வைக்கிறோம். அல்லது மகன்/ மகள் திருமணம் எப்போது வேண்டுமானாலும் நடக்கலாம் என்ற எண்ணத்தில் அந்த சேமிப்புக் கணக்கிலேயே பணத்தை விட்டுவைக்கிறோம். இன்னும் சிலர் ஷார்ட் டேர்ம் வங்கி டெபாசிட்டுகளில் போட்டுவைக்கிறோம்.

இவை எல்லாவற்றையும்விட, சற்று அதிக வருமானம் கிடைக்கக்கூடிய திட்டம்தான் அல்ட்ரா ஷார்ட் டேர்ம் வகையைச் சார்ந்த டாடா ஃப்ளோட்டர் ஃபண்ட். இத்திட்டம் மற்றும் இதுபோன்ற திட்டங்களில் உள்ள பெரிய சௌகரியம்: சேமிப்புக் கணக்கைப்போல எப்போது வேண்டுமானாலும் அபராதக் கட்டணம் ஏதும் இல்லாமல் பணத்தை எடுத்துக் கொள்ளும் வசதி; அதே சமயத்தில் சேமிப்புக் கணக்கைப் போல கிட்டத்தட்ட இரண்டு மடங்கு வருமானம் கிடைக்கும்.



இந்த ஃபண்டில் உள்ள உபகரணங்களின் சராசரி முதிர்ச்சிக் காலம் 0.83 ஆண்டுகள் (303 நாட்கள்) ஆகும். இதன் போர்ட்ஃபோலியோவில் உள்ள உபகரணங்களில் 1 – 3 மாத கால மெச்சூரிட்டியுடன் 26 சதவிகித மும், 3 6 மாத கால மெச்சூரிட்டி யுடன் 14 சதவிகிதமும், 6 - 12 மாத கால மெச்சூரிட்டியுடன் 46 சதவிகிதமும், மற்றவை அதற்கு மேல் உள்ள மெச்சூரிட்டியுடனும் உள்ளன.

அதே போல் இந்த ஃபண்டில் உள்ள உபகரணங்களின் ஆவரேஜ் கிரெடிட் ரேட்டிங் AAA ஆகும். இந்த ரேட்டிங் மிக மிக பாதுகாப்பான உபகரணங் களைக் கொண்டுள்ளது என் பதைக் குறிக்கும். 82% உபகரணங் கள் A1+ / AAA ரேட்டிங் உடனும், 9% உபகரணங்கள் AA+ / AA ரேட்டிங் உடனும் எஞ்சியது கேஷிற்குச் சமமான முதலீடா கவும் உள்ளது.



இந்த ஃபண்டின் டாப் முதலீடுகள் ஹெச்டிஎஃப்சி பேங்க் சி.டி. (6.48%), மத்திய ரிசர்வ் வங்கி டிரஷரி பில்ஸ் (4.40%) மற்றும் கனரா பேங்க் சிடி (3.47%) ஆகும். மீதி இருக்கும் 67 உபகரணங்கள் ஒவ்வொன்றிலும் முதலீடு 3 சதவிகிதத்துக்கும் குறைவாகவே உள்ளது. கடந்த 1, 3, மற்றும் 5 வருடங்களில் கேட்டகிரி ஆவரேஜைத் தாண்டி வருமானம் தந்துள்ளது.

இந்த ஃபண்டில் முதலீடு செய்யும்போது சிறு முதலீட்டாளர்கள் குரோத் ஆப்ஷனில் செல்லலாம். குரோத் ஆப்ஷன் தவிர, தினசரி டிவிடெண்ட், வாராந்திர டிவிடெண்ட், ரெகுலர் டிவிடெண்ட் என பலவித ஆப்ஷன்கள் உள்ளது.

ஆனால் டிவிடெண்ட் ஆப்ஷனில் செல்லும்போது, 28.84% (தனி நபர்கள்) அல்லது 34.608% (கம்பெனிகள்) டிவிடெண்ட் டிஸ்ட்ரிபியூஷன் வரியை பிடித்துக் கொண்டுதான் மியூச்சுவல் ஃபண்ட் நிறுவனங்கள் டிவிடெண்டை தரும் என்பதைக் கவனத்தில் கொள்வது நல்லது. இதுபோன்ற ஃபண்டுகளில் முதலீடு செய்யும் போது என்ஆர்ஐ முதலீட்டாளர் களுக்கு மூலத்தில் உரிய வரி பிடித்தம் செய்யப்படும்.

இத்திட்டத்தில் நுழைவுக் கட்டணமோ அல்லது வெளியேற்றுக் கட்டணமோ இல்லை. போட்ட சில நாட்களிலேயே பணத்தை எடுத்துக்கொள்ளலாம் அல்லது எவ்வளவு காலம் வேண்டுமானா லும் விட்டு வைக்கலாம்.



சில தினங்கள் அல்லது மிகக் குறுகிய காலத் தேவைகளுக்கு வருபவர்கள் இந்தத் திட்டத்தில் முதலீடு செய்ய வேண்டாம். குறைந்தது மூன்று மாதங்களுக் காவது தேவைப்படாத பணத்தை இந்தத் திட்டத்தில் தாராளமாக முதலீடு செய்யலாம். தேவைப்படும்போது மொத்தமாகவோ அல்லது பகுதியாகவோ எடுத்துக் கொள்ளலாம்.

இத்திட்டத்தில் குறைந்தபட்ச மொத்த முதலீடு ரூ.5,000 ஆகும். குறைந்தபட்ச எஸ்ஐபி முதலீடு ரூ.500 ஆகும். ஆகவே சிறு முதலீட்டாளர்களுக்கு இது ஒரு கச்சிதமான முதலீட்டு வாய்ப்பாகும்.

எஸ்ஐபி மற்றும் மொத்த முதலீட்டை இத்திட்டத்தில் முதலீட்டாளர்கள் எப்போது வேண்டுமானாலும் துவக்கலாம். அவ்வப்போது வங்கி சேமிப்புக் கணக்கில் தூங்கும் பணத்தை இந்த திட்டத்துக்கு முதலீட் டாளர்கள் மாற்றிவிடலாம். பணத்தைத் திரும்ப பெறுவதற்கு ஒரு நாள் ஆகும்.

நாம் ஏற்கெனவே கண்டது போல், எவ்வயதினரும் தங்களுடைய குறுகிய காலத் தேவைகளுக்கு இத்திட்டத்தில் தாராளமாக முதலீடு செய்யலாம். உங்கள் பணம் உங்களது வங்கி சேமிப்புக் கணக்குகளில் தூங்காமல், உங்களுக்காக வேலை செய்வதற்கு இது ஒரு அரிய முதலீட்டு வாய்ப்பாகும்.



யாருக்கு உகந்தது?

சேமிப்புக் கணக்கில் பணம் வைத்திருப்பவர், ரிஸ்க் எடுக்க விரும்பாதவர், சில மாதங்களுக்குள் பணம் தேவைப்படுபவர், அவசரமாக பணம் தேவைப்படுபவர், சேமிப்புக் கணக்கைவிட அதிக வருமானத்தை விரும்புபவர், எப்போது வேண்டுமானாலும் பணம் தேவைப்படுபவர் இதில் முதலீடு செய்யலாம்.

யார் முதலீடு செய்யக்கூடாது?

அதிக வருமானத்தை விரும்புபவர், அதிக ரிஸ்க் எடுக்க முடிந்தவர், உத்தரவாதமான வருமானத்தை விரும்புபவர் இதில் முதலீடு செய்யக்கூடாது.


ந.விகடன்

ஃபண்ட் பரிந்துரை

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

எல் அண்ட் டி புரூடென்ஸ் ஃபண்ட்:

முதல் முறை முதலீடு செய்பவர்களுக்கு ஏற்ற ஃபண்ட்!



எல் அண்ட் டி புரூடென்ஸ் ஃபண்ட் ஒரு ஹைபிரிட் (கலப்பின வகை) ஃபண்டாகும். பங்கு சார்ந்த மற்றும் கடன் சார்ந்த முதலீடுகளில் முதலீடு இருக்கும். இந்த ஃபண்ட் பேலன்ஸ்டு கேட்டகிரியைச் சார்ந்ததாகும். எல் அண்ட் டி புரூடென்ஸ் ஃபண்டின் முந்தைய பெயர் ஃபிடலிட்டி இந்தியா சில்ரன்ஸ் பிளான் – எஜுகேஷன் ஃபண்டாகும்.

இந்த ஃபண்ட் தனது முதலீட்டில் சுமார் 68 சதவிகித முதலீட்டை பங்கு சார்ந்த முதலீடுகளிலும், எஞ்சியதை கடன் சார்ந்த முதலீடுகளிலும் வைத்துள்ளது.

தற்போது ரூ.769 கோடி சொத்துக்களை நிர்வகித்து வருகிறது. இதன் ஃபண்ட் மேனேஜர்கள் விக்ரம் சோப்ரா மற்றும் சௌமேந்திரநாத் லாஹிரி ஆவார்கள்.

பொதுவாக, நாம் ஐந்து ஆண்டுகளுக்கு குறைவான செயல்பாடு உள்ள ஃபண்டுகளை பரிந்துரை செய்வதில்லை. இந்த ஃபண்ட் துவங்கி நான்குக்கும் மேற்பட்ட ஆண்டுகள்தான் ஆகிறது. இந்த நான்கு வருடங்களில் ஒருவர் செய்த முதலீடு சுமார் இரண்டு மடங்காகி உள்ளது.

இந்தத் திட்டம் ஆரம்பித்த போது (ஜனவரி 31, 2011) ஒருவர் செய்த முதலீடான ரூ. 1 லட்சம் தற்போது ரூ.1,98,100 ஆக உள்ளது. இது சிஏஜிஆர் அடிப்படையில் ஆண்டுக்கு 15.62% வருமானமாகும். இந்த கேட்டகிரியில் இது ஒரு உயரிய வருமானமாகும். இந்த செயல்பாடுதான் நமது பரிந்துரைக்கு முக்கியக் காரணம். கடந்த 1 மற்றும் 3 வருட கால கட்டத்தில் இது பேலன்ஸ்டு ஃபண்ட் கேட்டகிரியில் முன்னணி வகிக்கிறது. இந்த ஃபண்டின் ஒரே நெகட்டிவ், இதுவரை இந்த ஃபண்ட் பெரிய கரடிச் சந்தையில் செயல்பட வில்லை.

இந்த ஃபண்ட் தனது பங்கு சார்ந்த முதலீட்டில், துறைசார்ந்த சுழற்சிகளை இதுவரை மிகவும் துரிதமாக செய்துள்ளது. அதே போல், வட்டி விகிதம் குறைய ஆரம்பித்தவுடன், துரிதமாக கார்ப்பரேட் பாண்டுகளிலிருந்து மத்திய அரசாங்க பாண்டுகளுக்கு மாறிவிட்டது. இதனால் ஃபண்டின் செயல்பாடு மிகவும் உயர்வாக உள்ளது. இதன் பங்கு சார்ந்த போர்ட்ஃபோலியோ 67 பங்குகளுடன் மிகவும் பரவலாக உள்ளது.



லார்ஜ் கேப் பங்குகளில் பாதிக்கு மேலாகவும், மீதி ஸ்மால் அண்ட் மிட் கேப் பங்குகளிலும் முதலீடு செய்யப்படுகிறது. இந்த ஃபண்டின் கடன் சார்ந்த போர்ட்ஃபோலியோவில் தற்போது 60 சதவிகிதத்துக்கும் மேலாக மத்திய அரசாங்க கடன் பத்திரங்களிலும், மீதி கார்ப்பரேட் பாண்டுகளிலும் முதலீடு செய்யப்பட்டுள்ளது.

இந்த ஃபண்டின் பீட்டா 0.91 என்ற அளவில் சந்தையைவிட குறைவாகவும், ஆல்ஃபா 10.36% என்ற அளவில் மிக உயர்வாகவும் உள்ளது. பங்கு சார்ந்த முதலீட்டில், இன்ஃபோசிஸ், ஹெச்டிஎஃப்சி பேங்க், டாடா கன்சல்டன்சி, இண்டஸ்இந்த் பேங்க் போன்றவை டாப் ஹோல்டிங் களாக உள்ளன.

ஃபெடரல் பேங்க், மைண்ட் ட்ரீ, இமாமி, அசோகா பில்ட்கான், டிம்கன் இந்தியா, ஸ்ரீசிமென்ட், கஜாரியா செராமிக்ஸ் போன்ற மிட் அண்ட் ஸ்மால் கேப் ஃபண்டுகளும் போர்ட்ஃபோலியோவில் இடம்பெற்றுள்ளன. மத்திய அரசு பாண்டுகள் தவிர, மீதியுள்ள கார்ப்பரேட் பாண்டுகளில் பெரும்பகுதி AAA ரேட்டிங் கொண்டவையாக உள்ளது.

இந்த ஃபண்டில் குரோத் ஆப்ஷன் தவிர மாதாந்திர மற்றும் வருடாந்திர டிவிடெண்ட் ஆப்ஷன்களும் உள்ளன. மாதாந்திர டிவிடெண்ட் ஆப்ஷனில் கடந்த 16 மாதங்களாக தொடர்ந்து டிவிடெண்ட் வழங்கப்பட்டுள்ளது. மாதம்தோறும் டாக்ஸ் ஃப்ரீ டிவிடெண்ட்டை விரும்புபவர்கள் இந்த ஆப்ஷனை தேர்வு செய்யலாம்.






யாருக்கு உகந்தது?

மியூச்சுவல் ஃபண்டுகளில் முதல் முறை முதலீடு செய்ய விரும்புபவர்கள், 100% ஈக்விட்டி ஃபண்டுகளைவிட சற்று குறைவான ரிஸ்க் எடுக்க விரும்புபவர்கள், சற்று குறைவான ஏற்ற இறக்கத்தை நாடுபவர்கள், 50 வயதைத் தாண்டியவர்கள், மீடியம் டேர்மில் பணம் தேவைப்படுபவர்கள், குழந்தைகள் கல்வித் தேவைக்கு முதலீடு செய்பவர்களுக்கு இந்த ஃபண்ட் திட்டம் உகந்ததாக இருக்கும்.

ந.விகடன்

ஃபண்ட் பரிந்துரை

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

ஹெச்டிஎஃப்சி டாப் 200 ஃபண்ட்: ரிஸ்க் எடுப்பவர்களுக்கு ஏற்ற ஃபண்ட்!



இந்த ஃபண்ட் பல ஏற்ற இறக்கங்களை கண்டுள்ளது; மேலும் 19 வருடத்துக்கும் மேலானபாரம்பரியத்தைக் கொண்டுள்ளது.

இந்தியாவில் மிக அதிகமான சொத்துக்களை நிர்வகிக்கும் சில மியூச்சுவல் ஃபண்ட் திட்டங்களில் ஹெச்டிஎஃப்சி டாப் 200 திட்டமும் ஒன்று. இதன் ஃபண்ட் மேனேஜர் மியூச்சுவல் ஃபண்ட் உலகில் பலருக்கும் பரிச்சயமான பிரஷாந்த் ஜெயின் ஆவார். தற்போது இந்த ஃபண்ட் ரூ.12,000 கோடிக்கும் மேலான சொத்துக்களை நிர்வகித்து வருகிறது. இந்தத் திட்டம் துவங்கப்பட்டு 19 வருடங்களுக்கு மேலாகிவிட்டது.

இந்த ஃபண்ட் தற்போது சுமார் 83 சதவிகித முதலீட்டை லார்ஜ் கேப் பங்குகளிலும், மீதியை மிட்கேப் பங்குகளிலும் வைத்துள்ளது. ஃபைனான்ஸ், எனர்ஜி மற்றும் என்ஜினீயரிங் துறைகளில் ஓவர்வெயிட்டாக உள்ளது. அதேபோல், இந்த ஃபண்ட் டெக்னாலஜி, ஹெல்த்கேர் மற்றும் எஃப்.எம்.சி.ஜி துறைகளில் அண்டர்வெயிட்டாக உள்ளது.

இந்த ஃபண்ட் மேனேஜர் மதிப்புக்கு அதிக முக்கியத்துவம் (Value conscious) தருபவர். அதிக விலை கொடுத்து பங்குகளை வாங்குவதற்கு மிகவும் யோசிப்பார். எஃப்.எம்.சி.ஜி, ஹெல்த்கேர், டெக்னாலஜி போன்ற துறைகளில் இவர் அண்டர்வெயிட்டாக இருப்பதே இதற்கு ஒரு சான்று. இந்தத் துறைகளெல்லாம் அதிக மதிப்பில் தற்போது வர்த்தகமாகிக் கொண்டி ருக்கின்றன. அதே சமயத்தில், இவர் ஓவர்வெயிட்டாக இருக்கும் துறைகள் இன்றைய தினத்தில் குறைவான பி/இ-யில் வர்த்தகமாகிக் கொண்டிருக்கின்றன.

இந்த ஃபண்ட் மேனேஜரின் கொள்கையை, இந்த ஃபண்டின் போர்ட்ஃபோலியோ பி/இ மற்றும் பி/பி (சந்தை விலை/ புத்தக மதிப்பு) ஆகிய இரண்டு விகிதத்திலும் காணலாம். இந்த ஃபண்டின் பி/இ 16.23 ஆகும். அதேபோல் இதன் பி/பி 1.93 ஆகும். இந்த விகிதங்கள் இதை ஒத்த பிற ஃபண்டுகளுடன் ஒப்பிடும்போது குறைவாகும். அது மட்டுமல்ல, நிஃப்டி 50 குறியீட்டை விடவும் குறைவாகும். நிஃப்டியின் பி/இ மற்றும் பி/பி முறையே 22.55 மற்றும் 3.32 ஆகும்.

இதுவே இந்த ஃபண்டின் சமீபத்திய மெதுவான செயல்பாட்டுக்கான காரணமாகும். இவர் மேற்கொள்ளும் உத்தி குறுகிய காலத்தில் சிறு நஷ்டத்தை ஏற்படுத்துவதாகவும் அதே சமயத்தில் நீண்ட காலத்தில் நல்ல பலனையும் கொடுத்துள்ளது. இந்தத் திட்டம் ஆரம்பித்தபோது (03-09-1996) ஒருவர் செய்த முதலீடான ரூ.1 லட்சம் தற்போது ரூ.41,70,100-ஆக உள்ளது. இது கூட்டு வட்டி அடிப்படையில் 21.51% ஆண்டு வருமானத்துக்குச் சமமாகும்.



கடந்த வருடத்தில் இந்த ஃபண்ட் தனது கேட்டகிரி ஆவரேஜைவிட 3 சதவிகித அளவுக்குக் குறைவான வருமானத்தைக் கொடுத்துள்ளது. அதே சமயத்தில் 3 மற்றும் 5 வருட காலகட்டத்தில் கேட்டகிரி ஆவரேஜைவிட சற்று அதிகமாகவும், 10 வருட காலகட்டத்தில் கேட்டகிரி ஆவரேஜைவிட 4% அதிகமாகவும், நிஃப்டியைவிட 4.60% அதிகமாகவும் கொடுத்துள்ளது. இந்த ஃபண்டின் பீட்டா 1.19 என்ற அளவில் சந்தையைவிட சற்று அதிகமாகவும், ஆல்ஃபா 2.19 என்ற அளவில் குறைவாகவும் உள்ளது.

இந்த ஃபண்ட் பல ஏற்ற இறக்கங்களை கண்டுள்ளது; மேலும் 19 வருடத்துக்கும் மேலான பாரம்பரியத்தைக் கொண்டுள்ளது. ஃபண்ட் மேனேஜர் தனது பலத்தை தொடர்ச்சியாக கடந்த பல வருடங்களில் நிரூபித்துள்ளார். ஆகவே, இந்த ஃபண்டின் செயல்பாடு திரும்ப எழுந்துவரும் என்பதில் எந்தவித சந்தேகமுமில்லை.



ஏற்கெனவே இந்த ஃபண்டில் முதலீடு செய்துள்ள கன்ஸர்வேட்டிவ் மற்றும் மாடரேட் முதலீட்டாளர்கள், இந்த ஃபண்டில் தங்களுக்கு உள்ள முதலீட்டை தக்க வைத்துக் கொள்ளலாம் அல்லது தொடரலாம். அக்ரெஸிவ் முதலீட்டாளர்கள் மற்றும் குறுகிய கால செயல்பாட்டை எதிர்பார்ப்பவர்கள் வேறு திட்டங்களுக்கு மாறிக் கொள்ளலாம்.

யாருக்கு உகந்தது?

ஏற்கெனவே இதே ஃபண்டில் முதலீடு செய்துள்ளவர்கள், ரிஸ்க் எடுக்கக் கூடியவர்கள், பணம் உடனடித் தேவை இல்லாதவர்கள்.



யார் முதலீடு செய்யக்கூடாது?

குறுகிய காலத்தில் பணம் தேவைப் படுபவர்கள், உறுதியான/ நிலையான வருமானத்தை விரும்புபவர்கள், அதிக ரிஸ்க் எடுக்கத் தயங்குபவர்கள்

ந.விகடன்

ஃபண்ட் பரிந்துரை

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

டி.எஸ்.பி - பி.ஆர் ஈக்விட்டி ஃபண்ட்:: பணம் அதிகம் உள்ளவர்களுக்கு ஏற்ற ஃபண்ட்!




டிஎஸ்பி-பி.ஆர் ஈக்விட்டி ஃபண்ட் ஒரு மல்ட்டிகேப் திட்டமாகும். இது 1997-ம் ஆண்டு துவங்கப்பட்ட திட்டமாகும்.

ஆரம்ப காலங்களில் டிவிடெண்ட் ஆப்ஷன் மட்டுமே இந்தத் திட்டத்தில் இருந்தது. சில ஆண்டுகளுக்கு முன்பு குரோத் ஆப்ஷனும் அறிமுகப்படுத்தப்பட்டது.

இந்த ஃபண்டின் நெடுநாளைய ஃபண்ட் மேனேஜராக அபூர்வ ஷா இருந்து வந்தார். கடந்த ஜூலை மாதத்திலிருந்து இவர் மாற்றப்பட்டுள்ளார். இந்த ஃபண்டின் தற்போதைய ஃபண்ட் மேனேஜர்கள் ஹரீஷ் சவேரி (லார்ஜ் கேப்) மற்றும் வினித் சாம்ரே (மிட் அண்ட் ஸ்மால் கேப்) ஆவார்கள். இந்த இருவரும் ஏற்கெனவே இந்த ஃபண்ட் நிறுவனத்தில் வெற்றிகரமாக வேறு ஃபண்டுகளை நிர்வகித்து வருகிறார்கள்.

இந்த ஃபண்ட் கிட்டத்தட்ட 71 சதவிகிதத்தை லார்ஜ் கேப் பங்குகளிலும், மீதியை மிட் அண்ட் ஸ்மால் கேப் பங்குகளிலும் முதலீடு செய்துள்ளது. ஹெச்டிஎஃப் சி பேங்க் மற்றும் மாருதி சுஸூகி ஆகிய இரண்டு பங்குகளும் தனித்தனியே 8 சதவிகிதத்துக்கும் அதிகமாக இடம்பெற்றுள்ளன. ஆக்ஸிஸ் பேங்க் 5 சதவிகிதத்துக்கும் அதிகமாக இடம்பெற்றுள்ளது. பேயர் கிராப் சயின்ஸ், அதுல், அர்விந்த், என்சிசி, சத்பவ் இன்ஜினீயரிங், கும்மின்ஸ் போன்ற சிறிய மற்றும் நடுத்தர வகைப் பங்குகளும் போர்ட்ஃபோலியோவில் இடம்பெற்றுள்ளன. இந்த ஃபண்டின் பீட்டா சந்தையைவிட சற்று அதிகமாக 1.18 என்ற அளவிலும், ஆல்ஃபா 4.25 என்ற அளவிலும் உள்ளது.



இந்த ஃபண்ட் ஆரம்பித்தபோது (ஏப்ரல் 1997) ஒருவர் செய்த முதலீடான ரூ.1 லட்சம், தற்போது ரூ.34,62,740-ஆக உள்ளது. இது கூட்டு வட்டி அடிப்படையில் ஆண்டுக்கு 21.10% வருமானமாகும். இந்தக் கணக்குக்கு ஃபண்ட் கொடுத்த டிவிடெண்ட்டுகள் இதே திட்டத்தில் ரீஇன்வெஸ்ட் செய்ததாக எடுத்துக் கொள்ளப்பட்டுள்ளது.

கடந்த 1, 3, 5, மற்றும் 10 வருட காலகட்டங்களில் நிஃப்டி 50 குறியீட்டுடன் ஒப்பிடும்போது, 2.47 – 6.94% அதிக வருமானத்தைக் கொடுத்துள்ளது. கடந்த 1, 3, மற்றும் 5 வருடங்களில் கேட்டகிரி ஆவரேஜுடன் ஒப்பிடுகையில் 0.63 – 2.13% குறைவான வருமானத்தைக் கொடுத்துள்ளது.





கடந்த 10 வருட காலகட்டத்தில் கேட்டகிரி ஆவரேஜைவிட 2.60% அதிக வருமானத்தைக் கொடுத்துள்ளது. கடந்த சில வருடங்களில் இருந்துவந்த சற்று சுமாரான செயல்பாடே ஃபண்ட் மேனேஜர் மாற்றத்துக்கு ஒரு காரணமாகவும் இருந்திருக்கலாம்.

இந்த ஃபண்டின் டிவிடெண்ட் ஆப்ஷன் கடந்த 9 வருடங்களாக தொடர்ந்து டிவிடெண்ட்டை மூன்றாவது அல்லது நான்காவது காலாண்டில் வழங்கியுள்ளது. பதினெட்டு ஆண்டுகளில் சந்தையில் பல ஏற்ற இறக்கங்களைக் கண்ட ஃபண்ட் இது. ஃபண்ட் மேனேஜர்கள் மாற்றம் மற்றும் நல்ல செயல்முறையைக் கொண்ட ஃபண்ட் நிறுவனம் போன்ற காரணங்களால் இந்த ஃபண்ட் மீண்டும் எழுந்துவரும் என்பதில் சந்தேகமில்லை.





ஆகவே போதிய கால அவகாசம் இல்லாதவர்கள் மற்றும் கன்ஸர்வேட்டிவ்/ மாடரேட் முதலீட்டாளர்கள் இந்த ஃபண்டில் முதலீட்டைத் தொடர்ந்து வரலாம். அக்ரெஸிவ்வான வருமானத்தை விரும்புபவர்கள் இந்த ஃபண்டிலிருந்து வேறு ஃபண்டுகளுக்கு மாறிக் கொள்ளலாம்.

யாருக்கு உகந்தது?

ஏற்கெனவே இந்தத் திட்டத்தில் முதலீடு செய்துள்ளவர்கள், அனைத்து வயதினர், பணம் அதிகம் உள்ளவர்கள், மீடியம் ரிஸ்க் எடுக்கக் கூடியவர்கள், பணம் உடனடித் தேவை இல்லாதவர்கள் இந்த ஃபண்டில் முதலீடு செய்யலாம்.

யார் முதலீடு செய்யக்கூடாது?

குறுகிய காலத்தில் பணம் தேவைப்படுபவர்கள், உறுதியான / நிலையான வருமானத்தை விரும்புபவர்கள், ஈக்விட்டி மியூச்சுவல் ஃபண்ட் திட்டங்களில் அக்ரெஸிவ்வான வருமானத்தை விரும்புபவர்கள், ஈக்விட்டி ஃபண்டுகளில் புதிய முதலீட்டை துவங்க உள்ளவர்கள் இந்த ஃபண்டில் முதலீட்டைத் தவிர்ப்பது நல்லது.

ந.விகடன்

ஃபண்ட் பரிந்துரை

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

ஹெச்டிஎஃப்சி மீடியம் டேர்ம் ஆப்பர்ச்சூனிட்டீஸ் ஃபண்ட்: ஓய்வுக்காலத்துக்கு ஏற்ற ஃபண்ட்!



வங்கி டெபாசிட்டுகளுக்கு வட்டி விகிதம் வேகமாகக் குறைந்து வரும் இந்தக் காலகட்டத்தில் அரை அல்லது ஒரு சதவிகிதம் வட்டி வேறு எங்காவது அதிகமாகக் கிடைக்குமா என்று முதலீட்டாளர்கள் தேடுகிறார்கள். வட்டி அதிகம் கிடைத்தால் மட்டும் போதாது – அது அதிக தரமான முதலீடாக இருக்க வேண்டுமெனவும் விரும்புகிறார்கள். ஃபிக்ஸட் டெபாசிட்டுகளைவிட சற்று கூடுதலான வருமானத்துடனும், மிகவும் தரமான போர்ட்ஃபோலியோவுடனும் கூடியதுதான் ஹெச்டிஎஃப்சி மீடியம் டேர்ம் ஆப்பர்ச்சூனிட்டீஸ் ஃபண்ட்.

இது கார்ப்பரேட் கடன் பத்திரங்கள், மணி மார்க்கெட் உபகரணங்கள் மற்றும் அரசாங்க பத்திரங்கள் போன்ற முதலீடுகளில் முதலீடு செய்கிறது. முதிர்வு காலம் 5 வருடங்களுக்கு மிகாமல் இருக்குமாறு பார்த்துக் கொள்கிறது.

இந்த ஃபண்டின் போர்ட்ஃபோலி யோவில் 85 சதவிகிதத்துக்கும் அதிகமான முதலீடுகள் AAA/ A1+ கிரெடிட் ரேட்டிங் கொண்ட முதலீடுகள் ஆகும். இந்த வகை கிரெடிட் ரேட்டிங் மிக மிக பாதுகாப்பான உபகரணங்களுக்கே தரப்படுகிறது. ஆகவே, கடன் சார்ந்த திட்டங்களில் மிகவும் தரமான முதலீட்டை நாடுபவர்கள் இந்தத் திட்டத்தில் முதலீடு செய்யலாம்.

இந்தத் திட்டம் தற்போது ரூ.3,900 கோடிக்கும் மேலான சொத்துக்களை நிர்வகித்து வருகிறது. இதன் தற்போதைய ஃபண்ட் மேனேஜர் அனுபம் ஜோஷி ஆவார். இதன் போர்ட்ஃபோலியோவில் அரசாங்க கடன் பத்திரங்கள் மிகக் குறைவாக (2.34%) உள்ளது. கார்ப்பரேட் நிறுவனங்களின் பத்திரங்கள்தான் மிகவும் அதிகமாக உள்ளது.



ஆர்இசி, எல்ஐசி ஹவுஸிங் ஃபைனான்ஸ், பவர் ஃபைனான்ஸ், ஹெச்டிஎஃப்சி, நபார்ட் போன்ற தரமான நிறுவனங்களின் கடன் பத்திரங்கள் இந்த ஃபண்டின் டாப் ஹோல்டிங்ஸாக உள்ளன.

5 வருடங்களுக்கு முன் இந்த ஃபண்ட் திட்டத்தில் ஒருவர் செய்த முதலீடான ரூ.1 லட்சம் தற்போது ரூ.1,59,630-ஆக உள்ளது. இது கூட்டு வட்டி அடிப்படை யில் ஆண்டுக்கு 9.12% வருமானமாகும்.



3 வருடம் மற்றும் அதற்கு மேல் உள்ள காலகட்டத்துக்கு எஃப்.டி.யில் முதலீடு செய்ய விரும்பும் முதலீட்டாளர்கள் இந்த ஃபண்டில் முதலீடு செய்யலாம். வட்டி விகிதங்கள் இறங்கிவரும் இந்த காலத்தில், இந்த ஃபண்ட் திட்டத்தில் எஃப்டி-யைவிட சற்று கூடுதல் வருமானம் கிடைக்க வாய்ப்புள்ளது.

தவிர, இந்த ஃபண்ட் திட்டத்தில் பணவீக்கத்தை அட்ஜஸ்ட் செய்தபிறகு வருமான வரி கணக்கிடப்படுவதால், வரியும் மிகக் குறைவாகவே இருக்கும்.

நிச்சயமான வருமானத்தை விரும்பு பவர்கள், இந்த ஃபண்டில் முதலீடு செய்ய வேண்டாம். அல்ட்ரா கன்ஸர்வேட்டிவ் முதலீட்டாளர்கள், இந்த ஃபண்டில் தாராளமாக முதலீடு செய்யலாம்; ஏனென்றால், போர்ட்ஃபோலியோவில் அதிகமாக AAA மற்றும் A1+ ரேட்டிங் கொண்ட உபகரணங்கள் உள்ளன. இந்த ஃபண்டின் செலவு விகிதமும் மிகவும் குறைவாக 0.28% என்ற அளவில் உள்ளது.



கடந்த 1, 3 மற்றும் 5 வருடங்களில் தனது கேட்டகிரியை ஒட்டியே வருமானத்தைத் தந்துள்ளது. இதற்கு காரணம், குறைவான அரசாங்க பத்திர முதலீடுகள், குறைவான ஆவரேஜ் முதிர்வுக் காலம் மற்றும் மிகவும் தரமான போர்ட்ஃபோலியோ போன்றவை ஆகும். இந்த ஃபண்டின் ஆவரேஜ் முதிர்வுக் காலம் 1.59 வருடங்கள் ஆகும்.

இந்தத் திட்டத்தில் முதலீடு செய்பவர்கள் தங்களது முதலீட்டுக் காலத்தை குறைந்தது மூன்றுக்கும் மேற்பட்ட ஆண்டுகளாக வைத்துக் கொள்வது நல்லது. மூன்று ஆண்டுகளுக்குள் வெளியேறும்போது, வரும் வருமானத்துக்கு, அவரவர் வருமான வரி வரம்பில் வரி கட்ட வேண்டிவரும்.

அதுவே மூன்று வருடத்துக்கு மேல் ஆகும்போது, நீண்ட கால கேப்பிட்டல் கெயின்ஸ் டாக்ஸ் உரித்தாகும். அது தற்போது, பணவீக்கத்துக்கு அட்ஜஸ்ட் செய்தபிறகு 20% ஆகும். அவ்வாறு செலுத்தும்போது வருமான வரி மிகவும் சொற்பமாகவே வரும். ஆகவே, வருமான வரியின் உச்ச வரம்பில் இருப்பவர் களுக்கு, ஃபிக்ஸட் டெபாசிட்டுடன் ஒப்பிடும் போது, இந்த ஃபண்ட் ஒரு வரப்பிரசாதம்.



ரெக்கரிங் டெபாசிட்டுக்குப் பதிலாக, எஸ்ஐபி முறையிலும் இந்த ஃபண்டில் சிறு முதலீட்டாளர்கள் தாராளமாக முதலீடு செய்யலாம். மாதாந்திர குறைந்த அளவு எஸ்ஐபி முதலீடு ரூ.500 ஆகும். இந்த ஃபண்ட், போர்ட்ஃபோலியோவில் கடன் சார்ந்த ஒதுக்கீட்டை நாடுபவர்களுக்கு சிறப்பான முதலீடாக அமையும்.

யாருக்கு உகந்தது?

பங்குச் சந்தை ரிஸ்க் எடுக்க விரும்பாதவர்கள், அதிக வரி வரம்பில் இருப்பவர்கள், வரிக்கு பிந்தைய வருமானத்தை அதிகமாக எதிர்பார்ப் பவர்கள், ஓய்வுக்காலத்தில் இருப்பவர்கள், பணம் அதிகம் உள்ளவர்கள், பணம் உடனடித் தேவை இல்லாதவர்கள், நடுத்தர காலத்தில் ஃபிக்ஸட் டெப்பாசிட்டுக்கு நிகரான வருமானத்துடன், வேண்டும்போது எடுத்துக்கொள்ளும் வசதியை விரும்புபவர்கள், ஹை கிரெடிட் குவாலிட்டி போர்ட்ஃபோலியோவை விரும்புபவர்கள்.

யார் முதலீடு செய்யக்கூடாது?

நீண்ட காலத்தில் பணம் தேவைப்படுபவர்கள், குறிப்பிட்ட இடைவெளிகளில் உறுதியான/ நிலையான வருமானத்தை விரும்புபவர்கள், அதிக ரிஸ்க் எடுக்கக் கூடியவர்கள்.

ந.விகடன்

ஃபண்ட் பரிந்துரை

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்

ரெலிகேர் இன்வெஸ்கோ டாக்ஸ் பிளான்: வருமான வரி விலக்கை எதிர்பார்ப்பவர்களுக்கு ஏற்ற ஃபண்ட்!



இந்த நிதி ஆண்டு நிறைவு பெற இன்னும் நான்கு மாதங்களே உள்ளன. இதை உணர்த்துகிற மாதிரி நீங்கள் கடைசியாக வாங்கிய சம்பளத்தில் வரிப் பிடித்தம் செய்யப்பட்டு இருக்கும். இதனை அடுத்து வரிச் சுமையிலிருந்து தப்பிக்க 80சி பிரிவின் கீழ் வரியைச் சேமிக்க என்னென்ன உபகரணங்கள் உள்ளது என்று இப்போதே தேடத் தொடங்கி இருப்பார்கள்.

இப்போதே வரிச் சலுகை பெறுவதற்காக திட்டமிட்டீர்கள் என்றால், வரியைச் சேமிப்பதுடன் உங்களது முதலீட்டையும் பெருக்கிக் கொள்ளலாம்.

இந்த வகையான முதலீட்டு உபகரணம்தான் டாக்ஸ் சேவர் ஃபண்டுகள் அல்லது இ.எல்.எஸ்.எஸ் (ELSS – Equity Linked Savings Scheme) என்று சொல்லப்படுகிற மியூச்சுவல் ஃபண்ட் திட்டங்கள். இந்த வகையில் ஒன்றுதான், ரெலிகேர் இன்வெஸ்கோ டாக்ஸ் பிளான்.

தொடர்ச்சியாக நன்றாகச் செயல்பட்டுவரும் டாக்ஸ் சேவர் திட்டங்களில் இதுவும் ஒன்று. டிசம்பர் 2006-ஆம் ஆண்டு இந்தத் திட்டம் ஆரம்பிக்கப்பட்டது. இதன் தற்போதைய ஃபண்ட் மேனேஜர்கள் வெற்றி சுப்ரமணியம் மற்றும் வினை பஹாரியா ஆவார்கள்.

80சி பிரிவின் கீழ் வரும் டாக்ஸ் சேவர் முதலீடுகளில் மிகவும் குறைவான லாக்-இன் பீரியட் கொண்டது டாக்ஸ் சேவர் மியூச்சுவல் ஃபண்டுகள்தான். அதாவது, வெறும் 36 மாதங்கள்தான். பி.பி.எஃப், பி.எஃப், இன்ஷூரன்ஸ், ஃபிக்ஸட் டெபாசிட்டுகள், அஞ்சலக சேமிப்புகள் போன்றவை அதிக கால லாக்-இன் கொண்டவை ஆகும்.

மேலும், தற்போது இருக்கும் 80சி முதலீடுகளில் அதிக வளர்ச்சி / வருமானம் தரக்கூடியது டாக்ஸ் சேவர் மியூச்சுவல் ஃபண்டுகள்தான். தனது 30-ஆவது வயதிலிருந்து ஓய்வுபெறும் (60 வயது) வரை 30 ஆண்டு காலங்களுக்கு ஒருவர் இந்த வகை ஃபண்டுகளில் வருடத்துக்கு ரூ.1.50 லட்சம் அல்லது மாதத்துக்கு ரூ.12,500 சேமித்து, அதற்கு ஆண்டுக்கு 12% வருமானம் கிடைத்தால், அவர் ஓய்வுபெறும்போது ரூ3.62 கோடி கிடைக்கும். இது ஒருவர் ஓய்வூதியம் பெறுவதற்கு தாராளமாக இருக்கும்.

இந்தத் திட்டம் தற்போது ரூ.255 கோடி மதிப்புள்ள சொத்துக்களை நிர்வகித்து வருகிறது. நாம் பொதுவாக நிர்வகிக்கும் சொத்து மதிப்பு ரூ.300 கோடிக்கு மேல் இருக்கிற திட்டங்களையே பரிந்துரை செய்வோம். ஆனால், இந்தத் திட்டத்தில் நிர்வகிக்கும் சொத்து மதிப்பு ரூ.300 கோடிக்கு கீழ் இருந்தபோதிலும், இதன் கடந்த கால உயரிய செயல்பாட்டினால், இந்த ஃபண்டை முதலீட்டுக்கு பரிந்துரை செய்கிறோம்.

இந்த ஃபண்ட் தனது போர்ட் ஃபோலியோவில் 66 சதவிகிதத்தை லார்ஜ்கேப் பங்குகளிலும், மீதியை மிட் அண்ட் ஸ்மால்கேப் பங்குகளிலும் முதலீடு செய்துள்ளது. சந்தையின் நிலைமையைப் பொருத்து, மிட்கேப் மற்றும் லார்ஜ்கேப் சதவிகிதத்தை மாற்றிக் கொள்கிறது. காளைச் சந்தையில் மிக வேகமாக உயராவிட்டா லும், கரடிச் சந்தையில் ஸ்திரமாகச் செயல்படும்.

இதன் ஆல்ஃபா 9.64 என்ற அளவில் மிக உயர்வாக உள்ளது. இதன் பீட்டா சந்தையை ஒட்டி 0.98 என்ற அளவில் உள்ளது. சந்தையை ஒட்டிய பீட்டாவுடன், இந்த அளவு உயரிய ஆல்ஃபா மிகவும் நல்ல காம்பினேஷன் ஆகும்.



இந்த ஃபண்ட் ஃபைனான்ஸ் மற்றும் எனர்ஜி துறைகளில் அண்டர்வெயிட்டாக உள்ளது. சர்வீசஸ், கெமிக்கல்ஸ், ஹெல்த்கேர், ஆட்டோ போன்ற துறைகளில் ஓவர்வெயிட்டாக உள்ளது.

கடந்த 1, 3 மற்றும் 5 வருட காலகட்டங்களில் தனது கேட்டகிரி ஆவரேஜைவிட மூன்று சதவிகிதத்துக்கும் அதிகமான அளவில் லாபம் தந்துள்ளது. ஆகவே, 80C பிரிவின் கீழ் வரும் முதலீட்டுக்கு மியூச்சுவல் ஃபண்டை நாடுபவர்கள் இந்த ஃபண்டில் தாராளமாக முதலீடு செய்யலாம்.


யாருக்கு உகந்தது?

சம்பாத்தியம் ரூ 2.50 லட்சத்துக்கு மேல் இருந்து 80C பிரிவின் கீழ் வருமான வரி விலக்கை எதிர்பார்ப்பவர்கள். அவ்வாறு செய்யும் முதலீட்டில் ரிஸ்க் எடுத்து, எடுக்கும் ரிஸ்க்குக்கு ஏற்றாற் போல் வருமானத்தை எதிர்பார்ப்பவர்கள்.





யார் முதலீடு செய்யக்கூடாது?

80சி பிரிவின் கீழ் வருமான வரிச் சலுகை தேவைப்படாதவர்கள், ரிஸ்க் எடுக்க விருப்பம் இல்லாதவர்கள், உறுதியான/ நிலையான வருமானத்தை விரும்புபவர்கள், பங்குச் சந்தை பற்றி குறித்து போதிய ஞானம் இல்லாதவர்கள்.

ந.விகடன்

முதலீட்டுக்கேற்ற பெஸ்ட் இண்டெக்ஸ் ஃபண்டுகள்!

சொக்கலிங்கம் பழனியப்பன், டைரக்டர், ப்ரகலா வெல்த் மேனேஜ்மென்ட் பி.லிட்.



மியூச்சுவல் ஃபண்ட் முதலீட்டை ஆக்டிவ் மற்றும் பேஸிவ் என இரண்டு வகையாகப் பிரிக்கலாம். இந்த இரண்டு ஃபண்டுகளுக்கும் இடையே உள்ள வித்தியாசம் ஒன்றுதான். ஆக்டிவ் ஃபண்டுகளில் ஃபண்ட் மேனேஜரின் திறமை மிகவும் முக்கியம். பேஸிவ் ஃபண்டுகளில் மேனேஜரின் திறமை அவ்வளவு முக்கியம் இல்லை. பெருவாரியான வேலையை கம்பியூட்டரே செய்து முடித்துவிடும்.

ஆக்டிவ் ஃபண்ட்!

ஆக்டிவ் ஃபண்ட் என்றால் என்ன? துரிதமாக செயல்படும் ஃபண்டுகளை ஆக்டிவ் ஃபண்டுகள் என அழைக்கிறோம். இப்படி செயல்படும் ஆக்டிவ் ஃபண்டுகளில் ஃபண்ட் மேனேஜர் பிரதானமாக இருப்பார். அவருடைய முக்கியப் பணி, அந்த ஃபண்டின் பெஞ்ச்மார்க் குறியீட்டைவிட (benchmark index) அதிக வருமானத்தை ஈட்டித் தருவதாகும்.

உதாரணத்துக்கு, ஏதாவது ஒரு லார்ஜ் கேப் ஃபண்டை எடுத்துக் கொள்ளுங்கள். பெரும்பாலும் அதன் பெஞ்ச்மார்க் குறியீடு நிஃப்டி 50 அல்லது சென்செக்ஸாக இருக்கும். ஆக்டிவ் ஃபண்ட் மேனேஜரின் ஒரே நோக்கம், நிஃப்டி 50 அல்லது சென்செக்ஸைவிட அதிக வருமானத்தை ஈட்டித் தருவதாகும். அதற்காக அவரும் அவருடைய குழுவும் எந்தெந்தத் துறை வரும் காலங்களில் நன்றாகச் செயல்படும், எந்தெந்தத் துறை நன்றாகச் செயல்படாது, அந்தது துறைகளில் எந்த நிறுவனங்கள் அதிக லாபத்தை ஈட்டும், எந்தெந்த நிறுவனங்களின் மேனேஜ்மெண்ட் தரமானது போன்ற பலவற்றையும் ஆராய்ந்து அறிந்து முதலீடு செய்வார். ஆகவே ஆக்டிவ் ஃபண்டுகளின் செலவினமும் அதிகமாக இருக்கும்.

மேலும், ஃபண்ட் மேனேஜரின் தனிப்பட்ட திறமையும், அவரின் ஆராய்ச்சிப் பிரிவின் திறமையும் ஃபண்ட் மேனேஜ்மெண்டில் பெரிய பங்கு வகிக்கும். ஆக்டிவ் ஃபண்ட் மேனேஜரின் குறிக்கோள் குறியீட்டைவிட அதிக வருமானம் கொடுப்பதாக இருந்தாலும், சில சமயங்களில் அந்தக் குறிக்கோள், பல்வேறு காரணங்களால் அடைய முடியாமல் போவதும் உண்டு. இதுவரை இந்தியாவில் ஆக்டிவ் ஃபண்டுகள் பெருவாரியான வருமானத்தை முதலீட்டாளர்களுக்கு ஈட்டிக் கொடுத்துள்ளன.

பேஸிவ் ஃபண்ட்!

பேஸிவ் ஃபண்ட் என்றால் என்ன? நிஃப்டி, சென்செக்ஸ் என ஏதாவது ஒரு குறியீட்டை (index) அச்சு அசலாக அப்படியே ஃபாலோ செய்வதுதான் பேஸிவ் ஃபண்ட். ஒரு குறியீட்டில், அதாவது இன்டெக்ஸில், எந்தப் பங்கின் விகிதம் எந்த அளவில் உள்ளதோ, அதே அளவில் அந்தப் பங்கை தனது போர்ட்ஃபோலியோவில் வைத்துக்கொள்ளும். ஃபண்ட் மேனேஜர் தனது மூளையை அதிகம் கசக்கிப் புழியத் தேவை இல்லை. அதேபோல், ஆராய்ச்சிப் பிரிவுக்கும் அதிலுள்ள அனலிஸ்ட்டுகளுக்கும் அதிகம் வேலை இருக்காது.

ஒரு குறியீட்டிலிருந்து ஒரு பங்கு விலக்கப்பட்டால், பேஸிவ்வாக செயல்படும் ஃபண்டுகளும் தனது போர்ட்ஃபோலியோவிலிருந்து அந்தப் பங்கை விலக்கிவிடும். ஒரு பங்கு புதிதாக அந்தக் குறியீட்டில் சேர்க்கப்பட்டால், பேஸிவ் ஃபண்டுகளும் தனது போர்ட்ஃபோலியோவில், அந்தப் பங்கை, குறியீட்டில் சேர்க்கப்பட்ட அதே விகிதாசாரத்தில் சேர்த்துக் கொள்ளும்.

தற்போது ஒரு குறியீட்டில், ஒவ்வொரு பங்கின் விகிதமும் பல காரணங்களைக் கொண்டு தினசரி மாறுபடும். அவ்வாறு மாறும்போது, பேஸிவ் ஃபண்டுகளும் தங்களது போர்ட்ஃபோலியோவில் மாற்றவேண்டும். அவ்வாறு மாற்றும்போது விலையில் சில ஏற்ற இறக்கங்கள் இருக்கும். இதை ‘டிராக்கிங் எரர்’ (tracking error) என்று அழைக்கிறோம்.

குறியீட்டு அடிப்படையில்!

பேஸிவ்வாக செயல்படும் பல ஃபண்டுகள், ஒரு குறியீட்டை அடிப்படையாகக் கொண்டு செயல்படுவதால், இவற்றை இண்டெக்ஸ் ஃபண்டுகள் (index funds) என்றும் அழைக்கிறோம். இ.டி.எஃப்-களும் (ETF – Exchange Traded Funds) ஒரு வகையில் இண்டெக்ஸ் ஃபண்டுகளே!

இவற்றில் பல வகை இருந்தாலும், இண்டெக்ஸை அடிப்படையாகக் கொண்டு செயல்படும் இ.டி.எஃப்-கள்தான் அதிகம். இ.டி.எஃப்-களை பங்குச் சந்தை மூலம்தான் வாங்க முடியும்; ஆனால், இண்டெக்ஸ் ஃபண்டுகளை டீமேட் கணக்கு இல்லாமலே வாங்கலாம் மற்றும் விற்கலாம். மேலும், இண்டெக்ஸ் ஃபண்டுகளை வாங்குவதற்கு / விற்பதற்கு புரோக்கரேஜ் செலுத்த வேண்டாம். இண்டெக்ஸ் ஒரு நாளைக்கு ஒருமுறைதான் வியாபாரம் செய்ய முடியும். இ.டி.எஃப்-களை ஒரு நாளைக்கு பல முறை வியாபாரம் செய்ய முடியும்.

பாசிட்டிவ் பாயிண்ட்ஸ்!

இண்டெக்ஸ் ஃபண்டுகளின் நன்மை என்ன? நாம் மேலே கண்டது போல, ஒரு ஃபண்ட் மேனேஜரின் திறமையையோ அல்லது ஒரு ஃபண்ட் நிறுவனத்தின் திறமையையோ வைத்து இவை செயல்படுவதில்லை. ஆகவே, இந்த ஃபண்டுகளில் ஹ்யூமன் எரர் (human error) என்று சொல்லக்கூடிய மனிதர்கள் செய்யக்கூடிய தவறுகள் மிக மிகக் குறைவு. மேலும், இந்த ஃபண்டுகள் ஒரு பொருளாதாரத்தை அடிப்படையாகக் கொண்டு செயல்படுகின்றன. ஆகவே, அடிப்படை பொருளாதாரம் நன்றாக இருக்கும் வரைக்கும், இந்த ஃபண்டுகளின் செயல்பாடும் நன்றாக இருக்கும். இந்த வித ஃபண்டுகளின் ஃபண்ட் நிர்வாகக் கட்டணமச் செலவீனங்கள் குறைவு.

இந்த ஃபண்டுகளும் பிற ஆக்டிவ் ஃபண்டுகளைப் போல, எஸ்.ஐ.பி, எஸ்.டி.பி போன்ற அனைத்து வசதிகளையும் வழங்குகின்றன. மேலும், இண்டெக்ஸ் ஃபண்டுகள் ஒரு குறியீட்டை ஃபாலோ செய்வதால், முதலீட்டுப் பரவாக்கம் (Diversification) நன்றாக இருக்கும். அமெரிக்கா போன்ற வளர்ந்த பொருளாதாரங்களில் பல ஆக்டிவ் ஃபண்டுகளை, சிம்பிள் கான்செப்ட்டில் உள்ள இன்டெக்ஸ் ஃபண்டுகள் அதிக வருமானம் தந்துவிடுகின்றன. அது போன்ற பொருளாதாரங்களில் இண்டெக்ஸ் ஃபண்டுகள் குறைந்த செலவீனத்தில் உன்னதமான செயல்பாட்டைக் கொடுக்கின்றன.

நெகட்டிவ் பாயிண்ட்ஸ்!

இண்டெக்ஸ் ஃபண்டுகளின் தீமை என்ன? இந்தியா போன்ற வளரும் பொருளாதாரங்களில், பங்குச் சந்தை பல்வேறு காரணங்களால் அவ்வளவு திறமையாக செயல்பட விரும்புவதில்லை. ஆகவே, ஆக்டிவ் ஃபண்ட் மேனேஜர்கள் தொடர்ந்து இண்டெக்ஸ் ஃபண்டுகளைவிட நல்ல வருமானத்தைக் கொடுத்து வருகின்றன. இதேபோல், இன்னும் சில காலங்களுக்கு ஆக்டிவ் ஃபண்டுகளின் உயர்தரமான செயல்பாடு தொடரும்.

இந்த நிலையில், இண்டெக்ஸ் ஃபண்டுகளில் முதலீடு செய்பவர்கள் ஆக்டிவ் ஃபண்டுகளுடன் ஒப்பிடும்போது குறைவான வருமானத்தை பெறுவார்கள். ஆக்டிவ் ஃபண்ட் மேனேஜர், சந்தை வெகுவாக ஏறி இருக்கும்போது சற்று பாதுகாப்பான (அதிகம் விழுகாத) பங்குகளில் முதலீடு செய்ய முடியும். அதேபோல், கேஷ் பொசிஷனை அதிகப்படுத்திக் கொள்ள முடியும். ஆனால், இண்டெக்ஸ் ஃபண்டுகளால் சந்தை கீழே விழும்போது, விரும்பினாலும் வீழ்ச்சியின் விகிதத்தைக் குறைக்க முடியாது..



யாருக்கு உகந்தது?

தற்பொழுதைய நிலையில் இந்திய மியூச்சுவல் ஃபண்ட் முதலீட்டாளர்கள் பெரும்பாலும் ஆக்டிவ் ஃபண்டுகளையே நாடிச் செல்கிறார்கள் – காரணம் இண்டெக்ஸைவிட அதிகமான ரிட்டர்னை ஆக்டிவ் ஃபண்டுகள் தந்து கொண்டிருக்கின்றன. சந்தையைவிட அதிக ரிஸ்க் எடுக்க விரும்பாதவர்கள், நீண்ட காலத்தில் ஃபிக்ஸட் டெப்பாஸிட்டைவிட சற்று அதிக வருமானத்தை வரியில்லாமல் விரும்புபவர்கள், மியூச்சுவல் ஃபண்டுகளில் முதன்முறை முதலீடு செய்பவர்கள், மூத்த குடிமக்கள், குறைவான செலவு விகிதத்தை எதிர்பார்ப்பவர்கள் போன்ற அனைவரும் இண்டெக்ஸ் ஃபண்டுகளில் முதலீடு செய்யலாம்.

கவனிக்க வேண்டியவை!

இண்டெக்ஸ் ஃபண்டுகளில் கவனிக்க வேண்டியவை என்னென்ன?

1. நுழைவுக் கட்டணம் பொதுவாக எந்த ஃபண்டுகளுக்கும் இன்று இந்தியாவில் இல்லை. வெளியேறும் கட்டணம் சில இண்டெக்ஸ் ஃபண்டுகளுக்கு இல்லை; சில ஃபண்டுகள் வைத்துள்ளன. நீங்கள் முதலீடு செய்யும் ஃபண்டின் வெளியேறும் கட்டணத்தை கவனித்துக் கொள்ளுங்கள்.

2. பணியாளர் ஓய்வுக் கால நிதியானது (EPF) பங்குச் சந்தைக்குள் முதலீடு செய்யப்படுவதால், பல ஃபண்ட் நிறுவனங்கள் தங்களின் இண்டெக்ஸ் இ.டி.எஃப் நிர்வாகச் செலவு விகிதத்தை (Expense ratio) தரை மட்டத்துக்குக் குறைத்துள்ளன. உதாரணத்துக்கு, எஸ்.பி.ஐ இ.டி.எஃப் நிஃப்டி 50-ன் நிர்வாகச் செலவு ஒரு ஆண்டுக்கு 0.07% ஆகும். இது அமெரிக்கா போன்ற சந்தைகளை ஒப்பிடும்போதுகூட மிக மிகக் குறைவு. இந்த மாறுதலினால், இண்டெக்ஸ் ஃபண்டுகளின் செலவு விகிதமும் குறைந்துள்ளது. ஆகவே, பிற இண்டெக்ஸ் ஃபண்டுகளுடன் ஒப்பிடும்போது, உங்கள் ஃபண்டின் செலவு விகிதத்தை ஒப்பிட்டுக் கொள்ளுங்கள்.

3. நாம் மேலே கூறிய ‘டிராக்கிங் எரர்’ எந்த அளவு உள்ளது என்பதையும் கவனிப்பது அவசியம்.

சமீப காலங்களில் இ.டி.எஃப் திட்டங்கள் நிர்வாகம் செய்யும் தொகைகள் விறுவிறுவென ஏறிக்கொண்டு வருகின்றன. ஆனால், இண்டெக்ஸ் ஃபண்டுகள் மேனேஜ் செய்யும் தொகைகள் அந்த அளவு இன்னும் இந்தியாவில் ஏறவில்லை.

எந்தெந்தக் குறியீட்டை அடிப்படையாகக் கொண்டு இண்டெக்ஸ் ஃபண்டுகள் செயல்படுகின்றன? இந்தியாவில் அதிகமாக செயல்படும் இண்டெக்ஸ் ஃபண்டுகள் நிஃப்டி 50 மற்றும் சென்செக்ஸ் குறியீடுகளை அடிப்படையாகக் கொண்டு செயல்பட்டு வருகின்றன. அதன்பிறகு, நிஃப்டி ஜூனியர், மிட்கேப், பி.எஸ்.இ 100, சி.என்.எக்ஸ் 500 போன்ற பிற குறியீடுகளையும் அடிப்படையாகக் கொண்டு இண்டெக்ஸ் ஃபண்டுகள் செயல்பட்டு வருகின்றன.

முதலீட்டுக்கு உகந்த பெஸ்ட் இண்டெக்ஸ் ஃபண்டுகளை மேலே உள்ள அட்டவணையில் கொடுத்துள்ளோம். குறைந்தது ஐந்து வருடங்கள் நடப்பில் இருந்துள்ள ஃபண்டுகளாகவும், குறியீட்டைவிட அதிகமாக அல்லது அதை ஒட்டிய ஃபண்டுகளாகவும் உள்ளன .


ந,விகடன்