சூடு பிடிக்கிறது மோட்டார் வாகன விற்பனை

புதுடில்லி: வாகன துறைக்கான உற்பத்தி வரிச் சலுகை நடப்பாண்டு இறுதி வரை நீட்டிக்கப்பட்டுள்ளதை அடுத்து, சென்ற ஜூன் மாதத்தில், சில முன்னணி நிறுவனங்களின் வாகன விற்பனை விறுவிறுப்படைந்து உள்ளது.மேலும், பண்டிகை காலம் நெருங்குவதால், வாகன விற்பனையில் காணப்படும் விறுவிறுப்பு, வரும் மாதங்களில், மேலும், அதிகரிக்கும் என, எதிர்பார்க்கப்படுகிறது.மாருதி சுசூகி: சென்ற ஜூன் மாதத்தில், இந்நிறுவனத்தின் வாகன விற்பனை, 33.5 சதவீதம் வளர்ச்சி கண்டு, 1,12,773 ஆக அதிகரித்துள்ளது.

இது, கடந்தாண்டின் இதே மாதத்தில், 84,455 ஆக இருந்தது.இதன், உள்நாட்டு கார் விற்பனை, 31.1 சதவீதம் உயர்ந்து, 77,002லிருந்து, 1,00,964 ஆக அதிகரித்துள்ளது.கார் ஏற்றுமதி, 58.4 சதவீதம் வளர்ச்சி கண்டு, 7,453லிருந்து, 11,809 ஆக உயர்ந்துள்ளது.மகிந்திரா: இந்நிறுவனத்தின் வாகன விற்பனை, கணக்கீட்டு மாதத்தில், 38,092லிருந்து, 38,471 ஆக அதிகரித்து உள்ளது.இதன் கார் ஏற்றுமதி, 7 சதவீதம் வளர்ச்சி கண்டு, 1,885லிருந்து, 2,014 ஆக உயர்ந்துள்ளது.போர்டு: போர்டு இந்தியா நிறுவனத்தின் ஒட்டு மொத்த கார் விற்பனை, 11,935 ஆக அதிகரித்துள்ளது.

இது, கடந்தாண்டில் மேற்கொள்ளப்பட்ட விற்பனையை (8,771) விட, 36 சதவீதம் அதிகமாகும்.ஹோண்டா: சென்ற ஜூன் மாதத்தில், இந்நிறுவனத்தின் வாகன விற்பனை, 75 சதவீதம் அதிகரித்து, 16,316 ஆக உயர்ந்துள்ளது. கடந்தாண்டின் இதே மாதத்தில், இதன் விற்பனை, 9,297 ஆக இருந்தது.டொயோட்டா: மதிப்பீட்டு மாதத்தில், இந்நிறுவனத்தின் வாகன விற்பனை, 13,397 ஆக உள்ளது. இது, கடந்தாண்டின் இதே மாதத்தில் மேற்கொள்ளப்பட்ட விற்பனையை (13,805) காட்டிலும், 2.97 சதவீதம் குறைவாகும்.ஜெனரல் மோட்டார்ஸ்: இந்நிறுவனத்தின் வாகன விற்பனை, 21 சதவீதம் சரிவடைந்து, 6,575லிருந்து, 5,172 ஆக குறைந்துள்ளது.யமஹா: இருசக்கர வாகன தயாரிப்பில் ஈடுபட்டு வரும், யமஹா மோட்டார் இந்தியாவின் வாகன விற்பனை, கணக்கீட்டு மாதத்தில், 14 சதவீதம் வளர்ச்சி கண்டு, 35,561லிருந்து, 40,666 ஆக உயர்ந்துள்ளது.