மியூச்சுவல் ஃபண்டில் மட்டும் முதலீடு செய்தால் போதுமா?

மியூச்சுவல் ஃபண்ட் முதலீடு பற்றி சமீபத்தில் ஒரு வித்தியாசமான விளம்பரத்தைப் பார்த்திருப்பீர்கள். மியூச்சுவல் ஃபண்ட் முதலீடு என்பது ‘சர்வரோக நிவாரணி’ எனவும், நமது அனைத்துச் சேமிப்பு மற்றும் முதலீட்டு தேவைகளையும் நிறைவேற்றக்கூடியது எனவும், நான்கு நாள்கள் முதல் எத்தனை ஆண்டு காலத்துக்கு வேண்டுமானாலும் முதலீடு செய்யலாம் எனவும் அந்த விளம்பரத்தில் சொல்லப்படுகிறது. இந்த விளம்பரத்தில் சொல்லப்படுவதுபோல மியூச்சுவல் ஃபண்ட் முதலீடானது ஒருவரின் அனைத்துத் தேவைகளையும் நிறைவேற்றுமா என்கிற கேள்வி எழலாம். இந்தக் கேள்விக்கான பதிலைப் பார்ப்போம்.

பொதுவாக, மியூச்சுவல் ஃபண்ட் முதலீடு என்றாலே அது பங்குச் சந்தை சார்ந்தது; ரிஸ்க் மிகுந்தது என நம்மவர்கள் நினைக்கிறார்கள். ஆனால், இது உண்மை இல்லை. மியூச்சுவல் ஃபண்டில் பல்வேறு வகையான முதலீட்டுத் திட்டங்கள் இருக்கின்றன. ஒவ்வொரு வகை முதலீடும் வெவ்வேறு அளவு ரிஸ்க் கொண்டவை.



மியூச்சுவல் ஃபண்டுகளில் அதிக ரிஸ்க் உள்ளது பங்குச் சந்தை சார்ந்த திட்டங்கள் தான். இவை பணவீக்க விகிதத்தைவிட அதிக வருமானத்தைத் தரக் கூடியவை. அதேநேரத்தில், ஒருவரின் மொத்த முதலீட்டையும் பங்குச் சார்ந்த மியூச்சுவல் ஃபண்டில் போடுவது தவறு. ஒருவரின் வயதுக்கேற்ப, இந்த ஃபண்டில் முதலீட்டை மேற்கொள்ள லாம். அதாவது, உங்களின் வயதை நூறிலிருந்து கழித்து வரும் எண்ணை சதவிகிதமாகக் கருதி, அந்த அளவுத் தொகையைத்தான் முதலீடு செய்ய வேண்டும். உதாரணமாக, ஒருவருக்கு 40 வயது. அவர் பங்குச் சந்தை சார்ந்த ஃபண்டுகளில் 100-40=60 சதவிகிதத்துக்கு முதலீடு செய்ய வேண்டும். 40 வயதான அவர் ரூ.1 லட்சத்தை இந்த வகை ஃபண்டில் முதலீடு செய்யத் திட்டமிட்டிருந்தால், ரூ.60,000 மட்டுமே முதலீடு செய்ய வேண்டும். மீதியைக் கடன் சார்ந்த மியூச்சுவல் ஃபண்டுகள், தங்கம், ஃபிக்ஸட் டெபாசிட் போன்றவற்றில் பிரித்து முதலீடு செய்யலாம்.

மியூச்சுவல் ஃபண்டில் கடன் சார்ந்த திட்டங்கள், பேலன்ஸ்டு திட்டங்களில் (பங்குச் சந்தை மற்றும் கடன் திட்டங்களில் கலந்து முதலீடு செய்யப்படுவை) அதிக ரிஸ்க் கிடையாது. இந்தத் திட்டங்கள் பணவீக்க விகிதத்தைவிட சிறிது அதிக வருமானம் தருகின்றன.

லிக்விட் மியூச்சுவல் ஃபண்ட், கில்ட் ஃபண்ட், இன்கம் ஃபண்ட் போன்றவற்றில் ரிஸ்க் என்பது குறைவுதான். இவை ஃபிக்ஸட் டெபாசிட்டைவிட ஓரிரு சதவிகிதம் அதிக வருமானம் தரும். எனவே, மியூச்சுவல் ஃபண்டில் அதிக ரிஸ்க் இருக்கிறது என்று ஒதுங்கி இருக்கத் தேவையில்லை. மேலே கூறப்பட்ட ஃபண்டுகளில் 4 நாள்கள் முதல் எவ்வளவு நாள்களுக்கு வேண்டுமா னாலும் தேவைக்கேற்ப முதலீடு செய்யலாம். அதேசமயம், குறிப்பிட்ட மியூச்சுவல் ஃபண்டுகளில் குறிப்பிட்ட காலத்துக்கு முதலீடு செய்தால் மட்டுமே எதிர்பார்க்கும் லாபம் கிடைக்கும். குறிப்பாக, பங்குச் சந்தை சார்ந்த ஃபண்டுகளில் 3 முதல் 5 ஆண்டுக்கு மேல் முதலீடு செய்தால் மட்டுமே கணிசமான லாபத்தைப் பெற முடியும்.

லிக்விட் ஃபண்டுகளில் எப்போது வேண்டுமானா லும் பணத்தைப் போடலாம், எடுக்கலாம். இதில் ஆண்டுக்கு சுமார் 7% வருமானம் கிடைக்கும். வங்கிச் சேமிப்புக் கணக்குக்கு மாற்றாக இதில் முதலீடு செய்யலாம். வங்கிச் சேமிப்புக் கணக்கில் 4% வட்டி கிடைக்கும் நிலையில், இதில் 7% வருமானம் என்பது கூடுதல் லாபம்தானே?

முதலீட்டு ஆலோசகர் வ.நாகப்பன், ‘‘இன்றைக்கு பங்குச் சந்தையில் சுமார் 95 சதவிகித இந்தியர்கள் முதலீடு செய்யவில்லை. அதற்குக் காரணம், நேரமின்மை, முதலீட்டை முழுமையாகப் புரிந்துகொள்ளும் திறனின்மை போன்றவை காரணங்களாக உள்ளன. இப்போது ஃபிக்ஸட் டெபாசிட் (எஃப்டி) மூலமான வருமானமும் சொல்லிக்கொள்ளும்படி இல்லை. ஐந்தாண்டு கால எஃப்டி வட்டி 7% அளவுக்குக் குறைந்துவிட்டது. அந்த வகையில், நடுத்தர மக்கள் தங்கள் முதலீட்டின் ஒரு பகுதியை பங்குச் சந்தை சார்ந்த மியூச்சுவல் ஃபண்ட் திட்டங்களில் போட வேண்டும்.



இந்த ஈக்விட்டி மியூச்சுவல் ஃபண்டுகளில் ரிஸ்க் இல்லை என்று சொல்லமுடியாது. பங்குச் சந்தையைவிடக் குறைவான ரிஸ்க் இருக்கிறது.

சிறப்பாக நிர்வகிக்கப்பட்டு வரும் நல்ல மியூச்சுவல் ஃபண்டுகளைத் தேவைக்கேற்ப தேர்ந்தெடுத்து, நீண்ட காலத்துக்கு முதலீடு செய்து வருவது அவசியம். ரிஸ்க் எடுக்கும் திறன், மனநிலை, மியூச்சுவல் ஃபண்ட் பற்றி அறிவு ஆகியவற்றின் அடிப்படையில் உங்களுக்கேற்ற ஃபண்டுகளைத் தேர்வுசெய்வது அவசியம். நடுத்தர குடும்பத்தில் மாதம் தலா 1,000 ரூபாயை அதாவது 3,000 ரூபாயை டைவர்சிபைடு ஃபண்ட், பேலன்ஸ்டு ஃபண்ட், இண்டெக்ஸ் ஃபண்டுகளில் முதலீடு செய்து வர வேண்டும்.

டைவர்சிபைடு ஃபண்டுகளில் முதலீடு பல்வேறு பங்குகளில் பிரித்து செய்யப்படுவதால், ரிஸ்க் குறைகிறது. பேலன்ஸ்டு ஃபண்டில் முதலீட்டின் ஒரு பகுதி, அதாவது சுமார் 30% தொகை ஃபிக்ஸட் டெபாசிட், பாண்டுகளில் முதலீடு செய்யப்படுவதால் ரிஸ்க் குறைகிறது. இண்டெக்ஸ் ஃபண்டுகளில் முக்கிய பெரிய நிறுவனப் பங்குகளில் முதலீடு செய்யப்படுவதால் ரிஸ்க் குறைவாக இருக்கும். மேலும், இந்த ஃபண்டுகள் மூலம் கிடைக்கும் வருமானத்துக்கு ஓராண்டுக்குப் பிறகு வரி எதுவும் கிடையாது என்பது கூடுதல் சிறப்பு” என்றார்.

பிர்லா மியூச்சுவல் ஃபண்ட் தலைமை செயல் அதிகாரி ஏ.பாலசுப்பிரமணியன், ‘‘மியூச்சுவல் ஃபண்டுகளில் செய்யப்பட்ட முதலீடு நீண்ட காலத்தில் அதிக லாபம் தந்திருப்பது நிரூபிக்கப்பட்டுள்ளது. குழந்தைகளின் கல்வி, திருமணச் செலவுகள், வீடு வாங்க, கார் வாங்க என பல இலக்குகளை நிறைவேற்ற மியூச்சுவல் ஃபண்ட் முதலீட்டைத் தேர்வு செய்யலாம். மியூச்சுவல் ஃபண்டில் பல்வேறு தேவைகளுக்கு பல்வேறு திட்டங்கள் இருக்கின்றன” என்றார்.

மியூச்சுவல் ஃபண்ட் திட்டங்கள் ரிஸ்க்கானது என்று நினைத்து ஒதுங்கி இருப்பதைவிட, அதிலுள்ள ரிஸ்க்கினைப் புரிந்துகொண்டு, அதற்கேற்ப முதலீடு செய்வதே சரி.

மியூச்சுவல் ஃபண்டில் நீங்கள் முதலீடு செய்ய தயாரா?