குழந்தை பிறந்தாச்சு... முதலீட்டைத் தொடங்கியாச்சா..?

‘‘என் பொண்ணு பிளஸ் டூவுல 1,150 மார்க் வாங்கியிருக்கா... ஆனா காலேஜ்ல சேர்க்க காசு இல்லை. ஏதாவது டிப்ளமோ கோர்ஸ்தான் சேர்க்கணும்” என புலம்பித் தவிக்கும் பெற்றோர்கள் ஏராளம். அதே போல் மகனுக்கோ, மகளுக்கோ திருமண ஏற்பாடுகளைச் செய்துவிட்டு செலவுக்கு பணம் இல்லாமல் கடன் வாங்க அலையும் பெற்றோர்களும் ஏராளம்.

இப்படித் தும்பைவிட்டு வாலைப் பிடித்த கதையாகத் திண்டாடி நிற்பதை விட குழந்தை பிறந்தவுடனேயே மேற்படிப்புக்கும், திருமணத்துக்கும் என முதலீட்டினைத் தொடங்கிவிட்டால், பின்னாட்களில் சிரமப்பட வேண்டியதில்லை. மிகச் சுலபமாகவும், மகிழ்ச்சியாகவும் காரியங்களை செய்து முடிக்கலாம்.

உதாரணமாக, தற்போதைய நிலையில் உயர்கல்விக்கு தோராயமாக வருடத்துக்கு ரூ.2 லட்சம் தேவை. 6 வருடம் உயர்கல்வி படிப்பார்கள் என்று எடுத்துக் கொள்ள லாம். அதேபோல், திருமணத்துக்கு ரூ.10 லட்சம் தற்போதைய நிலையில் தேவை என்று வைத்துக் கொள்வோம்.

எதிர்காலத்தில் தேவைப்படும் தொகையைச் சேர்க்க மியூச்சுவல் ஃபண்ட் முதலீட்டைப் போல, வேறு எந்த முதலீட்டிலும் சேர்க்க முடியாது. குழந்தை இப்போதுதான் பிறந்திருப்பதால், மியூச்சுவல் ஃபண்டில் பங்குச் சந்தை சார்ந்த திட்டங்களில் முதலீடு செய்வதன் மூலம் வேறு திட்டங்களில் கிடைக்கும் வருமானத்தைவிட கூடுதல் வருமானம் பார்க்க முடியும்.

இதற்கு, முதலில் உங்களுக்கான மியூச்சுவல் பண்ட் திட்டங்களை தீர்மானித்துக்கொள்ளுங்கள். முதல் ஆப்ஷனாக பிர்லா சன் லைஃப் பேலன்ஸ்டு 95 ஃபண்ட் (குரோத்), ஹெச்டிஎஃப்சி புரூடென்ஷியல் ஃபண்ட் (குரோத்) என இரண்டு பேலன்ஸ்டு ஃபண்டுகளில் முதலீடு செய்வதாக எடுத்துக்கொள்வோம். இரண்டாவது ஆப்ஷனாக, ஃப்ராங்க்ளின் இந்தியா பிரைமா ப்ளஸ் (குரோத்), ஐடிஎஃப்சி பிரீமியர் ஈக்விட்டி ஃபண்ட் (குரோத்) போன்ற ஈக்விட்டி ஃபண்டுகளில் முதலீடு செய்வதாகக் கொள்வோம்.



எதிர்காலத்தில் தேவைப்படும் தொகை, தேவைப்படும் காலகட்டம் போன்றவற்றை பணவீக்க விகிதத்துடன் கணக்கிட்டு மாதம் எவ்வளவு முதலீடு செய்யவேண்டும் என்பதை முடிவு செய்துகொள்ளலாம். (பார்க்க அட்டவணை 1)



இவ்வளவு பெரிய தொகையை ஆரம்பம் முதலே என்னால் முதலீடு செய்ய முடியாது என்பவர்கள் குறைந்த தொகையில் ஆரம்பித்து, ஒவ்வொரு ஆண்டும் சம்பள உயர்வின்போது முதலீட்டுத் தொகையை அதிகரித்துக்கொள்வதன் மூலம் நம் தேவையை நிறைவேற்றிக்கொள்ள முடியும் (பார்க்க அட்டவணை - 2).

உங்களுக்குக் குழந்தை பிறந்தாச்சா... இப்போதே திட்டமிட்டு முதலீட்டைத் தொடங்குங்கள். எதிர்காலம் பற்றிய கவலையை விடுங்கள்!