லைஃப், ஹெல்த் இன்ஷுரன்ஸ்... காம்போ திட்டத்துக்கு தடை!

2012-ம் ஆண்டில் ஐஆர்டிஏஐ (IRDAI) லைஃப் மற்றும் ஹெல்த் இன்ஷுரன்ஸ் காம்போ பிளானை அறிமுகப்படுத்தியது. இத்தகைய பிளானில், லைஃப் இன்ஷுரன்ஸ் நிறுவனங்கள் ஏதேனும் ஒரு ஹெல்த் இன்ஷூரன்ஸ் நிறுவனத்துடன் கைகோர்த்து, லைஃப் மற்றும் ஹெல்த் இன்ஷூரன்ஸ் இரண்டையும் ஒரே பிளானாக கொடுக்க நிபந்தனை விதித்திருந்தது. இது   மருத்துவச்    செலவுகளை ஈடு செய்யும் பாலிசி ஆகும்.



இந்த பாலிசியை எடுத்தவர்கள் ஏதேனும் நோய் வாய்ப்பட்டு மருத்துவமனையில் சிகிச்சை மேற்கொள்ளும் வகையில், பாலிசிதாரர் சிகிச்சைக்குண்டான செலவினை செலுத்திவிட்டு, அந்த செலவினை இன்ஷூரன்ஸ் நிறுவனத்தின் மூலம் க்ளைய்ம் செய்து கொள்ளலாம்.

அதே போல, பாலிசிதாரருக்கு உயிர் சேதம் ஏற்பட்டால், பாலிசியின் மொத்த காப்பீட்டுத் தொகையும் அவரது குடும்பத்துக்குப் போய் சேரும்.

சுருக்கமாக, இந்த வகை காம்போ பிளானானது லைஃப் மற்றும் ஹெல்த் இன்ஷூரன்ஸ் கலந்த ஒரு யூலிப் (ULIP) பாலிசி ஆகும்.

ஐஆர்டிஏஐ-ன் சமீபத்திய அறிவிப்பில், இந்த பாலிசிகளை ரத்து செய்யுமாறு லைஃப் இன்ஷூரன்ஸ் நிறுவனங்களுக்கு கட்டுப்பாடு வெளியிட்டுள்ளது. இதனால் லைஃப் இன்ஷூரன்ஸ் நிறுவனங்கள், மூன்று மாத காலத்தில், இந்த வகையான காம்போ பிளான்களை விற்பதை நிறுத்த வேண்டும் என ஐஆர்டிஏஐ உத்தரவிட்டுள்ளது.

இதே போல, மருத்துவமனையில் சிகிச்சை எடுத்துக் கொள்ளாமல் இழப்பீடு பெறும் (indemnity-based health products) பாலிசிகளையும் ஐஆர்டிஏஐ தடை செய்துள்ளது.

எனினும், ஏற்கெனவே இந்த பாலிசி எடுத்தவர்கள், பாலிசி காலம் முடியும் வரை தொடர்வதற்கும் வழிவகுத்துள்ளது. ஐசிஐசிஐ, அவிவா மற்றும் எல்ஐசி நிறுவனங்கள் இந்த வகையான யூலிப் பாலிசிகளை விநியோகித்து வருகிறது.

இந்த வகையான பாலிசிகளில் உள்ள குறைகள் என்னவென்றால், ஒரு ஹெல்த் இன்ஷூரன்ஸ் பாலிசியை எடுப்பதன் நோக்கமே, அவசர காலத்தில் மருத்துவமனையில் அனுமதிக்கப்படும்போது, மருத்துவச் செலவுகளை அந்த பாலிசியின் மூலம் பெறுவதற்கே.

ஆனால், மேற்கூறிய பாலிசிகள் மூலம் உடனடியாக சிகிச்சைக்குப் பணம் கிடைக்காது என்பதால், இதன் மூலம் பெரிய அளவில் பலனில்லை.

ஆகவே, உங்களிடம் இந்த வகையான காம்போ பிளான் இருந்து, பாலிசியின் பிரீமியம் 5 வருடங்களுக்கு மேல் கட்டியிருந்தால், பாலிசியை சரண்டர் செய்யலாம். அல்லது, மேற்கொண்டு பிரீமியம் செலுத்தாமல், பாலிசி முதிர்வடையும் போது முதிர்ச்சித் தொகையை வாங்கிக் கொள்வது நல்லது.

மேலும், உங்கள் குடும்பத்தில் உள்ளவர் களை கவர் செய்யும் ஒரு ஃபேமிலி ஃப்ளோட்டர் ஹெல்த் இன்ஷூரன்ஸ் எடுத்துக்கொண்டு, வேலை செய்யும், பணம் சம்பாதிக்கும் நபருக்கு டேர்ம் இன்ஷூரன்ஸ் எடுத்துக் கொள்வது மிகவும் நல்லது.

இன்றைக்கு மருத்துவச் செலவு மிக அதிகமாக ஆவதால், அதற்கென ஒரு இன்ஷூரன்ஸ் பாலிசி இல்லாமல் இருப்பது நல்லதல்ல!