கடன்... சிபில்... மிரட்டல்... தப்புவது எப்படி?

வீட்டுக்குத் தேவையான பிரிட்ஜ், வாஷிங்மெஷின், ஏசி என அனைத்துப் பொருட்களையும் ஒவ்வொன்றாக தவணைமுறையில் வாங்கிவிட நினைத்தார் நிர்மலா. ஜீரோ பெர்சன்ட் இன்டரஸ்ட் என கம்பெனி கள் விரித்த வலையில் விழுந்தார். கையில் இருக்கும் 10,000 ரூபாய் பணத்தை வைத்து பிரிட்ஜ், வாஷிங்மெஷின், ஏசி என மூன்று பொருட்களும் கிடைக்கிறதே, இந்த வாய்ப்பைத் தவறவிடக்கூடாது என சட்டென்று காட்டிய இடத்தி லெல்லாம் கையெழுத்துப் போட்டு விட்டு, கம்பெனி சொல்லும் நிபந்தனை கள் எதையும் சரியாக தெரிந்து கொள்ளாமல், பொருட்களை வீட்டுக்கு எடுத்துச் சென்றார்.

பொருட்களை எடுத்துச் சென்று பயன்படுத்த ஆரம்பித்த ஒருமாத காலம் எந்தப் பிரச்னையும் இல்லாமல் சென்றது. பிற்பாடுதான் பிரச்னையே ஆரம்பமானது. நிர்மலா வாங்கிய கடனுக்கான பணத்தைத் திரும்பச் செலுத்த இசிஎஸ் படிவத்தைப் பூர்த்திசெய்து தந்திருந்தார். இசிஎஸ் தேதிக்கு ஒருநாள் முன்பே அதற்கான பணத்தை வங்கிக் கணக்கில் வைத்திருந்தும், கடன் தந்த நிறுவனம் பணத்தை எடுக்கவில்லை. பணத்தை ஏன் எடுக்காமல் இருக்கிறார்கள் என்று தெரியாமல் தவித்தார் நிர்மலா.

இந்த நிலையில் நிர்மலாவின் வீட்டுக்கு கடன் தந்த நிறுவனத்திடமிருந்து ஒரு தபால் வந்தது. வங்கிக் கணக்கில் போதிய பணம் வைக்கவில்லை என்று குற்றஞ்சாட்டி, கணிசமான தொகையை அபராதமாக விதித்து, இசிஎஸ் தொகையோடு கட்டச் சொன்னார்கள். வங்கியில் விசாரித்த போது, உங்கள் கணக்குக்கு எந்தவிதமான இசிஎஸ் படிவமும் வரவில்லை என்றார்கள். தவிர, தவணைக்கான பணம் கணக்கில் இருக்கவே செய்தது



கடன் தந்த நிறுவனத்துக்கு உடனே போன் செய்து கேட்டபோது, அபராதம் விதித்தது விதித்ததுதான். ஒழுங்காக கட்டுங்கள். இல்லாவிட்டால் உங்கள் பெயரை சிபிலில் ஏற்றிவிடுவோம். இதனால் நீங்கள் வேறு எங்கும் கடன் வாங்க முடியாத நிலை உருவாகும் என்று மிரட்ட, ஆடிப்போனார் நிர்மலா.

கடன் வாங்கிய ஒருவரை இப்படி மிரட்டுவது சரியா, இதுபோன்ற சூழ்நிலையில் நாம் என்ன செய்ய வேண்டும் என்பது குறித்து சிட்டிசன் கன்ஸ்யூமர் அண்ட் சிவிக் ஆக்‌ஷன் குரூப் அமைப்பின் ஒருங்கிணைப் பாளர் சரோஜாவிடம் கேட்டோம்.

“கடன் வாங்கிய நிறுவனம் இப்படிச் செய்வது முற்றிலும் தவறு. இதுபோன்ற பிரச்னைகளுக்கு முறையான அணுகுமுறை அவசியம். அதாவது, அந்த நிறுவனத்தின் அனைத்து செயல்பாடு களுக்கும் எழுத்துப்பூர்வமாகப் பதில் அளிப்பது அவசியம். அப்போதுதான் பிரச்னைகளை சட்டரீதியாக எதிர்கொள்ள முடியும்.

கடன் வாங்கிய நிறுவனம் அனுப்பும் மெயிலுக்கு, முறையான ஆதாரத்துடன் பதில் போடுவது முக்கியம். வங்கிக் கணக்கில் இருப்பு இல்லை. எனவே, அபராதம் விதித்திருக்கிறார்கள் எனில், உங்கள் வங்கிக் கணக்கில் பணம் இருந்ததற்கான விவர அறிக்கையை வாங்கி, அதைக் கடன் வாங்கிய நிறுவனத்துக்கு மெயில் அல்லது கடிதம் மூலமாக அனுப்பலாம். இப்படி அனுப்பும்போது அனைத்தையும் ஒரு நகல் எடுத்து வைத்துக்கொள்வது நல்லது.



வங்கிக் கணக்கில் இருப்பு இருந்ததற்கான ஆதாரத்தை மெயில் அனுப்பும்போது, ‘குறிப்பிட்ட தேதியில் என்னுடைய வங்கிக் கணக்கில் சரியான இருப்பு இருந்துள்ளது; நீங்கள் தவறாகக் குறிப்பிட்டு எனக்கு அபராதம் விதித்திருக்கிறீர்கள். இந்த அபராதத்தை நீக்க வேண்டும். இதனால் எந்தவிதமான பிரச்னையும் எதிர்காலத்தில் எனக்கு வரக்கூடாது’ என்று குறிப்பிட வேண்டும். அபராதத்தை நீக்கி அதற்கான கடிதத்தை கடன் வாங்கிய நிறுவனத்திடம் இருந்து வாங்கி வைத்துக்கொள்ள வேண்டும்.

எந்த விதத்திலும் வாய்வழியாக எந்த பரிவர்த்தனையும் செய்யக்கூடாது. மேலும், அந்த நிறுவனத்தில் இருந்துவரும் அழைப்புகளைத் தவிர்க்காமல், அதற்கு பதில் கூறுவது அவசியம். பெரும்பாலான வாடிக்கையாளர் சேவை மையங்கள் ஆங்கிலம் மற்றும் இந்தி மொழியை வாடிக்கையாளர்களிடம் பேசுகிறார்கள். இது தவறு.

அந்தந்த மாநிலங்களில் வழக்குமொழியாக உள்ள மொழியில் தான் வாடிக்கையாளாிடம் பேச வேண்டும். இந்த வசதி இல்லாத நிறுவனத்தின் தலைமைக்கு வாடிக்கை யாளர் தனக்குத் தெரிந்த மொழியில் பேசுவதற்கு ஒருவரை நியமிக்கும்படி கடிதம் எழுதலாம். அல்லது கோரிக்கையை எழுத்துப்பூர்வமாக அனுப்பும்படி கேட்கலாம்.

மேலும், வாடிக்கையாளர் சேவை மையத்தை சில நிறுவனங்கள் அவுட்சோர்ஸிங் செய்துவிடுகின்றன. இப்படி செய்வதை மாற்ற வேண்டும் என்கிற நிர்பந்தத்தை வாடிக்கை யாளர்கள் உருவாக்கினால், இந்தப் பிரச்னைக்கு தீர்வு கிடைக்கும்’’ என்ற வரிடம், கடனைக் கட்டாவிட்டால் சிபில் பட்டியலில் உங்கள் பெயரை ஏற்றிவிடுவோம் என்று மிரட்டும் நிறுவனங்கள் மீது நடவடிக்கை எடுக்க முடியுமா என்று கேட்டோம்.

‘‘சிபில் என்பது தகவல்களைப் பதிவு செய்யும் ஓர் அமைப்புதான். அதாவது, வங்கிகள், வங்கி அல்லாத நிதி நிறுவனங் கள் தரும் தகவல்கள் அப்படியே எந்தவிதமான மாற்றமும் இல்லாமல் சிபிலில் பதிவு செய்யப்படும். இதில் ஏதாவது தவறு ஏற்பட்டால், அதற்கு அந்தத் தகவல்களை வழங்கும் நிறுவனம்தான் பொறுப்பு.

அந்தத் தவறை வாடிக்கையாளர்களே சரிசெய்ய முடியாது. கடன் வாங்கிய நிறுவனம் மூலமாகத்தான் சரிசெய்ய முடியும். மேலும், தவறாகத் தகவல் அளித்த நிறுவனத்தின் மீது சிபிலில் புகார் அளிக்க முடியாது. இதுபோன்ற புகார்களை நுகர்வோர் நீதிமன்றத்தில் வழக்காகப் பதிவு செய்ய முடியும்” என்றார்.

கடன் வாங்கும்போதும், கடனை திரும்பச் செலுத்தும்போதும் கவனமாக இருந்துவிட்டால், இதுமாதிரியான மிரட்டல்களுக்கு நாம் பயப்பட வேண்டிய அவசியமே இருக்காது.