காப்பீட்டு துறையில் நிபந்தனையுடன்49 சதவீத அன்னிய முதலீட்டிற்கு அனுமதி

by தருண் Sat Jul 12, 2014 11:29 am

காப்பீட்டு துறையில், நிபந்தனையுடன், 49 சதவீதம் அன்னிய நேரடி முதலீட்டிற்கு அனுமதி வழங்க, மத்திய அரசு முடிவு செய்துள்ளது. இதன்படி, இந்திய நிறுவனத்தில், அன்னிய நிறுவனமொன்று, 49 சதவீதம் முதலீடு செய்தாலும், பங்கு மூலதனம் அடிப்படையிலான வாக்குரிமை, 26 சதவீதமாகவே இருக்கும் என, நிதியமைச்சக அதிகாரி ஒருவர் தெரிவித்தார்.

வாக்குரிமை:2008ம் ஆண்டின் திருத்தப்பட்ட காப்பீட்டு சட்டம், காப்பீட்டு நிறுவனங்களில் அன்னிய முதலீட்டை, தற்போதைய, 26 சதவீதத்தில் இருந்து, 49 சதவீதமாக, அதே அளவிற்கான வாக்குரிமையுடன் உயர்த்த வகை செய்கிறது.
இதில் சட்ட திருத்தம் செய்து, பங்கு முதலீடு அடிப்படையிலான அன்னிய நிறுவனங்களின் வாக்குரிமையை, 26 சதவீதம் என்ற அளவிலேயே வைக்க, மத்திய நிதியமைச்சகம் திட்டமிட்டுஉள்ளது.அன்னிய முதலீட்டை பெறும் இந்திய நிறுவனத்தில், தலைமை செயல் அதிகாரி நியமனத்திற்கு ஒப்புதல் வழங்கும் உரிமை, இந்திய பங்கு முதலீட்டாளர்களுக்கு மட்டுமே உண்டு; நிறுவனத்தின் பெரும்பான்மை இயக்குனர்கள், இந்தியர்களாக இருக்க வேண்டும் என்பது உள்ளிட்ட விதிமுறைகளும், சட்டத்தில் இடம் பெற உள்ளன.

காப்பீட்டு துறையில், மேற்கண்ட அம்சங்களுடன் அன்னிய முதலீட்டை உயர்த்துவது குறித்த வரைவறிக்கையை, நிதிச்சேவைகள் துறை தயாரித்துள்ளது. இது, முக்கிய அமைச்சகங்களின் பார்வைக்கு அனுப்பி வைக்கப்பட்டுள்ளது என, அந்த அதிகாரி மேலும் கூறினார்.

வரம்பு:காப்பீட்டு துறையில் அன்னிய முதலீட்டு வரம்பை உயர்த்துவதன் மூலம், அதிக அளவில் முதலீடு தேவைப்படும் காப்பீட்டு நிறுவனங்கள் பயன் பெறும் என, எதிர்பார்க்கப்படுகிறது.

-தினமலர்

காப்­பீட்டு துறையில் நிபந்­த­னை­யுடன்49 சத­வீத அன்­னிய முத­லீட்­டிற்கு அனு­மதி