பெண் குழந்தையுள்ள குடும்பங்களுக்கு சிறப்பு மருத்துவ காப்பீடு: நியூ இந்தியா அறிவிப்பு

பெண் குழந்தைகள் மட்டும் உள்ள குடும்பங்களுக்கு சிறப்பு மருத்துவ காப்பீட்டு திட்டத்தை நியூ இந்தியா அஷ்யூரன்ஸ் நிறுவனம் அறிவித்திருக்கிறது.

பொதுத் துறையைச் சேர்ந்த நியூ இந்தியா அஷ்யூரன்ஸ் காப்பீட்டு நிறுவனம், சர்வதேச மகளிர் தினத்தையொட்டி "நியூ இந்தியா ஆஷா கிரண்' என்ற மருத்துவ காப்பீட்டு திட்டத்தை அறிவித்திருக்கிறது. இது குறித்து நிறுவனத்தின் தலைவரும் நிர்வாக இயக்குநருமான ஜி. ஸ்ரீநிவாசன் தெரிவித்திருப்பது:

பெண் குழந்தைகள் மட்டும் உள்ள குடும்பங்கள் "நியூ இந்தியா ஆஷா கிரண்' காப்பீட்டுத் திட்டத்தைப் பெறலாம். பெண் குழந்தைகளுக்கு காப்பீடு செய்து, பாதுகாப்பு அளிக்கும் வகையில் உருவாக்கப்பட்டுள்ளதால், சிறப்புத் தள்ளுபடியுடன் இதன் பிரீமியம் தொகை குறைவாகவே இருக்கும். பிரீமியம் தொகையில் ஐம்பது சதவீதம் வரை தள்ளுபடி அளிக்கப்படுகிறது. வீட்டு வேலை செய்யும் பெண்களுக்கான காப்பீட்டு திட்டம் விரைவில் வாடிக்கையாளர்களுக்காக வெளியிடப்படும் என்று அவர் கூறினார்.