யாருக்கு எந்த பாலிசி..?

இன்றைக்கு ஒருவர் வேலையில் இருந்தாலும், இல்லாவிட்டாலும் அவரிடம் ஹெல்த் இன்ஷூரன்ஸ் பாலிசி இருப்பது அவசியம். காரணம், வருடத்துக்கு வருடம் எகிறும் மருத்துவச் செலவு. அந்த வகையில், யார் எந்த பாலிசியை எடுக்கலாம் என்று சொல்கிறார் நேஷனல் இன்ஷூரன்ஸ் கம்பெனியின் முதுநிலை கோட்ட மேலாளர் (சென்னை மண்டலம்) சுப்பராமன்.


தனிநபர் பாலிசி!

''ஆண், பெண் இருவருமே 21 வயதில் தனிநபர் பாலிசி எடுக்கலாம். வேலைக்குச் சேர்ந்தவுடன் கிடைக்கும் வாய்ப்பு வசதியைப் பொறுத்து சுமார் 2 லட்ச ரூபாய்க்கு கவரேஜ் இருப்பது போல் எடுத்துக்கொள்ளலாம். 2 முதல் 5 வருடம் கழித்து இந்த கவரேஜை 5 லட்ச ரூபாய் வரை அதிகரித்துக்கொள்ளலாம். தற்போது 10 லட்ச ரூபாய் வரைக்கும் தனிநபர் பாலிசிகளை பொதுக் காப்பீடு நிறுவனங்கள் வழங்குகின்றன. தனிநபர் பாலிசியை இளம்வயதிலேயே எடுப்பது நல்லது. 40, 45 வயதில் அதிக கவரேஜ் தர பல நிறுவனங்கள் தயங்கும்.

அடுத்து, கல்யாணமாகி குடும்பமாகும்போது துணைவருக்கு தனியாக ஒரு தனிநபர் பாலிசி எடுத்துக்கொள்வது ஒரு வகை. அல்லது ஏற்கெனவே இருக்கும் பாலிசியில் கணவன் அல்லது மனைவியைச் சேர்த்துக் கொண்டு அதை ஃப்ளோட்டர் பாலிசியாக மாற்றலாம்.

ஃப்ளோட்டர் பாலிசி!

ஃப்ளோட்டர் பாலிசியை கணவன், மனைவி மற்றும் இரு குழந்தைகளை சேர்த்து எடுக்கலாம். பொதுவாக, ஃப்ளோட்டர் பாலிசியில் 2 லட்ச ரூபாய் தொடங்கி 5 லட்ச ரூபாய் வரைக்கும் பாலிசி எடுக்க முடியும். இந்த பாலிசியில் கவரேஜ் தொகையை குடும்பத்தில் தேவைப்படும் நபருக்கு பயன்படுத்திக்கொள்ள முடியும். ஒருவருக்கு செலவான தொகை போக மீதமிருக்கும் தொகையை இன்னொருவருக்குப் பயன்படுத்திக்கொள்வது போல் இருக்கும். அல்லது ஆளுக்கு இவ்வளவு தொகைக்கு சிகிச்சை எடுத்துக்கொள்ளலாம் என்று இருக்கும். உங்களின் குடும்பத் தேவைக்கு ஏற்ப பாலிசி எடுத்துக்கொள்ளுங்கள்.

சீனியர் சிட்டிசன் பாலிசி!

60 வயதுக்கும் மேற்பட்ட மூத்தக் குடிமக்களுக்கான பாலிசி இது. இந்த சிறப்புத் திட்டத்தில் 61 - 70 வயதானவர்கள் சேரலாம். அதன்பிறகு சேர்த்துக்கொள்ள மாட்டார்கள். அதனால் வயதானவர்கள் இந்த வயதுக்குள்ளாவது ஹெல்த் பாலிசி எடுத்துக்கொண்டால்தான் பெரிய மருத்துவச் செலவுகளை ஓரளவுக்குச் சமாளிக்க முடியும். சர்க்கரை, ரத்த அழுத்தம், இதய நோய்களுக்கான மருத்துவப் பரிசோதனை செய்து அறிக்கை தருவது அவசியம். மூத்தக் குடிமக்களுக்கான பாலிசியில் மருத்துவமனை செலவு மற்றும் தீவிர நோய்களுக்கு தனித் தனியாக கவரேஜ் இருக்கும். இந்த பாலிசியில் எடுத்த 90 நாட்களுக்குள் தீவிர நோய் பாதிப்பு இருப்பதாகக் கண்டுபிடிக்கப்பட்டு சிகிச்சை பெற்றால் கிளைம் கிடைக்காது. மேலும், தீவிர நோய் பாதிப்புக்கு சிகிச்சை எடுப்பவர்கள் 30 நாட்கள் உயிருடன் இருந்தால்தான் சிகிச்சைக்கான செலவு கிடைக்கும்.

குரூப் இன்ஷூரன்ஸ்!

பெரிய நிறுவனங்கள் அவற்றின் பணியாளர்கள் மற்றும் அவர்களின் குடும்பத்தினருக்கு (கணவன்/மனைவி, இரு குழந்தைகள்) மற்றும் சார்ந்திருக்கும் பெற்றோருக்கு என குரூப் ஹெல்த் இன்ஷூரன்ஸ் பாலிசியை எடுத்துத் தருகின்றன. இந்த பாலிசி, மற்ற பாலிசிகளை போல் இல்லாமல் உடனடியாக அமலுக்கு வந்துவிடும். மேலும், யாருக்கும் மருத்துவப் பரிசோதனை கிடையாது. இதில் ஏற்கெனவே உள்ள நோய்களுக்கும் கிளைம் கிடைக்கும். பிரசவச் செலவுகளுக்கும் கிளைம் கிடைக்க வாய்ப்பு இருக்கிறது.
சில குடும்பங்களில் வேலை பார்க்கும் கணவருக்கு மட்டும் ஹெல்த் இன்ஷூரன்ஸ் பாலிசி எடுக்கிறார்கள். அது தவறு. விபத்து அல்லது நோய் பாதிப்பு என்பது யாருக்கு வேண்டுமானாலும் எப்போதும் வரலாம். இதனைத் தவிர்க்க எல்லோருக்கும் பாலிசி எடுப்பது நல்லது.

குரூப் இன்ஷூரன்ஸ் பாலிசியை ஒரு நிறுவனம் பணியாளருக்கு எடுத்துத் தந்திருந்தாலும், வேறொரு ஹெல்த் பாலிசி எடுப்பதுவும் அவசியம். காரணம், ஒரு நிறுவனத்திலிருந்து வேறு நிறுவனத்துக்கு வேலை மாறும்போது, இடைப்பட்ட காலத்தில் ஏதாவது அசம்பாவிதம் ஏற்பட்டால் மருத்துவச் செலவு கையைக் கடித்துவிடும். அந்த வகையில் அலுவலக குரூப் பாலிசி தவிர, தனியாக ஒரு பாலிசியை எடுத்து வைத்துக்கொள்வது அவசியம். அடுத்து, அலுவலக பாலிசியில் கவரேஜ் தொகை போதிய அளவில் இல்லை என்றால் நாம் தேவையான அளவுக்கு தனியாக பாலிசி எடுப்பது நல்லது.

உங்கள் தேவைக்கேற்ற பாலிசியைத் தேர்வு செய்து மருத்துவச் செலவை குறையுங்களேன்!