ஒட்டகச்சிவிங்கியாய் நிற்கும் கிரெடிட் ஆப்பர்ச்சூனிட்டீஸ் ஃபண்ட்!

வங்கி ஃபிக்ஸட் டெபாசிட்டுக்கு நிகரான ஃபண்ட் திட்டம் ஏதும் இருக்கிறதா (எஃப்.எம்.பி. திட்டங்கள் தவிர்த்து) என்று தேடும் மியூச்சுவல் ஃபண்ட் முதலீட்டாளர்களுக்கு புதிய வாய்ப்பாக வந்திருக்கிறது கிரெடிட் ஆப்பர்ச்சூனிட்டீஸ் ஃபண்டுகள். அது என்ன கிரெடிட் ஆப்பர்ச்சூனிட்டீஸ் ஃபண்ட்?

குறுகியகால கடன் திட்டம்!

குறுகியகால கடன் திட்டங்கள் மற்றும் இன்கம் ஃபண்டுகள் கேட்டகிரியில் வரும் இவை, கடன் சார்ந்த மியூச்சுவல் ஃபண்டுகளில் ஒரு வகை. இத்திட்டங்கள் கார்ப்பரேட் நிறுவனங்களின் கிகி ரேட்டிங் மற்றும் அதற்கு மேலான கிரெடிட் ரேட்டிங் கொண்ட, கடன் பத்திரங்களில் முதலீடு செய்கின்றன. முதலீடுகள் பெரும்பாலும் 2-5 வருட மெச்சூரிட்டி உடையவையாக உள்ளன. இத்திட்டங்கள் தங்களது முதலீட்டை முதிர்வடையும்வரை வைத்திருக்கின்றன. அரசாங்க கடன் பத்திரங்களில் இவை முதலீடு செய்வதில்லை என்பதால் வட்டி சார்ந்த ரிஸ்க் குறைவு. 18 மாதங்களுக்கும், நீண்டகால அடிப்படையில் நிலையான வருமானம் எதிர்பார்க்கிறவர்களுக்கு இத்திட்டம் மிகவும் ஏற்றது.

யாருக்கு உகந்தது?

அதிக வருமான வரி வரம்பில் உள்ளவர்கள், இரட்டைச் சம்பளக்காரர்கள், ஹெச்.என்.ஐ. என்று சொல்லக்கூடிய ஹை நெட்வொர்த் நபர்கள், அதிக வருமான வரம்பில் இருக்கும் ஓய்வுற்றவர்கள், போர்ட்ஃபோலியோவில் ஸ்திரத்தன்மையை நாடுபவர்கள், கடன் முதலீடுகளிலிருந்து அதிகமான வரிக்குப் பிந்தைய வருமானத்தை விரும்புபவர்கள், ஒரே நிறுவன டெபாசிட்டில் இருக்கும் ரிஸ்க்கை குறைக்க விரும்புபவர்கள் அனைவருக்கும் இத்திட்டம் ஏற்றதாகும்.

ரிஸ்க் குறைவு!

மற்ற எந்த முதலீட்டையும்போல இதிலும் ரிஸ்க் உள்ளது. வட்டி சார்ந்த ரிஸ்க் இதில் மிகக் குறைவு - முதலீட்டுக் காலம் 18 மாதத்திற்கு மேல் இருக்கும்பட்சத்தில்! போர்ட்ஃபோலியோவில் உள்ள ஏதாவது ஒரு நிறுவனம் திவாலாகி விட்டால், வருமானம் சற்று குறைய வாய்ப்புள்ளது. இந்த ரிஸ்க்கை குறைப்பதற்கு ஃபண்டுகள் பரவலாக தங்களது முதலீட்டை வைத்துக்கொள்கின்றன. மேலும், தரமான நிறுவனங்களின் கடன் பத்திரங்களில் முதலீடு செய்கின்றன. இத்திட்டங்களில் அதிக பாதுகாப்பைத் தேடுபவர்கள், கிகிகி ரேட்டிங் உபகரணங்கள் அதிகமாக உடைய போர்ட்ஃபோலியோவை நாடிச் செல்லலாம்.

வருமானம் எவ்வளவு?

கடந்த ஓராண்டுகாலத்தில் இவ்வகையில் உள்ள நல்ல திட்டங்கள் சுமாராக 10 - 11 சதவிகித வருமானத்தைத் தந்துள்ளன. வருங்காலத்தில் 9 - 10 சதவிகித வருமானத்தை எதிர்பார்க்கலாம். இந்தவகை ஃபண்ட் திட்டங்கள் கடந்த ஓரிரண்டு ஆண்டுகளில்தான் அதிகம் வெளிவந்துள்ளன என்பதால், நீண்டகால செயல்பாட்டைக் கொண்டுள்ள ஃபண்டுகள் எண்ணிக்கையில் மிகவும் குறைவு. 5 வருட செயல்பாட்டைக்கொண்ட ஃபண்டுகள் இரண்டுதான் உள்ளன. அவற்றில் ஒன்றான டெம்பிள்டன் இந்தியா ஷார்ட்டேர்ம் இன்கம் ஃபண்ட் கடந்த ஐந்து வருட காலத்தில் ஆண்டிற்கு 9.50 சதவிகித வருவாயைத் தந்துள்ளது.

எதில் முதலீடு?

இத்திட்டங்கள் கமர்ஷியல் பேப்பர்கள், கார்ப்பரேட் டெபாசிட்கள், டிபெஞ்சர்கள், நிறுவனங்கள் வெளியிடும் பாண்டுகள், வங்கி டெபாசிட்கள் என பலவகையான உபகரணங்களில் முதலீடு செய்கின்றன. இத்திட்டங்கள் முதலீடு செய்யும் நிறுவனங்கள் பல துறையைச் சார்ந்தவையாகும். உதாரணமாக,

1. பொதுத் துறை நிறுவனங்களான பவர் ஃபைனான்ஸ் கார்ப்பரேஷன், எல்.ஐ.சி. ஹவுஸிங் ஃபைனான்ஸ், நபார்டு மற்றும் பிற நிறுவனங்கள்.

2. தனியார் நிறுவனங்கள்: ஸ்ரீராம் டிரான்ஸ்போர்ட் ஃபைனான்ஸ், ஹெச்.டி.எஃப்.சி., டாடா சன்ஸ் மற்றும் பிற நிறுவனங்கள்.

3. வங்கிகள்: ஹெச்.டி.எஃப்.சி. பேங்க், ஆந்திரா பேங்க், ஓரியன்டல் பேங்க் மற்றும் பல நிறுவனங்கள்.

4. மாநில அரசாங்கங்களுக்கு கடன்கள்.


என்ட்ரி, எக்ஸிட் லோடு..?

என்ட்ரி லோடு எதுவும் இல்லை. திட்டத்தைப் பொறுத்து 1 - 2 வரை லாக்-இன் பீரியட் உண்டு. லாக்-இன் காலத்திற்குள் வெளிவரவேண்டும் எனில், 0.5 - 3 % வரை திட்டத்தைப் பொறுத்து வெளியேறும் கட்டணம் உண்டு.

இப்போது முதலீடு செய்யலாமா?

இத்திட்டங்களில் எல்லா காலகட்டத்திலும் முதலீடு செய்யலாம். வட்டி அதிகமாக உள்ள இந்தக் காலகட்டத்தில் தாராளமாக முதலீடு செய்யலாம். வங்கி டெபாசிட்டிற்கான வட்டிகளைவிட ஓரிரண்டு சதவிகிதம், திட்டத்தைப் பொறுத்து, அதிகமான வட்டி கிடைக்க வாய்ப்புள்ளது. குறைந்தபட்சம் ஒன்றிரண்டு ஆண்டு முதல் அதிகபட்சமாக எவ்வளவு ஆண்டுகள் வேண்டுமானாலும் தொடர்ந்து வைத்திருக்கலாம். மொத்தமாகக் கிடைக்கும் தொகையை முதலீடு செய்துவிட்டு, தேவைப்படும்போது படிப்படியாக எடுத்துக்கொள்ளும் வசதியும் உள்ளது. ஓராண்டிற்கு மேல் முதலீட்டை வெளியில் எடுக்கும்போது வருமான வரி மிகக் குறைவாகத்தான் செலுத்தவேண்டி இருக்கும்.

எவ்வகையான திட்டங்கள்..?

பொதுத் துறை நிறுவனங்களின் பாண்டுகள் அதிகமாக இருப்பது; கிகிகி ரேட்டிங்கொண்ட பாண்டுகள் அதிகமாக இருப்பது; குறைவான எக்ஸிட் லோடு, செலவுக் கட்டணம் உள்ள திட்டங்களைத் தேர்வு செய்வது நல்லது. சற்று அதிக வருமானத்தை எதிர்பார்ப்பவர்கள் கிகி ரேட்டிங் அதிகமாக உள்ள ஃபண்டுகளைத் தேர்வு செய்யலாம்.

வருமான வரி எவ்வளவு..?

டிவிடெண்ட் ஆப்ஷனில் முதலீட்டாளர் வரி ஏதும் தங்கள் கையில் இருந்து செலுத்தவேண்டாம். திட்டம் அனைத்து முதலீட்டாளர்களுக்குமாகச் சேர்த்து 28.325 சதவிகிதத்தைப் பிடித்து அரசாங்கத்திற்கு செலுத்திவிடும்.



உச்ச வருமான வரி வரம்பில் உள்ளவர்கள், இத்திட்டங்களில் இருந்துவரும் வருமானத்திற்கு நீண்டகால கேப்பிட்டல் கெயின்ஸ் டாக்ஸாக 10% (அல்லது 20% இண்டக்சேஷனுடன்) கட்டவேண்டிவரும். குறுகியகால கேப்பிட்டல் கெயின்ஸ் அவரவர் வருமான வரி வரம்பிற்கு ஏற்ப அமையும். மொத்தத்தில், ஃபிக்ஸட் டெபாசிட்களுடன் ஒப்பிடுகையில், வரிக்குப் பிந்தைய வருமானத்தில் இத்திட்டங்கள் ஒட்டகச்சிவிங்கியைப்போல் தலைதூக்கி நிற்கும்.

மியூச்சுவல் ஃபண்ட் திட்டங்களில் உள்ள இன்னுமொரு பெரிய அட்ரக்ஷன் - (உள்நாட்டு முதலீட்டாளர்களுக்கு) வங்கி டெபாசிட்களைப் போல சோர்ஸில் வரிப் பிடித்தம் செய்வதில்லை. 30% வரி வரம்பில் வருபவர்கள் குறுகியகால முதலீட்டிற்கு
செல்லும்போது டிவிடெண்ட் ஆப்ஷனையும், நீண்டகால முதலீட்டிற்கு குரோத் ஆப்ஷனையும் தேர்வு செய்துகொள்ளலாம். குறைவான வருமான வரி வரம்பில் இருப்பவர்கள் குரோத் ஆப்ஷனை நாடிச் செல்லலாம்.

மேலுள்ள அட்டவணையில் சந்தையில் உள்ள சில கிரெடிட் ஆப்பர்ச்சூனிட்டீஸ் திட்டங்களின் விவரங்களைத் தந்துள்ளேன். ஒரு நல்ல ஆலோசகர் உதவியுடன் இவ்வகைத் திட்டங்களில் முதலீடு செய்யுங்கள்.

-ந.விகடன்