கில்ட் ஃபண்டுகளில் முதலீடு... லாபத்துக்கு ஏற்ற நேரம் !

மியூச்சுவல் ஃபண்ட் திட்டங்கள் என்றவுடன் நம்மில் பலருக்கு பங்குச் சந்தை சார்ந்த ஈக்விட்டி ஃபண்டுகள் பற்றி தெரிகிற அளவுக்கு கடன் சார்ந்த முதலீடுகள் பற்றி தெரிவதில்லை. கடன் சார்ந்த முதலீடுகளில் முக்கியமானது கில்ட் ஃபண்ட். இது வங்கி முதலீடு, கம்பெனி டெபாசிட், அஞ்சலக முதலீடு போலத்தான் என்றாலும், வங்கி முதலீடுகளைப் போல உறுதியான வருமானத்தை இதில் எதிர்பார்க்க முடியாது. ஆனால், வங்கி முதலீட்டைவிட வரிக்குப் பிந்தைய லாபம் அதிகமாக இருக்கும் என்பதால் கில்ட் ஃபண்ட் முதலீட்டை நாம் கட்டாயம் கவனிக்க வேண்டும்.

கில்ட் ஃபண்ட் என்றால்..?

கடன் சார்ந்த மியூச்சுவல் திட்டத்தில் நம்முடைய முதலீட்டை பாண்டுகள், டிபென்சர்கள் என்கிற கடன் பத்திரங்கள், இந்திய அரசாங்கம் வெளியிடும் பாண்டுகள், கருவூல ரசீதுகள், நிதிச் சந்தை ஆவணங்கள் போன்றவற்றில் முதலீடு செய்வார்கள். இங்கு நாம் இந்திய அரசாங்கம் வெளியிடும் பாண்டுகளில் முதலீடு செய்யும் கில்ட் ஃபண்ட் பற்றி காண்போம்.



பணத்திற்கு பாதுகாப்பு!

ஒரு மியூச்சுவல் ஃபண்ட் திட்டத்தில் அதனுடைய எல்லா முதலீட்டையும் இந்திய அரசாங்கம் வெளியிடும் பாண்டுகளில் மட்டுமே முதலீடு செய்வதுதான் கில்ட் ஃபண்ட். இந்த பாண்டுகள் இந்திய அரசாங்கத்தின் சார்பில் ரிசர்வ் பேங்க் ஆஃப் இந்தியாவினால் வெளியிடப்படுகிறது.

அரசாங்கம் வெளியிடுவதால் இதில் முதலீடு செய்யும் பணத்திற்கும் முழுப் பாதுகாப்பு உண்டு. மற்ற கடன் திட்டங்களில் இருக்கும் முதலீட்டு ரிஸ்க், அதாவது முதலீடு செய்த பணம் திரும்பக் கிடைக்காமல் போவதற்கான வாய்ப்பு முற்றிலும் இந்த கில்ட் ஃபண்ட் திட்டத்தில் கிடையாது.

கவனிக்க வேண்டியவை!

1. இவ்வகை முதலீட்டில் முதலீட்டுக்கு ரிஸ்க் கிடையாது. மிகவும் பாதுகாப்பான முதலீடு என்றாலும், வருமானத்துக்கு உத்தரவாதம் கிடையாது.

2. இவ்வகை ஃபண்டுகளில் வட்டி விகித ரிஸ்க் உண்டு. எப்போதெல்லாம் ஆர்.பி.ஐ. வட்டி விகிதத்தை உயர்த்துகிறதோ, அப்போது எல்லாம் இந்த ஃபண்டுகளின் விலை (என்.ஏ.வி.) குறையும். அதனுடைய முக மதிப்பை விட குறைவாக, அதாவது தள்ளுபடி விலையில் வர்த்தகமாகும். இந்த நேரங்களில் நாம் முதலீடு செய்த பணம் நஷ்டம் அடைவதற்கான வாய்ப்பு உள்ளது.

3. கில்ட் ஃபண்ட் முதலீடுகள் குறுகியகாலத் திட்டம், நீண்டகாலத் திட்டம் என இரு வகைப்படும். குறுகியகாலத் திட்டம் என்பது பாண்டுகளின் முதிர்வுக் காலம் 3 ஆண்டுகள் முதல் 5 ஆண்டுகள் வரை இருக்கும்.

நீண்டகாலத் திட்டத்தில் பாண்டுகளின் முதிர்வுக் காலம் 10 முதல் 20 ஆண்டுகள் வரை இருக்கும். வட்டி விகித மாற்றத்தின் பாதிப்பு நீண்ட காலத் திட்டத்தில் அதிகம் இருக்கும்.



. இதில் முதலீடு செய்யும் போது, நுழைவுக் கட்டணம் ஏதும் கிடையாது. ஆனால், வெளியேறும் கட்டணம் இருக்கும். முதலீடு செய்யும்முன் அந்தத் திட்டத்தின் வெளியேறும் கட்டணமும் என்ன என்பதைப் பார்த்து முதலீடு செய்யவேண்டும்.

5. முதலீடு செய்த ஓராண்டுக்குப் பிறகு விற்று கிடைக்கும் ஆதாயத்திற்கு 10 சதவிகித நீண்ட கால மூலதன ஆதாய வரி செலுத்தவேண்டும். இதுவே பணவீக்க விகித சரிக்கட்டலுக்குப்பின் என்றால் 20 சதவிகிதம் ஆதாய வரிச் செலுத்த வேண்டும்.

டிவிடெண்ட் ஆப்ஷனில் முதலீடு செய்து கிடைக்கும் டிவிடெண்டுக்கும் வரி எதுவும் கிடையாது. ஆனால், டிவிடெண்ட் அறிவிக்கும் முன் மியூச்சுவல் ஃபண்ட் நிறுவனம் டிவிடெண்ட் விநியோக வரி 13.5 சதவிகிதத்தைச் செலுத்திவிடும் என்பதால் முதலீட்டாளர் வரி எதுவும் செலுத்தத் தேவை இருக்காது.

எப்போது முதலீடு செய்யலாம்?

ஏற்கெனவே கூறியதுபோல் கில்ட் ஃபண்டுகள் வட்டி விகித ரிஸ்க் கொண்டவை. வட்டி விகிதம் குறையும்போது கில்ட் ஃபண்டுகளின் விலை பிரீமியத்தில் வர்த்தகமாகும். லாபம் அதிகம் கிடைக்கும். தற்போது ஆர்.பி.ஐ. வட்டி விகிதங்களைக் குறைப்பதற்கு ஆலோசித்துக் கொண்டு இருக்கும்வேளையில் இந்த கில்ட் ஃபண்டுகளில் முதலீடு செய்ய ஏற்ற நேரமிது. வட்டி விகிதம் குறைந்தால் உங்கள் முதலீட்டிற்கு நல்ல லாபம் கிடைக்கும்.

ஆனால், இந்த வட்டி விகிதக் குறைப்பில் ஒரு நிச்சயமற்ற நிலை இருப்பதால், உங்களுடைய மொத்தக் கடன் சார்ந்த முதலீட்டில் 10 சதவிகிதம் கில்ட் ஃபண்டில் முதலீடு செய்யலாம். இனி வட்டி விகிதம் குறைய வாய்ப்பில்லை; வட்டி விகிதம் ஏறும் என்கிற நிலைவரும்போது கில்ட் ஃபண்ட் முதலீட்டிலிருந்து வெளி வரவேண்டும்.

இந்த கில்ட் ஃபண்ட் முதலீட்டில் முதலீடு செய்வதற்கு நேரம் (டைமிங்) மிகவும் முக்கியமானதாகும். மேலும், இது ஒரு செக்டார் ஃபண்டை போன்றது. அதனால், ரிஸ்க் அதிகம். சிறு முதலீட்டாளர்கள் கில்ட் ஃபண்ட் முதலீட்டைத் தவிர்த்து மற்ற ஃபண்ட் முதலீடு, அதாவது இன்கம் ஃபண்டில் முதலீடு செய்வது நல்லது. ரிஸ்க் எடுக்க விரும்பும் முதலீட்டாளர்கள் மற்றும் ஆர்.பி.ஐ. வட்டி விகித ரிஸ்க் மாற்றத்தை அறிந்து முதலீடு செய்ய விரும்புபவர்களுக்கு மட்டுமே இது நல்ல முதலீடு.