"விரைவில் புதிய வங்கி உரிமம்'

புதிய வங்கி தொடங்குவதற்கான உரிமங்கள் விரைவில் அளிக்கப்படும் என்று ரிசர்வ் வங்கி கவர்னர் ரகுராம் ராஜன் தெரிவித்திருக்கிறார்.

ரிசர்வ் வங்கியின் நிர்வாக குழு கூட்டம் புது தில்லியில் வெள்ளிக்கிழமை நடைபெற்றது. இக்கூட்டத்தில் மத்திய நிதி அமைச்சர் ப.சிதம்பரம் கலந்துகொண்டார். இக்கூட்டத்துக்குப் பிறகு செய்தியாளர்களிடம் ரகுராம் ராஜன் கூறியது:

புதிய வங்கி உரிமம் தொடர்பான நடவடிக்கைகள் எடுக்கப்பட்டு வருகின்றன. விரைவில் உரிமங்கள் வழங்கப்படும் என்று கருதுகிறேன். அனைத்து நடவடிக்கைகளும் சரிவர நிறைவேறினால் அடுத்த சில வாரங்களில் உரிமங்கள் வழங்கப்படும். வங்கி தொடங்க உரிமம் கோரும் விண்ணப்பங்களை ஜலான் குழு ஆய்வு செய்து அறிக்கை அளித்திருக்கிறது. இந்த அறிக்கையை ரிசர்வ் வங்கி மூத்த அதிகாரிகள் குழு பரிசீலித்துவருகிறது. விண்ணப்பித்த நிறுவனங்கள் குறித்த முழுமையான ஆய்வும் முடிந்த பிறகு ஜலான் குழு அறிக்கை நிர்வாக குழு முன்பாக வைக்கப்படும். அதன் பிறகு வங்கி வழங்குவது தொடர்பான முறையான முடிவு எடுக்கப்படும்.

பொதுத் தேர்தல் நடைபெற இருப்பதையொட்டி, தேர்தல் நடத்தை விதிகள் அமலில் உள்ளது. எனவே, வங்கி உரிமம் வழங்கும் முடிவை அறிவிப்பது தொடர்பாக தேர்தல் ஆணையத்தின் அனுமதியைப் பெறவிருக்கிறோம். உரிமங்கள் வழங்கலாம் என்ற முறையான அனுமதி ரிசர்வ் வங்கிக்கு கிடைத்த பின்னர்தான் அறிவிப்பு வெளியிடப்படும் என்று ரகுராம் ராஜன் கூறினார்.