லாபம் தரும் பரஸ்பர நிதி முதலீடுகள் - சொக்கலிங்கம் பழனியப்பன்

இவ்வாரம் மியூச்சுவல் ஃபண்டுகள் (பரஸ்பர நிதியம்) மூலமாக கடன் சார்ந்த உபகரணங்களில் முதலீடு செய்வது குறித்துப் பார்ப்போம். விரிவாக இத்திட்டங்களைப் பற்றிப் பார்க்கும் முன் மியூச்சுவல் ஃபண்டுகளைப் பற்றி சிறிது அறிமுகம் செய்து கொள்வோம்.

மியூச்சுவல் ஃபண்டுகள் நிதித் துறையில் கால் பதித்திருக்கும் பல்வேறு நிறுவனங்களால் நடத்தப்படுகின்றன. இன்றைய தினத்தில் இந்தியாவில் 45-க்கும் மேற்பட்ட மியூச்சுவல் ஃபண்டு நிறுவனங்கள் உள்ளன. இன்று இந்தியாவில் என்.ஆர்.ஐ-களுக்கு இருக்கும் மிகவும் சுத்தமான முதலீடுகளில் மியூச்சுவல் ஃபண்டுகளும் ஒன்றாகும். ரூபாய் எட்டு லட்சம் கோடிக்கும் மேலான சொத்தை மியூச்சுவல் ஃபண்டு நிறுவனங்கள் இன்றைய தினத்தில் நிர்வகித்து வருகின்றன.

இந்நிறுவனங்கள் சில்லறை மற்றும் மொத்த முதலீட்டாளர்களிடமிருந்து பணத்தை பெற்று மிக நல்ல முறையில் நிர்வகித்து மக்களுக்கு லாபத்தை ஈட்டித் தருகின்றன. இந்த வேலையை செய்து தருவதற்கு மியூச்சுவல் ஃபண்டு நிறுவனங்கள் ஒரு சிறிய தொகையை ஆண்டுதோறும் சார்ஜ் செய்து கொள்கின்றன.

மியூச்சுவல் ஃபண்டு நிறுவனங்கள் நிர்வகிக்கும் திட்டங்களை 3 வகையாக பிரித்துக் கொள்ளலாம். அவையாவன:

1.பங்கு சார்ந்த திட்டங்கள் (EQUITY SCHEMES)

2.கடன் சார்ந்த திட்டங்கள் (DEBT SCHEMES)

3.கலப்பினத் திட்டங்கள் (HYBRID SCHEMES)

இவற்றில் கடன் சார்ந்த திட்டங்கள் மிகக் குறைவான ரிஸ்க்குடனும், பங்கு சார்ந்த திட்டங்கள் பங்குச் சந்தை சார்ந்த ரிஸ்க்குடனும், கலப்பினத் திட்டங்கள் மீடியமான ரிஸ்க்குடனும் வருகின்றன. மியூச்சுவல் ஃபண்டுகளில் முதலீடு செய்வதற்கு என்.ஆர்.ஐ–களாக இருக்கும் பட்சத்தில் கீழ்கண்ட ஆவணங்கள் தேவைப்படுகின்றன.

1.கே.ஒய்.சி (KYC - KNOW YOUR CUSTOMER)

2.என்.ஆர்.ஈ அல்லது என்.ஆர்.ஓ வங்கிக் கணக்கு

3.உரிய விண்ணப்பப் படிவம்

உங்களது வாடிக்கையாளர்களை தெரிந்து கொள்ளுங்கள் (KYC) என்பது இன்று இந்தியாவில் பல முதலீடுகளுக்கு மிக முக்கியமான ஒன்றாகிவிட்டது. முதன் முறையாக மியூச்சுவல் ஃபண்டுகளில் முதலீடு செய்யும் பொழுது மியூச்சுவல் ஃபண்டு விண்ணப்பத்துடன் என்.ஆர்.ஐ–கள் கே.ஒய்.சி படிவத்தை பூர்த்தி செய்து கீழ்கண்ட சுய கையெழுத்திடப்பட்ட ஆவணங்களுடன் அவர்களது நிதி ஆலோசகரிடம் கொடுக்க வேண்டும்.

1.பான் கார்டு (PAN CARD)

2.பாஸ்போர்டின் நகல்

3.உள்நாட்டு மற்றும் வெளிநாட்டு முகவரிக்கான ஆதாரம்

4.விசா அல்லது வெளிநாட்டு பாஸ்போர்ட்

5.ஃபோட்டோ

இந்த கே.ஒய்.சி என்பது ஒரு முறை செய்துவிட்டால் இந்தியாவில் உள்ள அனைத்து மியூச்சுவல் ஃபண்டுகளுக்கும் இது சென்றடைந்துவிடும். அதேபோல் எப்பொழுதாவது முகவரி மாற்றம் செய்யவேண்டும் என்றால் கே.ஒய்.சி விபரம் மாற்று (KYC DETAILS CHANGE) விண்ணப்பம் கொடுத்தால் போதும். அது அனைத்து மியூச்சுவல் ஃபண்டு நிறுவனங்களையும் சென்று சேர்ந்து விடும். மியூச்சுவல் ஃபண்டுகளில் முதலீடு செய்யும் பொழுது பணத்தை ரொக்கமாக (CASH) ஏற்கமாட்டார்கள்.

அதேபோல் வெளிநாட்டு கரன்ஸிகளிலும் இந்தியாவில் மியூச்சுவல் பண்டுகளில் முதலீடு செய்ய முடியாது. என்.ஆர்.ஈ / என்.ஆர்.ஓ கணக்குகளிலிருந்து காசோலையாகவோ அல்லது ஆன்லைன் டிரான்ஸ்ஃபர் மூலமாகவோ முதலீடு செய்து கொள்ளலாம். மியூச்சுவல் ஃபண்டு முதலீடுகளில் என்.ஆர்.ஐ-களுக்கு உள்ள மிகப் பெரிய கவர்ச்சி என்னவென்றால், என்.ஆர்.ஈ கணக்கு மூலமாக முதலீடு செய்யும் பொழுது, தாங்கள் வசிக்கும் நாட்டிற்கு அப்பணத்தை எப்பொழுது வேண்டுமானாலும் எந்தவிதமான கேள்வியும் இல்லாமல் எடுத்துச் செல்லாம், அதைவிட மிகப் பெரிய கவர்ச்சி பங்கு சார்ந்த மியூச்சுவல் பண்டு திட்டங்களில் முதலீடு செய்து ஓராண்டிற்கு மேல் வைத்திருக்கும் பட்சத்தில் ஒரு பைசா கூட வரும் வருமானத்திற்கு, வரி செலுத்த வேண்டாம். இனிவரும் வாரங்களில் இவ்வகை முதலீட்டைப் பற்றி மேலும் விரிவாகக் காண்போம்.

கடந்த வாரம் கடன் சார்ந்த மியூச்சுவல் ஃபண்டு முதலீடுகளில் மிகவும் குறைவான ரிஸ்க் உள்ள ஃபண்டுகளைப் பற்றிப் பார்த்தோம். அதே கடன் சார்ந்த ஃபண்டுகளில் சற்று ரிஸ்க் அதிகமாக எடுக்க முடியும் (அதிக வருமானத்திற்காக) என நினைப்பவர்கள் கிரெடிட் ஆப்பர்சூனிட்டீஸ் (Credit Opportunities) மற்றும் கில்ட் ஃபண்டுகளில் (Gilt Funds) முதலீடு செய்யலாம். ஆனால் இவ்விதமான ஃபண்டுகளில் நுழையும் மற்றும் வெளியேறும் நேரம் முக்கியம் என்பதை முதலீட்டாளர்கள் கவனத்தில் கொள்ள வேண்டும்.

மியூச்சுவல் ஃபண்டுகளில், ஃபிக்ஸட் டெபாஸிட்டைப் (Fixed Deposit) போல உறுதியான வருமானம் வேண்டும் என நினைப்பவர்கள், எஃப்.எம்.பி (FMP - FIXED MATURITY PLANS) திட்டங்களில் முதலீடு செய்யலாம். இத்திட்டங்களில் ரிஸ்க் இல்லை என்றே கூறலாம். வட்டியும் ஃபிக்ஸட் டெபாஸிட்டுகளுக்கு சமமாகக் கிடைக்கும். முதிர்வு காலம் பொதுவாக ஒரு மாதத்திலிருந்து ஐந்து வருடங்கள் வரை. ஆனால் இத்திட்டங்களில் உள்ள ஒரு அசௌகரியம் என்னவென்றால், முதிர்வு காலத்திற்கு முன் பணத்தை எடுப்பது சிரமம்.

கடன் சார்ந்த மியூச்சுவல் ஃபண்ட் திட்டங்களை மக்கள் அதிகம் நாடிச் செல்வதற்கு என்ன காரணம்? வருமான வரி அதிகமாக செலுத்துபவர்களுக்கு கடன் சார்ந்த மியூச்சுவல் ஃபண்டு திட்டங்கள் ஒரு வரப்பிரசாதம். ஃபிக்ஸட் டெபாஸிட்டுடன் ஒப்பிடுகையில், மிகக் குறைந்த வருமான வரியையே செலுத்த வேண்டி இருக்கும். ஃபிக்ஸட் டெபாஸிட்டிலிருந்து வரும் வட்டி வருமானத்திற்கு அவரவர் வருமான வரி வரம்பிற்கு ஏற்ப வரி கட்டவேண்டி இருக்கும். உதாரணத்திற்கு ஒருவர் ரூ 1 லட்சம் வங்கி டெபாஸிட்டில் முதலீடு செய்தால், அவருக்கு சுமாராக ரூ.9,000 வட்டி வருமானம் கிடைக்கும். உச்சபட்ச வருமான வரி வரம்பில் இருப்பவர்களுக்கு இந்த வட்டி வருமானத்தில் ரூ 2,700 (30%) வரியாக சென்று விடும்.

ஆகவே அவருக்கு நிகராக கைக்கு கிடைப்பது ரூ 6,300 தான். அதே நபர் அந்த 1 லட்சத்தை கடன் சார்ந்த மியூச்சுவல் ஃபண்ட் திட்டங்களில் முதலீடு செய்யும் பொழுது, வரும் வருமானத்திற்கு பணவீக்கத்தை அட்ஜஸ்ட் செய்த பிறகு உள்ள வருமானத்திற்கே வரி செலுத்த வேண்டி இருக்கும். நாம் மேலே கண்ட நபர், அதே 1 லட்சத்தை மியூச்சுவல் ஃபண்டுகளில் உள்ள எஃப்.எம்.பி (FMP) திட்டத்தில் முதலீடு செய்தார் என்றால் அவருக்கு அதே ரூ 9,000 வருமானம் கிட்டும். அவர் முதலீடு செய்த ஆண்டில் பணவீக்கம் 7% ஆக இருந்தால், ரூ 7,000 பணவீக்க அட்ஜஸ்ட்மெண்டாக எடுத்துக் கொள்ளப்படும். ஆகவே வருமானமாகக் கருதப்படுவது ரூ 2,000 (9,000 – 7,000 = 2,000) மட்டும்தான். அந்த 2,000–ற்கு 20% வரி கட்டினால் போதுமானது.

ஆக அதே நபர் மியூச்சுவல் ஃபண்டில் முதலீடு செய்து இருந்தால் வெறும் ரூ 400-ஐத்தான் (2000 X 20%) வரியாகச் செலுத்தி இருப்பார். அவரது கைக்கு நிகராக 8,600 ரூபாய் (9,000 – 400 = 8,600) கிடைத்து இருக்கும். ஆக அவருக்கு நிகர சேமிப்பு ரூ 2,300 ஆகும். இதுதான் கடன் சார்ந்த மியூச்சுவல் ஃபண்டு திட்டங்களில் முதலீடு செய்பவர்களுக்கு உள்ள மிகப்பெரிய கவர்ச்சி. இதன் காரணமாகத்தான் கடன் சார்ந்த மியூச்சுவல் ஃபண்டு திட்டங்களில் பல்லாயிரக்கணக்கான கோடி ரூபாய் நிர்வகிக்கப்படுகிறது. உறுதியான வருமானம் எனக்கு கட்டாயமாகத் தேவை என நினைப்பவர்கள் கடன் சார்ந்த திட்டங்களில் கீழ்கண்ட மியூச்சுவல் ஃபண்டு வகைகளில் மட்டும் முதலீடு செய்யவும்.

லிக்விட் ஃபண்டுகள், அல்ட்ரா ஷார்ட் டேர்ம் ஃபண்டுகள், எஃப்.எம்.பி. பிற வகையான கடன் திட்டங்களில் ஏற்ற இறக்கங்கள் இருப்பது சகஜம். ஆனால் நீண்ட காலத்தில் ஒரு நிலையான வருவாயைத் தரும். அதற்கு மேல் இன்னும் ஒரு பெரிய கவர்ச்சி: பிஃக்ஸட் டெபாஸிட்டுகளில் முதலீடு செய்யும் பொழுது நீங்கள் வருடாவருடம் வட்டியை வாங்கினாலும், வாங்காவிட்டாலும் வருமான வரியை செலுத்த வேண்டும். ஆனால் கடன் சார்ந்த மியூச்சுவல் ஃபண்டுகளில் முதலீடு செய்யும் பொழுது, எந்த வருடத்தில் பணத்தை வெளியில் எடுக்கிறீர்களோ, அந்த வருடத்தில் வரியை கட்டினால் போதுமானது – அதுவும் பணவீக்கத்தை அட்ஜஸ்ட் செய்த பிறகு! அதுவரை அந்த வருமானவரி கட்ட வேண்டிய தொகைக்கு, நமக்கு கிடைக்கும் வட்டி லாபம் தானே?

சென்றவாரம் கடன் சார்ந்த மியூச்சுவல் ஃபண்டுகளை பற்றிக் கண்டறிந்தோம். இவ்வாரம் அதிக ரிஸ்க் உடைய பங்குசந்தையில் முதலீடு செய்யும் முழுக்க முழுக்க பங்கு சார்ந்த மியூச்சுவல் ஃபண்டுகள் குறித்துப் பார்ப்போம்.

வாசகர்களுக்கு கேள்வி எழலாம். ஏன் நான் மியூச்சுவல் ஃபண்டுகள் மூலம் முதலீடு செய்ய வேண்டும்? ஏன் நேரடியாக பங்கு சந்தையில் முதலீடு செய்யக் கூடாது? எல்லாம் ஒன்றுதானே? அதற்கும் இதற்கும் என்ன வித்தியாசம் என்பது பலரின் கேள்வியாக இருக்கும். பங்கு சந்தை என்பது நமது காய்கறி மார்க்கெட்டைப் போல. எந்தக் காய் எப்பொழுது, எவ்வளவு விலை போகும் என யாருக்கும் தெரியாது. அந்தக் காய்க்கு அந்த விலை சரிதானா என்பதும் தெரியாது. வாங்குபவர்த்தான் உஷாராக இருக்க வேண்டும். அதேபோல் தான் பங்குசந்தையும்!

ஒருவர் பங்குசந்தையில் முதலீடு செய்வதற்குப் போதிய அளவு அறிவு வேண்டும். ஆராய்ச்சி செய்வதற்கு நேரம் வேண்டும். இவற்றிற்கெல்லாம் மேலாக முதலீட்டு ஒழுக்கம் வேண்டும். நீச்சலைக் கற்றுக்கொள்வதற்கு சில பல ஆண்டுகள் ஆகலாம். இவற்றையெல்லாம் அறிந்து ஆராய்ந்து செய்வதற்கு ஒருவர் தயாராக இருக்க வேண்டும்! மேலும் பங்குசந்தையில் முதலீடு செய்வதற்கு ஒரு கணிசமான தொகையும் தேவைப்படும்.

இப்பொழுது மியூச்சுவல் ஃபண்டு என்ற மறுபக்கத்திற்கு வாருங்கள். நாம் மேலே கூறிய மைனஸ் பாயிண்டுகள் எல்லாம் இங்கு பிளஸ் பாயிண்ட்டாகி விடுகின்றன.

நீங்கள் அதிகமாக ஆராய்ச்சி செய்ய வேண்டாம். இவ்வகை முதலீட்டைப்பற்றி புரிந்து கொண்டால் போதும். நம்மில் பலர் இன்று முழுநேரமாக வேலை பார்த்து வருகிறோம் அல்லது தொழில் செய்து வருகிறோம். முதலீட்டிற்காக ஒதுக்குவதற்கு நேரம் இருக்காது. மியூச்சுவல் ஃபண்டுகளில் நல்ல திட்டங்களாக தேர்வு செய்து நீங்கள் முதலீடு செய்தால் போதும். மற்றனவற்றை திட்டத்தை நிர்வகிக்கக்கூடிய ஃபண்டு மேனேஜர் கவனித்துக்கொள்வார். முதலீட்டிற்காக நீங்கள் செலவிடும் நேரத்தில் உங்கள் தொழில் அல்லது வேலையில் கவனத்தைச் செலுத்தி இன்னும் அதிகமாக பொருளை ஈட்டலாம்.

முதலீட்டிற்கு மிகவும் அவசியமானது முதலீட்டு ஒழுக்கமாகும். பங்குசந்தையில் நேரடியாக முதலீடு செய்யும் பொழுது அந்த ஒழுக்கம் நம்மிடம் இருக்காது. இவர் கூறினார் அவர் கூறினார் என வாங்கிவிட்டு நஷ்டத்தில் அமர்ந்திருப்போம். ஆனால் மியூச்சுவல் ஃபண்டுகளில் முதலீடு செய்யும் பொழுது, ஃபண்டு மேனேஜர் அதன் நிர்வாகத்தை மிகவும் ஒழுங்காக கவனித்துக் கொள்வார். ஏனென்றால், அதற் காகத்தான் அவருக்கு சம்பளம் கொடுக்கப்படுகிறது. இங்கு நீங்கள் நீச்சலை கற்றுக் கொள்ளாமலேயே முதலீடு செய்யலாம். தேவையானது எல்லாம் பொறுமைதான்!

பங்கு சார்ந்த முதலீடுகள் பொதுவாகவே நீண்ட கால முதலீட்டிற்குத்தான் சிறந்தது. ஆகவே உங்களின் வாழ்க்கையின் நீண்ட நாள் இலக்குகளான குழந்தைகளின் கல்வி, திருமணம், மற்றும் ஓய்வுக் காலம் போன்றவற்றிற்காக இத்தி்ட்டங் களில் நீங்கள் தாராளமாக முதலீடு செய்யலாம். குறுகிய கால முதலீட்டிற்காக, இவ்வகையான முதலீட்டிற்கு வராதீர்கள்.

என்.ஆர்.ஐ – களுக்கு இவ்வகை திட்டங்களில் முதலீடு செய்வதனால் என்ன பயன்? மிகப்பெரிய கவர்ச்சி என்னவென்றால் உள்நாட்டு மக்கள் மற்றும் வெளிநாடுவாழ் இந்தியர் ஆகிய அனைவரும் கிடைக்கும் இலாபத்திற்கு வருமான வரி செலுத்த வேண்டாம் என்பதுதான் – முதலீடு 12 மாதத்திற்கு மேல் இருந்திருந்தால்! மேலும் இவ்வகை திட்டங்களில் குறைந்தபட்சமாக மாதத்திற்கு ரூ 500-இல் இருந்தே சேமிக்க துவங்கலாம். மொத்தமாக (ஒரு தடவை) வாங்குபவர்கள் குறைந்தபட்சம் ரூ 5,000-ற்கு முதலீடு செய்ய வேண்டும். மேலும் முதிர்வு காலம் என்பது கிடையாது. எவ்வளவு நாட்கள் வேண்டுமானாலும் முதலீட்டை தொடர்ந்து கொள்ளலாம். அது வளர்ந்து கொண்டே இருக்கும். என்.ஆர்.ஐ–கள் (அமெரிக்கா மற்றும் கனடா நாடுகளைத் தவிர) தங்களது என்.ஆர்.ஈ அல்லது என்.ஆர்.ஓ கணக்குகள் மூலம் முதலீடு செய்யலாம்.

என்.ஆர்.ஈ கணக்குகள் மூலமாக செய்த முதலீட்டை வேண்டும் என்கிற பொழுது தாங்கள் வாழும் நாட்டிற்கு எடுத்துச் செல்லாம். மேலும் வளைகுடா, ஆப்பிரிக்கா போன்ற நாடுகளில் வாழும் இந்தியர்கள் அங்கு பங்கு சந்தை வளர்ச்சியில்லாத காரணத்தால் நம் நாட்டில் மியூச்சுவல் ஃபண்டுகள் மூலமாக முதலீடு செய்து கொள்ளலாம்.

இந்தியாவிற்கு திரும்பி வரப்போகும் என்.ஆர்.ஐ – களுக்கு இவ்வகையான முதலீடு ஒரு வரப்பிரசாதம் ஆகும். பங்கு சார்ந்த மியூச்சுவல் ஃபண்டு குறித்த மற்ற விவரங்களை வரும் வாரங்களில் பார்ப்போம்.

சென்றவாரம் பங்கு சார்ந்த மியூச்சுவல் ஃபண்டுகளில் உள்ள பல்வேறு வகைகளைப் பற்றிக் கண்டறிந்தோம். வெளிநாடுவாழ் இந்தியர்கள் முதன் முதலாக பங்கு சார்ந்த மியூச்சுவல் ஃபண்டுகளில் அடி எடுத்து வைக்கும் பொழுது லார்ஜ் கேப் ஃபண்டுகளில் முதலீடு செய்வது சாலச் சிறந்தது. காரணம் இவ்வகையான ஃபண்டுகள் தங்களது முதலீட்டை இந்தியாவில் உள்ள டாப் 50 அல்லது 100 நிறுவனப் பங்குகளில் முதலீடு செய்கின்றன.

அவ்வாறு முதலீடு செய்யும் பொழுது மிகவும் தரமான பங்குகளில் முதலீடு செய்வதால் ரிஸ்க் குறைந்து விடுகிறது. இவ்வகை ஃபண்டுகளின் வருவாயும் சந்தைக் குறியீட்டை ஒட்டியே இருக்கும். பங்குச் சந்தை வீழ்ச்சியைக் காணும் பொழுது இவ்வகை திட்டங்கள் சந்தையை ஒட்டியே குறையும். மேலும் நீண்ட நாள் முதலீட்டிற்கு லார்ஜ் கேப் திட்டங்கள் ஸ்திரமாக நிற்கும். ஏனென்றால் அந்த ஃபண்டு வைத்துள்ள நிறுவனங்கள் ஸ்திரமானவை.

லார்ஜ் கேப் வகை ஃபண்டுகளை பல மியூச்சுவல் பண்டு நிறுவனங்கள் நடத்தி வருகின்றன. இவற்றில் நல்ல திட்டங்களை தேர்ந்தெடுத்து முதலீடு செய்வது முக்கியமாகும். நல்ல திட்டங்களை எவ்வாறு தேர்ந்தெடுக்கலாம் என்ற கேள்வி உங்களுக்கு எழும். சில சாதாரண வடிகட்டிகளைப் போட்டாலே உங்களுக்கு நல்ல திட்டங்கள் கிடைத்துவிடும். உதாரணத்திற்கு நீங்கள் முதலீடு செய்யப்போகும் மியூச்சுவல் ஃபண்டு நிறுவனம் நிர்வகிக்கும் மொத்த சொத்தின் மதிப்பு டாப் 20-ல் உள்ளதா என்று பாருங்கள்.

அவ்வாறு நிறுவனத்தை தேர்ந்தெடுத்த பிறகு, அந்நிறுவனங்களில் உள்ள லார்ஜ் கேப் திட்டங்களை நோட்டமிடுங்கள். அத்திட்டங்கள் நிறுவகிக்கும் சொத்து குறைந்தது 300 கோடியாவது இருக்குமாறு பார்த்துக்கொள்ளுங்கள். பிறகு அத்திட்டங்கள் குைறந்தபட்சமாக 5 ஆண்டுகளாவது நடைமுறையில் இருந்துள்ளதா என்று பார்த்துக் கொள்ளுங்கள். அவ்வாறு நீங்கள் வடிகட்டிய திட்டத்தின் கடந்த 1, 3, 5, 10 வருட வருமானத்தை பங்கு சந்தை குறியீட்டோடு ஒப்பிட்டுப் பாருங்கள். அதில் நன்றாக வருமானத்தை தந்துள்ள திட்டங்களில் ஒன்று அல்லது இரண்டு ஃபண்டுகளை தேர்ந்தெடுத்து முதலீடு செய்யுங்கள்.

நாம் மேற்கூறிய வடிகட்டிகளை எல்லாம் உங்களுக்கு போட்டுப் பார்க்க நேரம் இல்லையெனில் கீழே பட்டியலிடப்பட்டுள்ள ஃபண்டுகளில் ஒன்று அல்லது இரண்டு ஃபண்டுகளைத் தேர்வு செய்து முதலீடு செய்து கொள்ளுங்கள்.

கீழ்க்கண்ட ஃபண்டுகளில் முதலீடு செய்யும் பொழுது பொதுவாக மாதாமாதம் ஒரு குறிப்பிட்ட தொகையை ரெக்கரிங் டெபாசிட் போல தொடர்ந்து முதலீடு செய்து வருவது நல்லது. இதை எஸ்.ஐ.பி (SIP Systematic Investment Plan) முதலீட்டு முறை என்று கூறுகிறோம். இவ்வாறு முதலீடு செய்யும் பொழுது பல்வேறு தினங்களில் நாம் யூனிட்டுகளை வாங்குவதால், விலை சராசரியாகி (Average) ரிஸ்க் வெகுவாக குறைந்து விடுகிறது. ரெக்கரிங் டெபாசிட்டை போல இவ்வித முதலீட்டுகளில் கேரண்டியான வருமானம் கிடையாது.

ஆனால் 5, 10, 15, 20 வருட காலங்களுக்கு முதலீடு செய்து வரும் பொழுது ரெக்கரிங் டெபாசிட்டில் கிடைக்கும் வருமானத்தை போல பன்மடங்கு வரை வருமானம் கிடைக்க வாய்ப்புள்ளது. ஆரம்ப காலங்களில் சிறிதளவு பேப்பர் நஷ்டம் ஏற்படவும் வாய்ப்புள்ளது என்பதை கவனத்தில் கொள்க.

இது போன்ற எஸ்.ஐ.பி முதலீடுகளில் உள்ள பெரிய செளகரியம் என்னவென்றால் உங்களால் பணம் செலுத்த முடியாத பொழுது ஒருமாத நோட்டிசில் மேலும் செலுத்துவதை நிறுத்திக்கொள்ளலாம். போட்ட/ போட்டிருக்கும் முதலீடுகளை அவசரத் தேவை ஏற்படும் பொழுது வேண்டுமென்றால் 3 நாட்களில் அன்றைய மார்க்கெட் மதிப்பில் தாராளமாக எடுத்துக் கொள்ளலாம். இன்ஷூரன்ஸ் பாலிசியைப்போல பெனால்ட்டி எதுவும் கிடையாது அல்லது கட்டாயம் கட்டியே ஆகவேண்டும் என்ற வற்புறுத்தலும் கிடையாது.

தெரியாமல் மாட்டிக் கொண்டுவிட்டோமே என்று பயப்படவும் வேண்டாம். கடந்த 12 மாதத்திற்குள் முதலீடு செய்த பணத்தை எடுத்தீர்களேயானால் அன்றைய மார்க்கெட் மதிப்பில் 1% வெளியேற்றுக்கட்டணத்தை எடுத்துக்கொள்வார்கள். மற்றும் ஒரு நல்ல விஷயம் என்னவென்றால் இது போன்ற மியூச்சுவல் ஃபண்டு முதலீடுகளுக்கு மெச்சூரிட்டி தேதி என்று எதுவும் கிடையாது. எவ்வளவு நாட்களுக்கு வேண்டுமானாலும் நீங்கள் முதலீட்டை தொடர்ந்து கொள்ளலாம்.

நாம் ஏற்கெனவே கண்டது போல வெளிநாடுவாழ் இந்தியர் களுக்கும் 12 மாதத்திற்கு மேலான முதலீட்டு லாபத்திற்கு வரி ஏதும் கிடையாது. அதேபோல என்.ஆர்.ஈ கணக்குகள் மூலம் முதலீடு செய்யும் போது தாங்கள் வாழும் நாட்டிற்கு எப்பொழுது வேண்டுமானாலும் பணத்தை திருப்பி எடுத்துச் செல்லலாம். இனி வரும் வாரத்தில் மிட் அண்ட் ஸ்மால் கேப் ஃபண்டுகள் குறித்தும் கலப்பினத் திட்டங்கள் குறித்தும் பார்ப்போம்.

இளம் வயதினர் மற்றும் அதிக ரிஸ்க் எடுக்க முடியும் என நினைப்பவர்கள் மிட் அண்ட் ஸ்மால் கேப் ஃபண்டுகளில் முதலீடு செய்யலாம். இவ்வகை ஃபண்டுகள் நாம் ஏற்கனவே பார்த்தது போல் நடுத்தர மற்றும் சிறிய நிறுவனப் பங்குகளில் முதலீடு செய்கின்றன.

நாம் சென்ற வாரம் லார்ஜ் கேப் ஃபண்டுகளை பொறுக்கி எடுப்பதற்காக கொடுத்த அதே வடிகட்டிகளை இவ்வகையான ஃபண்டுகளுக்கும் தாராளமாகப் பிரயோகிக்கலாம். உங்களுக்காக கீழே அட்டவணை 1-ல் சிறந்த மிட் அண்ட் ஸ்மால் கேப் திட்டங்கள் என நினைப்பனவற்றைக் கொடுத்துள்ளேன்.

இந்த மூன்று ஃபண்டுகளில் ஒன்று அல்லது இரண்டைத் தேர்வு செய்து முதலீடு செய்து கொள்ளலாம். நீண்ட கால நோக்கில், இவ்விதமான ஃபண்டு களில் ரிஸ்க் சற்று அதிகமாக இருந்தாலும் ரிவார்டு நன்றாகவே இருக்கும் என்பதில் எவ்வித சந்தேகமும் இல்லை.

மைக்ரோ கேப் ஃபண்டுகளில் பொதுவாக முதன்முறை முதலீட்டாளர்கள் முதலீடு செய்ய வேண்டாம். இதே சட்டம் துறை சார்ந்த, தீம் சார்ந்த மற்றும் ஓவர்ஸீஸ் ஃபண்டுகளுக்கும் பொருந்தும்.

இதுவரை நாம் 100% பங்குகளில் மட்டுமே முதலீடு செய்யக்கூடிய ஃபண்டுகளைப் பற்றி பார்த்தோம். இவை தவிர கலப்பின வகை (Hybrid) ஃபண்டுகளும் உள்ளன. கலப்பின வகை ஃபண்டுகள் ஒன்றிற்கு மேலான சொத்து வகைகளில் முதலீடு செய்கின்றன. உதாரணத்திற்கு பங்கு, கடன், தங்கம் போன்ற சொத்துகளில் கலவையாக முதலீடு செய்கின்றன.

தங்களுடைய போர்ட்போஃலி யோவில் 70% பங்குசார்ந்த முதலீட்டிலும் 30% கடன் சார்ந்த முதலீட்டிலும் முதலீடு செய்யக்கூடிய திட்டங்களை பேலன்ஸ்டு ஃபண்டுகள் (Balanced Funds) என்று குறிப்பிடுகிறோம். சற்றுக் குறைவாக ரிஸ்க் எடுக்க விரும்புபவர்கள் இவ்வகை ஃபண்டுகளில் முதலீடு செய்யலாம். முதன்முறை முதலீட்டாளர்களும் இவ்விதமான ஃபண்டுகளில் முதலீடு செய்யலாம். இந்த வகை ஃபண்டுகள் பொதுவாக அதிகமான தொகையை பங்குசார்ந்த முதலீட்டில் முதலீடு செய்வதால், இவ்வகை ஃபண்டுகளை ஒரு வருடத்திற்கு மேல் வைத்திருக்கும் பட்சத்தில் வரும் லாபத்திற்கு வருமான வரி ஏதும் கட்டத் தேவையில்லை. இவற்றில் நன்றாக செயல்படக்கூடிய சில திட்டங்களை அட்டவணை 2-ல் கொடுத்துள்ளோம்.

முதலீட்டாளர்கள் தங்களது விருப்பத்திற்கேற்ப ஒன்று அல்லது இரண்டு ஃபண்டுகளைத் தேர்வு செய்து முதலீடு செய்து கொள்ளலாம்.

கலப்பினத் திட்டங்களில் எம்.ஐ.பி (MIP – Monthly Income Plan) என்று சொல்லக்கூடிய திட்டங்களும் உள்ளது. இவ்வகையான திட்டங்கள் அதிக பட்சமாக 30%-ஐ பங்குசார்ந்த முதலீடுகளிலும் மீதியை கடன் சார்ந்த உபகரணங்களிலும் முதலீடு செய்கின்றன. இவ்வகையான திட்டங்களில் பங்குசார்ந்த முதலீடுகள் குறைவாக இருப் பதால் ரிஸ்க்கும் குறைவு.

ஆதலால் ரிஸ்க் குறைவாக எடுக்க விரும்பும் முதலீட்டாளர்கள் மற்றும் நீண்டகால ஃபிக்ஸட் டெபாஸிட்டுகளுக்கு ஒரு மாற்று உபகரணத்தை தேடுபவர்களுக்கு இவ்வகை ஃபண்டுகள் உகந்ததாகும். இவ்வகை ஃபண்டுகளில் கடன் சார்ந்த முதலீடுகள் அதிகமாக இருப்பதால், அவ்வகையான முதலீடுகளுக்கு உள்ள வருமான வரி இவ்வகையான ஃபண்டுகளுக்கும் உரித்தாகும். ஆனால் ஃபிக்ஸட் டெபாஸிட்டுகளை ஒப்பிடும் பொழுது, அதிக வருமான வரி வரம்பில் இருப்பவர்களுக்கு இது ஒரு நல்ல திட்டமாகும். ஏனென்றால் அவர்களுக்கு வரி போக கையில் நிகராக கிடைக்கும் பணம் இவ்வகை முதலீடுகளில் அதிகமாகும்.

இவ்வகை முதலீடுகள் நீண்ட காலத்தில், ஆண்டிற்கு 10 - 12% வருமானத்தைத் தரவல்லது. குறுகிய கால முதலீட்டிற்கு இவ்வகையான திட்டங்களில் முதலீட்டாளர்கள் செல்ல வேண்டாம். இவ்வகையான திட்டங்களில் சில நல்ல ஃபண்டுகளை அட்டவணை 3-ல் கொடுத்துள்ளோம்.

மேற்கண்ட திட்டங்களில் ஓரிரண்டு ஃபண்டுகளைத் தேர்வு செய்து நீங்கள் முதலீடு செய்து கொள்ளலாம். இனி வரும் வாரத்தில் இந்தியாவிற்கு வந்து செட்டிலாக விரும்பும் வெளிநாடு வாழ் இந்தியர்கள் எவ்வாறு திட்டமிட்டுக் கொள்ளலாம் என்பது குறித்துப் பார்ப்போம்.