பிரிட்டன் பொது வாக்கெடுப்பு முடிவு எதிரொலி: சென்செக்ஸ், நிஃப்டி கடும் வீழ்ச்சி

பிரிட்டனில் நடந்த பொது வாக்கெடுப்பில் ஐரோப்பிய ஒன்றியத்திலிருந்து வெளியேற அந்நாட்டு மக்கள் பேராதரவு தெரிவித்துள்ள நிலையில், இந்திய பங்குச்சந்தை கடும் வீழ்ச்சியை சந்தித்துள்ளது.

சர்வதேச அளவில் பல்வேறு நாடுகளிலும் பங்குவர்த்தகம் சரிவை சந்தித்துள்ளது.

இன்று (வெள்ளிக்கிழமை) காலை வர்த்தக துவக்கத்தின்போது மும்பை பங்குச்சந்தையில் சென்செக்ஸ் 800 புள்ளிகள் சரிந்தது.

சென்செக்ஸ் தொடர்ந்து சரிவை சந்தித்து 1000 புள்ளிகளுக்கு மேல் சரிவு ஏற்பட்டுள்ளது. காலை 11 மணியளவில் சென்செக்ஸ் 966 புள்ளிகள் சரிந்து 26,038 ஆக இருந்தது. இதனிடையே, தேசிய பங்குச்சந்தையான நிஃப்டி சுமார் 300 புள்ளிகள் சரிந்து 7,973 என்ற அளவில் இருந்தது.



ரூபாய் மதிப்பிலும் வீழ்ச்சி

அமெரிக்காவின் டவ் சந்தையிலும் பியூச்சர்ஸ் மார்க்கெட் சரிவுடன் வர்த்தகமாகி வருகிறது. இந்திய ரூபாயின் மதிப்பு 96 காசுகள் குறைந்து ஒரு அமெரிக்க டாலர் ரூ.68 என்ற நிலையில் உள்ளது.

31 ஆண்டுகளுக்குப் பிறகு:

பிரிட்டன் பவுண்ட் மதிப்பு 31 ஆண்டுகளுக்குப் பிறகு மிகப் பெரிய அளவில் சரிந்துள்ளது. அமெரிக்க டாலருக்கு நிகரான பவுண்ட் மதிப்பு 10% குறைந்துள்ளது.

இதேபோல் சீனா, தென் கொரியா, தைவான் நாடுகளில் பங்குவர்த்தகம் சரிவை சந்தித்துள்ளது. ஹாங்காங்கின் ஹாங்சென் 974 புள்ளிகள் சரிந்துள்ளது. ஜப்பானின் நிக்கேகி 1,291 புள்ளிகள் சரிவை சந்தித்துள்ளன.

முன்னதாக, ஐரோப்பிய ஒன்றியத்திலிருந்து விலகுவதற்கு ஆதரவு தெரிவித்து பிரிட்டன் வாக்காளர்கள் 1 கோடியே 57 லட்சம் பேர் வாக்களித்திருக்கின்றனர்.

1 கோடியே 45 லட்சத்து 84 பேர் ஐரோப்பிய ஒன்றியத்தில் தொடரவும், 1 கோடியே 57 லட்சத்து 05 பேர் ஐரோப்பிய ஒன்றியத்திலிருந்து விலகவும் விருப்பம் தெரிவித்து வாக்களித்துள்ளனர் என்று அந்நாட்டின் ஐடிவி செய்தி நிறுவனம் தெரிவித்துள்ளது.