பூகம்ப இன்ஷூரன்ஸ்... ஏன் எடுக்க வேண்டும்?

நேபாளத்தில் ஏற்பட்ட பூகம்பத்தால் பாதிக்கப்பட்டு பல்லாயிரக்கணக்கானவர்கள் இறந்து போயிருக்கிறார்கள். பல ஆயிரம் வீடுகள் சுக்குநூறாக உடைந்து போயிருக்கிறது.

இந்த நிலையில், நேபாளத்தில்தானே பூகம்பம் வந்திருக்கிறது. அதனால் நமக்கென்ன பாதிப்பு என்று நாம் சும்மா இருந்துவிட முடியாது. கடந்த காலங்களில் பூகம்பத்தின் தாக்குதல் மிகக் குறைவாக இருந்த தமிழகத்தின் சில பகுதிகள்கூட, வருங்காலத்தில் பூகம்ப ஆபத்தில் சிக்க வாய்ப்புண்டு என்கிறார்கள். பூகம்பம் வரும் என சொல்ல முடியாவிட்டாலும், வரவே வராது என அஜாக்கிரதையாக இருந்து விடவும் முடியாது.



பூகம்பத்தினால் ஏற்படும் பாதிப்புகளிலிருந்து பாதுகாத்துக் கொள்ள நாம் என்ன செய்ய வேண்டும்? ஏற்படும் சேதாரத்தை ஈடு செய்ய எதற்கெல்லாம் இன்ஷூரன்ஸ் எடுக்கலாம், அதற்கான வழிமுறைகள் க்ளெய்ம் நடைமுறைகள், பிரீமியம் எவ்வளவு என்பது போன்ற பல கேள்விகளுடன் நேஷனல் இன்ஷூரன்ஸ் நிறுவனத்தின் அகமதாபாத் மண்டலத்தின் டெக்னோ மார்க்கெட்டிங் பிரிவின் துணை மேலாளர் மனோகரனிடம் பேசினோம். அவர் சொன்ன விவரங்கள் இனி...

ஏன் தேவை?


‘‘சமீப காலமாகவே மழை, வெள்ளம், பூகம்பம், சுனாமி போன்றவற்றினால் அதிக நாசம் ஏற்படுகிறது. இவற்றின் பாதிப்பால் வீடு இடிந்து விழுந்தாலோ, வெள்ளத்தால் பாதித்தாலோ ஹோம் இன்ஷூரன்ஸ் பாலிசி இருந்தால் இழப்பீடு கிடைக்கும். இந்த ஹோம் இன்ஷூரன்ஸ் பாலிசியை ஹவுஸ் ஹோல்டர் பாலிசி, ஃபயர் இன்ஷூரன்ஸ் பாலிசி என பல பெயர்களில் அழைக்கிறார்கள். இது ஒரு ஒருங்கிணைந்த பாலிசியாக அதாவது, பலவற்றுக்கு ஒருசேர காப்பீடு மற்றும் கவரேஜ் அளிக்கும் பாலிசியாக இருக்கிறது. ஹோம் இன்ஷூரன்ஸ் பாலிசியில் வீடு தீ மற்றும் இயற்கை சீற்றங் களால் பாதிப் படைவது, வீட்டிலுள்ள டிவி, தங்கநகை போன்ற விலை உயர்ந்த பொருட்கள் திருடு போவது போன்ற வற்றுக்கு இழப்பீடு தருவதாக இருக்கிறது.

எதற்கெல்லாம் எடுக்கலாம்?

பழையது, புதியது என எல்லா வீட்டுக்கும் இந்த பாலிசியை எடுத்துக் கொள்ளலாம். மிகப் பழமையான, சேதம் அடைந்த நிலையில் இருக்கும் வீட்டுக்கு கிடைக்காது. கட்டடத்தைப் பொறுத்தவரை, வீட்டை திரும்பக் கட்டுவதற்கான மதிப்பீடு (Reinstatement value) மற்றும் சந்தை மதிப்பு (Market value) என இரண்டு வகையில் இன்ஷூரன்ஸை எடுத்துக் கொள்ள முடியும். சந்தை மதிப்பு என்றால் வீட்டின் தற்போதைய சந்தை மதிப்பை மட்டும் (இடம் தவிர்த்து) கணக்கில் எடுத்துக் கொண்டு பாலிசி தருவார்கள். திரும்பக் கட்டுவதற்கான செலவினைப் பெறும் பாலிசி என்றால் அன்றைய நிலையில் வீட்டை திரும்பக் கட்ட என்ன தொகை செலவாகுமோ, அந்தப் பணத்தை இழப்பீடாக வழங்குவார்கள்.

இந்த பாலிசியில் சற்று பிரீமியம் அதிகம் என்றாலும் இது லாபகரமானதாகும். ஆனால், இந்த வகை பாலிசியை எடுத்துக் கொண்டால், இதன் மூலம் கிடைக்கும் பணத்தைக் கொண்டு கட்டாயம் வீட்டைக் கட்ட வேண்டும். ஆனால், சந்தை மதிப்பில் பாலிசி எடுத்திருந்தால் பாலிசி பணத்தைக் கொண்டு வீட்டை திரும்பக் கட்ட வேண்டுமென்று அவசியமில்லை.

திரும்பக் கட்டுவதற்காக ஆகும் செலவினை திரும்பப் பெறும் பாலிசியை எடுத்துக் கொண்டு, பாதிப்புக்குப் பிறகு அந்த இடத்தில் வீடு கட்ட வில்லை என்றால், க்ளெய்ம் தொகை கிடைக்காதா என்று நீங்கள் கேட்கலாம். க்ளெய்ம் தொகை கிடைக்கும். ஆனால், வீட்டின் சந்தை மதிப்பு என்னவோ அந்த பணம்தான் கிடைக்கும்.

அதேபோல வீட்டில் உள்ள உடைமைகளான பீரோ, கட்டில், எலெக்ட்ரானிக் பொருட்கள், தங்க நகைகள் (ரசீது அவசியம்) என அனைத்துக்கும் இன்ஷூரன்ஸ் எடுத்துக் கொள்ளலாம். அலுவலகத்துக்கு எடுத்துக்கொள்ளும்போது எவ்வளவு பணம் என்பது வரவு செலவு கணக்கில் இருக்கும் என்பதால் பணத்துக்கும் சேர்த்து இன்ஷூரன்ஸ் எடுத்துக்கொள்ள முடியும். இதில் இன்னொரு முக்கியமான விஷயம் வாடகை வீட்டில் இருப்பவர்கள், உடமைகளுக்கு இன்ஷூரன்ஸ் எடுத்துக் கொள்ளலாம்.

க்ளெய்ம் நடைமுறைகள்!

இந்த பாலிசியை பொறுத்த வரையில் பிரீமியம் என்பது மிகக் குறைவு. ஒரு லட்சம் ரூபாய்க்கு ஆண்டு பிரீமியமாக ரூ.20-35 மட்டுமே பெறப்படுகிறது. இந்தியாவில் பூகம்பம் பாதிக்கும் இடங்கள் நான்கு நிலைகளாக பிரிக்கப்பட்டிருக்கிறது. இதை வைத்து இன்ஷூரன்ஸ் பிரீமியம் கூடவும் குறையவும் செய்யும். தமிழகத்தைப் பொறுத்தவரை, அதிகம் பாதிப்பு இருக்கும் முதல் இரண்டு நிலைக்குள் எந்தப் பகுதியும் வரவில்லை. ஆனால், அடுத்த மூன்றாம் நிலையில் நீலகிரி, கோவை, கன்னியாகுமரி மற்றும் திருநெல்வேலி மாவட்டங் களும், நான்காம் நிலையில் செங்கல்பட்டு, வட ஆற்காடு, திருவண்ணாமலை, தென் ஆற்காடு, தருமபுரி, சேலம், திருச்சி, ஈரோடு, தஞ்சாவூர், நாகப்பட்டிணம், புதுக்கோட்டை, திண்டுக்கல், மதுரை, விருதுநகர், சிவகங்கை, தேனி, ராமநாதபுரம், தூத்துக்குடி மற்றும் சென்னை ஆகிய இடங்களும் குறிப்பிடப் பட்டு இருக்கின்றன.



இயற்கை சீற்றங்களால் பாதிப்பு உண்டாகியிருப்பின், அதற்கான செய்தித்தாள் பிரசுரத்துடன், சர்வேயர் அறிக்கை, வானிலை ஆய்வறிக்கை, இழப்பு பற்றிய மதிப்பீடு மற்றும் பாலிசி சான்றிதழ்களை இன்ஷூரன்ஸ் நிறுவனத்தில் சமர்பிப்பது அவசியம். ஆவணங்கள் சரியாக இருப்பின் சமர்பித்த 30 நாட்களுக்குள் இழப்பீட்டுத் தொகை வழங்கப்படும்” என்று முடித்தார் மனோகரன்.

வந்தபின் வருத்தப்படுவதை விட, வரும்முன் காத்துக் கொள்வதே புத்திசாலித்தனம்!