ஒரு பங்கை வாங்காமல் தவிர்க்க பத்து காரணங்கள்!

ரு பங்கை ஏன் வாங்க வேண்டும் என்பதற்கு பல காரணங்கள் இருக்கிற மாதிரி, ஒரு பங்கை ஏன் வாங்கக் கூடாது என்பதற்கு பத்து காரணங்களைச் சொல்லலாம். அந்தக் காரணங்கள் என்னென்ன?

1 200 நாள் சராசரி விலை (200 DMA)

நீண்டகால அடிப்படையில் அல்லது ஆறு மாதம் முதல் ஓராண்டுகால அடிப்படையில் முதலீடு செய்பவர்கள் பெரும்பாலும் டெக்னிக்கல் அனாலிசிஸ்படி முதலீடு செய்யவேண்டியதில்லை. என்றாலும், 200 நாள் சராசரி விலையைக் கட்டாயம் பார்க்க வேண்டும். பொதுவாக, ஒரு பங்கு இந்த 200 நாள் சராசரி விலைக்கு கீழே செல்லும்பட்சத்தில், அது மீண்டும் இந்த விலை உயர வாய்ப்பு குறைவு. ஒரு பங்கு தொடர்ந்து மூன்று நாள் இந்த விலைக்கு கீழே முடிவுற்றால், நீண்டகால அடிப்படையில் முதலீடு செய்வதைத் தவிர்க்க வேண்டும்.

2 புத்தக மதிப்பு (Book Value )

ஒவ்வொரு பங்குக்கும் ஒரு புத்தக மதிப்பு உண்டு. அதுதான் அந்தப் பங்கின் உண்மையான மதிப்பு. ஒரு நிறுவனத்தின் செயல்பாடு எதிர்காலத்தில் நன்றாக இருக்கும் அல்லது இருக்காது என்கிற கணிப்பில் இன்றைக்கு இருக்கும் மதிப்பைவிட அதிகமாகவோ அல்லது குறைந்தோ வர்த்தகமாகும். உதாரணமாக, பெரும்பாலான அரசுத் துறை வங்கிகளின் பங்குகள், புத்தக மதிப்புக்கும் மிகவும் குறைவாகவே இப்போது வர்த்தகமாகின்றன. இப்படி வர்த்தகமாகும் பங்கின் விலைக்கும், புத்தக மதிப்புக்கும் உள்ள தொடர்பை ப்ரைஸ் டு புக் வேல்யூ ரேஷியோ என்பார்கள். இந்த ரேஷியோ அதிகமாக உள்ள பங்குகளைக் கண்டிப்பாக தவிர்க்க வேண்டும்.

3 ப்ரைஸ் டு ஏர்னிங் ரேஷியோ (P/E ratio)

ஒரு பங்கு எவ்வளவு லாபம் சம்பாதிக்கிறது என்பதைச் சொல்வது ஏர்னிங் பெர் ஷேர் (EPS). இபிஎஸ் போல எத்தனை மடங்கு விலையில் வர்த்தகமாகிறது என்பதற்கு பி/இ ரேஷியோ என்போம். வங்கி வைப்பு நிதியில் உங்கள் பணத்தைப் போட்டால், 7-7.5 ஆண்டுகளில் உங்கள் பணம் இரட்டிப்பாகும். பங்குச் சந்தையில் உங்கள் முதலீடு ரிஸ்குக்கு உட்பட்டது என்பதால் 4-5 ஆண்டுகளில் இரட்டிப்பாக வாய்ப்புண்டு. அப்படி எனில், பி/இ ரேஷியோ 4-5 வரையுள்ள பங்குகளில்தான் முதலீடு செய்யவேண்டும். ஆனால், எதிர்வரும் காலத்தில், இபிஎஸ் அதிகரிக்கும் என்ற நோக்கில் பி/இ ரேஷியோ 8-10 வரை இருக்கும் பங்கிலும் முதலீடு செய்யலாம். பி/இ ரேஷியோ 10-க்கும் மேலான பங்குகளில் முதலீடு செய்யக்கூடாது. துறை சார்ந்தும் இது வேறுபடும். டிஃபென்ஸிவ் பங்குகளின் பி/இ ரேஷியோ 20-30 அளவில்கூட முதலீடு செய்யலாம். கமாடிட்டி பங்குகளில் 5-6-க்கு மேல் இருந்தால் முதலீடு செய்யக்கூடாது.

4 டிவிடெண்ட்! (Dividend)

நல்ல நிலையில் செயல்படும் நிறுவனங்கள் தங்கள் லாபத்தின் ஒரு பகுதியை முதலீட்டாளர்களுக்கு டிவிடெண்ட்-ஆக தரும். இந்த டிவிடெண்ட் என்பது முதலீட்டுக்கு கிடைக்கும் ஒரு சிறிய வருமானமாகும். டிவிடெண்ட் தராத பங்குகள் நல்ல நிலையில் செயல்படவில்லை என்று அர்த்தம். மேலும், முதலீட்டாளர்களுக்கு இந்த டிவிடெண்ட் வருமானம் வரியில்லாத வருமானமாகும். எனவே, கடந்த சில ஆண்டுகளாக டிவிடெண்ட் தராத பங்குகளைத் தவிர்த்துவிடுங்கள்!

5 வாலட்டைலிட்டி இண்டெக்ஸ் (VIX)

பெரும்பாலான முதலீட்டாளர்கள் விக்ஸ் எனப்படும் வாலட்டைலிட்டி இண்டெக்ஸ் முதலீட்டை கருத்தில்கொள்வதே இல்லை. விக்ஸ் என்பது எதிர்வரும் காலத்தில் சந்தையானது எவ்வளவு ஏற்றஇறக்கத்துடன் இருக்கும் என்பதைக் கணித்துச் சொல்லும். பொதுவாக, விக்ஸ் 25-க்கும் அதிகமாக இருக்கும்போது சந்தையில் நிலைத்தன்மை இருக்காது. சந்தை திடீரென்று 5-10% ஏறி, இறங்கலாம். உதாரணத்துக்கு, 2008-ல் உலகம் முழுக்க பங்குச் சந்தைகள் இறங்கி இருந்தபோது அதன் விக்ஸ் 70, 80 என்ற அளவில் இருந்தது. விக்ஸ் என்பது 20-க்கும் கீழே இருக்கும்போது, சந்தைகளும் பங்குகளும் நிலைத்தன்மையோடு இருக்கும். ஏறினாலும், இறங்கினாலும் நிதானமாக ஏறும் அல்லது இறங்கும். விக்ஸ் அதிகமாக இருக்கும்போது கண்டிப்பாக முதலீட்டைத் தவிருங்கள்.

6 பென்னி ஸ்டாக்ஸ்! (Penny Stocks)

சிறு முதலீட்டாளர்கள் குறைந்த விலையில் வர்த்தகமாகும் பங்குகளையே விரும்புகின்றனர். எனவே, பென்னி ஸ்டாக்ஸ் எனப்படும் 5 ரூபாய்க்கும் குறைவான விலையில் வர்த்தகமாகும் பங்குகளில் அதிக ஆர்வம் காட்டுகின்றனர். இது தவறு. உங்களிடம் 5,000 ரூபாய் இருந்தால், ரூ.5 வீதம் 1,000 பங்குகளை வாங்குவதைவிட, ரூ.1,000 வீதம் 5 நல்ல பங்குகளை வாங்குவதே சரி. எத்தனை பங்குகளை நாம் வைத்திருக்கிறோம் என்பது முக்கியமல்ல, எத்தகைய பங்குகளை வைத்திருக்கிறோம் என்பதே முக்கியம். 2003, 2007 காளைச் சந்தையில் பென்னி ஸ்டாக்குகளை வாங்கியவர்கள் பின்வந்த கரடிச் சந்தையில் பெருமளவு நஷ்டத்தைச் சந்தித்ததோடு, விற்கக்கூடிய வாய்ப்பு இல்லாததால் பெரும் அவதிபட்டனர். எனவே, எந்த காலகட்டத்திலும் பென்னி ஸ்டாக்குகளில் முதலீடு செய்யாதீர்கள்.

7 மிட் கேப் மற்றும் ஸ்மால் கேப் பங்குகள்!

பொதுவாக, காளைச் சந்தையில் பொருளாதார வளர்ச்சி அபரிமிதமாக இருக்கும் காலகட்டமாகும். இந்தக் காலகட்டத்தில் சிறிய நிறுவனங்கள் பெரிய அளவில் வளரும். ஆனால், கரடிச் சந்தையில் பொருளாதார வளர்ச்சி மந்தமாக இருக்கும். இந்தச் சமயத்தில் தொழிலை தொடர்ந்து வெற்றிகரமாக நடத்தும் சக்தி சிறிய நிறுவனங்களுக்கு இருக்காது. எனவே, கரடிச் சந்தையில் மிட் கேப் மற்றும் ஸ்மால் கேப் பங்குகளை வாங்குவதைத் தவிர்க்க வேண்டும். 2008 - 2013 அக்டோபர் முடிய, ஸ்மால் கேப் குறியீடு 60% இறங்கியும், மிட் கேப் குறியீடு 40% இறங்கியும் உள்ளது. ஆனால், லார்ஜ் கேப் பங்குகளின் குறியீடு அதிகரித்து, புதிய உச்சத்தைத் தொட்டுள்ளது.

8 அடமானப் பங்குகள்!

கடுமையான பொருளாதாரச் சூழ்நிலை நிலவும்போது, வங்கியிலிருந்தோ அல்லது பொது மக்களிடமிருந்தோ பணத்தைத் திரட்டுவது சில நிறுவனங்களுக்கு கடினமாக இருக்கும். இதனால் சில தொழிலதிபர்கள் தங்கள் நிறுவனத்தின் பங்குகளை தனியாரிடம் அடமானம் வைத்து பணத்தைத் திரட்டுவர். கடுமையான சந்தைச் சூழ்நிலையிலோ அல்லது வேறு காரணத்தாலோ இந்தப் பங்குகளின் விலை குறையும்போது, அடமானம் வைக்கப்பட்ட பங்குகளின் விலையும் குறையும். அந்தச் சமயத்தில் கடன் கொடுத்தவர்கள் அந்தப் பங்குகளை வந்த விலைக்கு விற்க வாய்ப்புண்டு. இதனால் பங்குகளின் விலை பாரதூரமாக இறங்கும். எனவே, அடமானம் வைக்கப்பட்டுள்ள பங்குகளை வாங்கவே கூடாது. இதற்கு ஓர் உதாரணம், ஹெச்டிஐஎல். ஓராண்டுக்கு முன்பு ரூ.120-லிருந்து ரூ.40-க்கு இறங்கியுள்ளது.

9 ஊழலில் சிக்கிய பங்குகள்!

சிறு முதலீட்டாளர்கள் சில பங்குகளை குறைந்த விலையில் வாங்க நினைப்பார்கள். எனவே, ஏதாவது ஒரு பங்கு 40 - 50% வரை விலை குறைவாக கிடைத்தால் அதை வாங்க ஆசைப்படுவார்கள். இது தவறு. ஒரு பங்கின் விலை கடுமையாக குறையும்போது ஏன் குறைகிறது என்று ஆராய வேண்டும். அந்தப் பங்கு சார்ந்த நிறுவனத்தின் தலைவர் தவறான செயல்களில் ஈடுபட்டு அதனால் ஊழல் சர்ச்சையில் சிக்கியிருக்கலாம். இதனால் அந்தப் பங்கின் விலை மேலும் இறங்கலாம். சத்யம் கம்ப்யூட்டர் இதற்கு பழைய உதாரணம். லேட்டஸ்ட் உதாரணம், ஃபைனான்ஷியல் டெக்னாலஜீஸ், எம்.சி.எக்ஸ்.

10 அரசியல் நிலைத்தன்மை!

அரசியல் நிலைத்தன்மை இல்லாத சமயங்களில் பங்குச் சந்தையில் எந்தப் பங்குகளையும் வாங்காமல் தவிர்ப்பது நல்லது. 1999-ம் ஆண்டு பா.ஜ.க. தனிப்பெரும் கட்சியாக விளங்கியபோதும், நாடாளுமன்றத்தில் பெரும்பான்மை பலம் இல்லாததால், அதன் ஆட்சி கவிழும் நிலை ஏற்பட்டதால் பங்குச் சந்தைகள் 20% குறைந்தது. எனவே, அரசியல் நிலைத்தன்மை ஆட்டம் காணும் காலங்களில் கண்டிப்பாக பங்குகளில் முதலீடு செய்வதைத் தவிர்க்க வேண்டும்.