ஸ்மார்ட் முதலீட்டாளர்கள்... ஃபாலோ பண்ணவேண்டிய 5 விஷயங்கள்!

by தருண் Sat Dec 06, 2014 7:24 pm

இன்றைய தேதியில் முதலீடு செய்கிறவர்கள் பலர். ஆனால், ஸ்மார்ட்டாக முதலீடு செய்கிறவர்கள், வெகு சிலரே. ஸ்மார்ட் முதலீட்டாளர்கள் அவசியம் பின்பற்ற வேண்டிய ஐந்து விஷயங்களை இனி சொல்கிறேன்.

1.வரித் திட்டமிடல்!

மாத சம்பளம் வாங்குபவர்கள் வரி செலுத்துவதிலிருந்து தப்பிக்கவே முடியாது. அவரவர் வருமானத்துக்கு ஏற்ப வரி வரம்பு இருக்கும். அதற்கு முன்கூட்டியே திட்டமிடுவது அவசியம். இதற்கு வருடத்தின் ஆரம்பத்திலேயே நிதி ஆலோசகரைச் சந்தித்து உங்களுக்கு ஏற்ற திட்டமிடல் செய்வது நல்லது. கடைசி நேரத்தில் திட்டமிடும்போது நமக்குத் தேவையில்லாத முதலீட்டுத் திட்டத்தைத் தேர்ந்தெடுக்க வாய்ப்புள்ளது. இதனால் நம் பணம்தான் வீணாகும். தற்போது 80சி பிரிவின் கீழ் ரூ.1.5 லட்சம் வரை வரிவிலக்கு பெற முடியும். இதற்கு பிபிஎஃப், பிஎஃப், மியூச்சுவல் ஃபண்ட், லைஃப் இன்ஷூரன்ஸ் ஆகியவற்றின் மூலமாக வரியை மிச்சப்படுத்த முடியும். இந்த முதலீடுகள் அனைத்தும் ஒருவருக்கு முக்கியமான ஒன்றாகும்.

2. குழந்தைகளின் எதிர்காலத் தேவை மற்றும் ஓய்வுக்காலத் தேவைகளுக்காகத் திட்டமிடுதல்!

தங்களின் குழந்தைகளுக்கு நல்ல கல்வியும், சிறப்பான திருமண வாழ்க்கையும் அமைத்து தருவது ஒவ்வொரு பெற்றோரின் கடமையாக உள்ளது. இதற்காக முன்கூட்டியே திட்டமிட்டால் சிக்கல் இல்லாமல் இருக்கும். இல்லை யென்றால் கடைசி நேரத்தில் கடன் வாங்கிதான் அந்த விசேஷங்களை முடிக்க வேண்டிய நிலை ஏற்படும். ஆனால், முறையான திட்டமிடல் மூலமாக இதைச் சிறப்பாகச் செய்ய முடியும். இன்றைய தேவையின் அடிப்படையில் மட்டும் இந்தத் திட்டமிடல் இருக்கக் கூடாது. பணவீக்க விகிதத்தின் அடிப்படையில் இருப்பது அவசியம். உதாரணமாக, உங்கள் மகனை இன்ஜினீயரிங் படிக்க வைக்க வேண்டும் எனில், இன்றைய மதிப்பில் அதற்கு ரூ.8 லட்சம் செலவாகும். அது 10-15 வருடம் கழித்து ரூ.20 லட்சமாக மாறும்.

பணி ஓய்வு என்பது தவிர்க்க முடியாத, அதே நேரத்தில் மிகவும் சவாலான ஒன்றாகும். அதாவது, பணி யில் இருக்கும்போது வருமானத்துக்கு அதிகமாக செலவு செய்யப் பழகிவிட் டோம் எனில், ஓய்வுக்காலத்தில் அதைச் சமாளிப்பது மிகவும் கடினம். பணி ஓய்வுக்குப் பிறகு 20 ஆண்டுகளாவது வாழ நேரிடும். இதற்கான முறையான திட்டமிடல் மிகவும் குறைவாகவே உள்ளது. அதாவது, இந்தச் சமயத்தில்தான் தேவைகள் அதிகமாக இருக்கும். அதாவது, தினசரி சாப்பாட்டுச் செலவில் ஆரம்பித்து மருத்துவச் செலவு வரை அத்தனை செலவுகளுக்கும் திட்ட மிடுவது அவசியம். இந்த வயதில் கடன் என்பது கிடைக்காது. எனவே, இந்தத் தேவைகளை முழுக்க முழுக்க நம் பணத்திலிருந்துதான் செலவு செய்ய வேண்டியிருக்கும்.

3.நமக்கான காப்பீடு!

இன்ஷூரன்ஸ் என்பது இன்றி யமையாத ஒன்று. இன்றைய காலகட்டத்தில் மருத்துவச் செலவுகள் என்பது மிக அதிகமாக உள்ளது. இதை இன்ஷூரன்ஸ் பாலிசி இல்லாமல் சமாளிப்பது என்பது முடியாத காரியம். எனவே, ஹெல்த் இன்ஷூரன்ஸ் தேவை. குடும்பத்தில் வருமானம் ஈட்டுபவருக்கு ஏதாவது அசம்பாவிதம் நிகழும்போது, குடும்பம் வருமானம் இல்லாமல் தவிக்கும். எனவே, டேர்ம் இன்ஷூரன்ஸ் எடுத்து வைப்பது முக்கியம். ஏனெனில், உங்களுக்குப்பிறகு உங்கள் குடும்பத்தைக் காப்பாற்ற இது உதவும். ஹெல்த் இன்ஷூரன்ஸ் மற்றும் டேர்ம் இன்ஷூரஸ் பாலிசிகளை இளம் வயதிலேயே எடுக்கும்போது அதற்கான பிரீமியம் என்பது மிகக் குறைவாக இருக்கும்.

4.திடீர் செலவுகளுக்கான நிதி!

இன்றைய காலகட்டத்தில் எதுவுமே நிரந்தரம் கிடையாது. அதாவது, விபத்து, வேலை இழப்பு ஆகியவை எப்போது வேண்டுமானாலும் நிகழ வாய்ப்புள்ளது. எனவே, இந்தச் சூழ்நிலையைச் சமாளிக்கத் திட்டமிட்டுக் கொள்வது அவசியம். வாகனம், வீடு பழுதுபார்ப்பு ஆகிய செலவுகளும் எப்போது வேண்டுமானா லும் ஏற்படும். இதற்கு ஒவ்வொரு மாதமும் குறிப்பிட்ட அளவு தொகையை அவசரகால நிதியாக எடுத்து வைப்பது அவசியம். இதன்மூலமாக இந்தத் தேவைகளை எளிதாக நிறைவேற்றிக் கொள்ள முடியும். குறைந்தது ஆறு மாத கால செலவுகளைச் சமாளிக்கும் வகையில் இந்தத் தொகையின் அளவு இருப்பது அவசியம்.

5.சமூகத்துக்கு திருப்பித் தாருங்கள்!

தேவைக்குப் போக மீதமுள்ள பணத்தில் ஒரு குறிப்பிட்ட அளவு தொகையை இந்தச் சமூகத்தில் உள்ள பின்தங்கியவர்களுக்கு உதவி செய்வதற்கு ஒதுக்கி வைக்கலாம். இதன்மூலமாக வரிச் சலுகை பெற முடியும். வரிச் சலுகை மட்டும் இல்லாமல் சமூக அக்கறையுடன் செயல்படுவது சிறப்பாகும்.

-- ந.விகடன்