தங்கம்: பவுனுக்கு ரூ.128 உயர்வு

by தருண் Tue Mar 04, 2014 8:55 am

ஆபரணத் தங்கத்தின் விலை திங்கள்கிழமை பவுனுக்கு ரூ.128 உயர்ந்தது. இதையடுத்து சென்னையில் ஒரு பவுன் தங்கம் ரூ.23 ஆயிரத்து 72-க்கு விற்பனை செய்யப்படுகிறது.

நடப்புக் கணக்குப் பற்றாக்குறை காரணமாக தங்கத்தின் மீதான இறக்குமதி வரியை மத்திய அரசு 5 மடங்கு உயர்த்தியது. இதனால் ஆண்டுக்கு 900 டன் இறக்குமதி செய்யப்பட்டு வந்த தங்கம், தற்போது 400 டன்னாகக் குறைந்துள்ளது.

இதையடுத்து கடந்த சில மாதங்களாகவே தங்கத்தின் விலையில் பெரிய அளவில் ஏற்ற இறக்கம் காணப்படவில்லை. இந்நிலையில் திங்கள்கிழமை சர்வதேச அளவில் தங்கத்தின் விலை சிறிது உயர்ந்தது.

ஒரு அவுன்ஸ் தங்கத்தின் விலை 12 அமெரிக்கா டாலர்கள் உயர்ந்தையடுத்து, இந்திய சந்தையிலும் அதன் தாக்கம் எதிரொலித்தது. வரும் நாள்களிலும் தங்கத்தின் விலையில் ஏற்ற இறக்கம் காணப்படும் என வர்த்தக நிபுணர்கள் கருத்து தெரிவித்துள்ளனர்.

தங்கத்தின் விலை உயர்ந்ததன் எதிரொலியாக வெள்ளியின் விலையும் அதிகரித்துள்ளது. கட்டி வெள்ளி திங்கள்கிழமை கிலோவுக்கு ரூ.860 உயர்ந்து சென்னை மார்க்கெட்டில் ரூ.48 ஆயிரத்து 20-க்கு விற்பனை செய்யப்பட்டது.