பங்குச் சந்தையில் ஜெயிக்க பத்து வழிகள்!

புதியன புகுதலும் பழையன கழிதலும்தான் வாழ்க்கை. வருவதும் போவதுமாக இருப்பதுதான் சந்தை. இதற்கு ஷேர் மார்க்கெட்டும் விதிவிலக்கல்ல. 2004 தொடங்கி கொஞ்சம் கொஞ்சமாக பங்குச் சந்தை முதலீட்டுக்குள் நுழைய ஆரம்பித்தார்கள் நம்மூர் முதலீட்டாளர்கள். 2008 வரை அபரிமிதமான லாபத்தைச் சம்பாதித்தார்கள். அதற்குபிறகு ஏற்பட்ட சரிவின்போதுதான், சந்தை என்பது ஏற்ற இறக்கங்களுக்கு உட்பட்டது என்பதைப் பலரும் புரிந்துகொண்டனர்.

பொருளாதாரச் சுழற்சிக்கு ஏற்ப சந்தை அவ்வப்போது தன்னைத் தானே புதுப்பித்துக் கொள்ளும். முதலீட்டாளர்களுக்கும் வர்த்தகர்களுக்கும் சந்தையின் ஒவ்வொரு நாள் செயல்பாடும் ஒரு புதுப்பாடம்தான். ஒவ்வொரு காலகட்டத்திலும் சந்தைக்குள் புதியவர்கள் வந்து கொண்டேதான் இருக்கிறார்கள். சமீபத்தில் நேஷனல் ஸ்டாக் எக்ஸ்சேஞ்ச் வெளியிட்டுள்ள புள்ளிவிவரங்களின்படி, சிறு நகரங்களில் பங்குச் சந்தையில் வர்த்தகம் மற்றும் முதலீடு செய்பவர்களின் எண்ணிக்கை சுமார் 50 சதவிகிதத்தை நெருங்கிவிட்டது. அதிகரித்து வரும் பணவீக்கத்தைத் தாண்டி வருமானம் கிடைக்க பங்குச் சந்தையில் நீண்ட கால முதலீடு உதவும் என்பதைப் புரிந்துகொண்ட புதிய முதலீட்டாளர்கள் இப்போது மீண்டும் சந்தைக்குள் வரத் தொடங்கி இருக்கிறார்கள்.
இவர்கள் கண்ணை மூடிக்கொண்டு சந்தைக்குள் குதிக்காமல், ஓரளவுக்கு விஷயத்தைத் தெரிந்துகொண்டு முதலீட்டைத் தொடங்கவேண்டும் என்று நினைக்கிறார்கள். இந்த இளநிலை முதலீட்டாளர்கள் பங்குச் சந்தையில் ஜெயிக்க பத்து வழிகளைச் சொல்கிறேன். ஃபாலோ செய்து பயன் பெறுங்கள். அந்த பத்து வழிகள் இதோ:

1. நீங்களும் ஒரு பிசினஸ்மேன்!

பங்குச் சந்தையில் ஏன் முதலீடு செய்ய நினைக்கிறீர்கள்? என்கிற கேள்விக்கு முதலில் பதில் தெரிந்துகொள்ளுங்கள். எஃப்.டி.யில், பாண்டில், தங்கத்தில், ரியல் எஸ்டேட்டில் என எல்லா முதலீடுகளிலும் கிடைக்கும் வருமானத்தைவிட பங்குச் சந்தை மூலம் கிடைக்கும் வருமானம் அதிகம் என்பது வரலாறு. ஆனால், இந்த லாபம் உங்களுக்கு சும்மா கிடைத்துவிடாது. அதற்காக நீங்கள் கொஞ்சமாவது உழைக்கவேண்டும். முதலில் உங்களை நீங்கள் ஒரு பிசினஸ்மேனாக மாற்றிக்கொள்ள வேண்டும். பங்குச் சந்தைக்கு நீங்கள் வருவதே பிசினஸ் செய்யத்தான். அந்த பிசினஸை சரியாகச் செய்தீர்கள் எனில், லாபம் உங்களைத் தேடி வரும். தெரியாத பிசினஸை தப்புந் தவறுமாகச் செய்தால், கையில் உள்ள பணம்தான் கரையும்!

2. முதலீட்டுக்கு முதல் மரியாதை!

பிசினஸ் செய்வதற்கு என்ன வேண்டும்? முதலீடு. எந்தவொரு பிசினஸிற்கும் முதலீடு செய்ய தேவையான அளவு பணத்தை ஒதுக்கி வைத்துக்கொள்ள வேண்டும். நிஜ வாழ்க்கை பிசினஸில் கடன் வாங்கலாம். லாபம் சம்பாதித்த பிறகு திரும்பத் தந்துவிடலாம். ஆனால், பங்குச் சந்தையில் கடன் வாங்கி மட்டும் காசைப் போட்டுவிடாதீர்கள். ஏனெனில், இது காளைகளும், கரடிகளும் உலாவும் ரிஸ்க் மிகுந்த காடு. வழிதவறி வந்து பர்ஸையும் பேங்க் அக்கவுன்ட் பேலன்ஸையும் தொலைத்தவர்கள் இங்கே அதிகம். அதனால்தான் இந்த முதலீட்டை 'ரிஸ்க் கேப்பிட்டல்’ என்கிறோம். 'ரிஸ்க் எடுக்குறது எனக்கு ரஸ்க் சாப்பிடற மாதிரி’ என்று நீங்கள் நினைப்பவராக இருந்தால் மட்டுமே பங்குச் சந்தையில் முதலீடு செய்ய ஆரம்பியுங்கள்.

இதை சந்தைக்குள் எப்படி முதலீடு செய்வது? உதாரணமாக, உங்கள் முதலீடு ரூ.2 லட்சம். இதை இரண்டு முறைகளில் முதலீடு செய்யலாம்.
முறை 1: உங்கள் முதலீட்டினை 5 அல்லது 10 அல்லது 12 என்ற ஏதேனும் ஓர் எண்ணிக்கையில் சமபாகங்களாகப் பிரித்துக்கொள்ளுங்கள். கணக்கு எளிமையாக இருக்கட்டுமென்று 10 பாகங்களாகப் பிரித்தால், ஒரு பாகத்திற்கு ரூ.20,000 வருகிறது. இப்போது நீங்கள் 10 வெவ்வேறு ஸ்டாக்குகளில், ஒவ்வொன்றிலும் தலா ரூ.20,000 என்ற அளவிலே முதலிடலாம்.
முறை 2: சமபாகம் என்றில்லாமல், ஒரே அளவிலான விகிதாசாரம் (constant %) என்று வைத்துக்கொள்வோம். அதாவது, கையிருப்பு எவ்வளவு இருக்கிறதோ, அதில் ஒவ்வொரு முதலீட்டிருக்கும் 5% (அ) 10% (அ) 12%தான் உபயோகிப்பது. உதாரணத்திற்கு, 10% என்று எடுத்துக்கொள்ளலாம். ஆரம்பத்தில் கையிலிருக்கும் 2 லட்சத்திற்கு 10% என்பது ரூ.20,000 இதுதான் முதல் முதலீடு. இதற்குப் பின்னர் கையிருப்பு, 1,80,000. இதன் 10% சதவிகிதமான ரூ.18,000-தான் அடுத்த முதலீடு. இப்போது கையிருப்பு ரூ.1,62,000 இதன் 10%ஆன ரூ.16,200-தான் மூன்றாவது முதலீடு. இப்போது கையிருப்பு ரூ.1,45,800. இப்படி வாங்கிய பங்கில் ஏதோ ஒன்று லாபத்தில் இருக்க, அதை விற்பதன் மூலம் ரூ.21,000 கிடைக்கிறது. இப்போது கையிருப்பு ரூ.1,66,800. ஆக, உங்களின் அடுத்த முதலீடு (இதன் 10% ஆன) ரூ.16,680 என்ற அளவிலே இருக்கும். முதலீட்டை கட்டுக்குள் வைத்திருந்தால் மார்க்கெட்டும் உங்களைக் கஷ்டப்படாமல் வைத்திருக்கும்.

3. தெரிந்ததைச் செய்யுங்கள்!

பிசினஸில் ஜெயிப்பதற்கு சிம்பிளான வழி தெரிந்த பிசினஸை செய்வது. பங்குச் சந்தை பிதாமகர் வாரன் பஃபெட் இன்றைக்கு அத்தனை பெரிய பணக்காரராக இருக்க காரணம், இந்த சிம்பிள் விஷயம்தான். ஒரு நிறுவனத்தின் உற்பத்திப் பொருளுக்கு (அ) சேவைகளுக்கு யார், யாரெல்லாம் வாடிக்கையாளர்கள்; அவர்களின் ஆதரவு எது நாள் வரை கிடைக்கும்; நிறுவனத்தின் போட்டியாளர்கள் யார், அவர்களின் திறமை எப்படி?, அந்த நிறுவனம் சார்ந்த துறையின் எதிர்காலம் எப்படியிருக்கும்? என்பதையெல்லாம் அலசி ஆராய்வதுதான் ஃபண்டமென்டல் அனாலிசிஸ்.
எந்தவொரு கம்பெனியும் வரவு, செலவுக் கணக்குகளைப் பராமரித்து, லாப-நஷ்ட அறிக்கை ((P&L a/c)), பேலன்ஸ்ஷீட் போன்ற நிதிநிலை அறிக்கைகளை வெளியிடுவார்கள். அதிலும், எக்ஸ்சேஞ்சுகளில் பட்டியலிடப்பட்டுள்ள நிறுவனங்கள் கண்டிப்பாக ஒவ்வொரு காலாண்டு முடிவிலும் காலாண்டு அறிக்கை களை முதலீட்டாளர்களுக்குத் தெரிவிக்க வேண்டும். இந்த பேலன்ஸ்ஷீட்டில் வருமானம், செலவுகள், லாபம், நஷ்டம், அசையும், அசையாச் சொத்துக்களின் மதிப்பு, கடன்கள், மொத்தப் பங்குகளின் எண்ணிக்கை, புரமோட்டர்களின் பங்கு விகிதம் போன்ற தகவல்களைக் கொஞ்சம் அலசி ஆராய்ந்து நீங்களே ஒரு முடிவுக்கு வரலாம். ஆரம்ப காலத்தில் சில நம்பத்தகுந்த ஆய்வு நிறுவனங்கள் தரும் ரிப்போர்ட்களைப் படித்து, அவை சரியாகத்தான் ஆராய்ந்திருக்கிறதா என்பதைத் தெரிந்துகொண்டு அதன்படியும் முதலீடு செய்யலாம்.
பல ஆயிரம் பங்குகள் இருக்கே! இவற்றின் பேலன்ஸ்ஷீட்களை எல்லாம் நான் ஆராயத் தொடங்கினால் எப்போது முதலீடு செய்வது என்று நீங்கள் கேட்பீர்கள். ஒரே ஒரு சின்ன ஷார்ட் கட் வழி சொல்கிறேன். நிஃப்டி இண்டெக்ஸில் இருக்கும் 50 நிறுவனங்களை மட்டுமே முதலீடு செய்வதற்கு பரிசீலிக்கலாம். வலிமையான நிறுவனங்களே நிஃப்டி இண்டெக்ஸில் சேர்க்கப்பட்டு உள்ளதால், நம் வேலை சுலபம்.

4. கதை சொல்லும் படங்கள்!

பங்குச் சந்தைகளில் டிரேட் ஆகும் பங்குகளின் விலை நொடிக்கு நொடி மாறும். இந்த விலை மாற்றங்கள் சார்ட்டிங் சாஃப்ட்வேர் (அமிப்ரோகர், மெட்டாஸ்டாக், இன்னும் பல) உதவியுடன் கிராஃப் வரைபடங்களாக மாற்றப்படும். 'ஒரு படம் ஆயிரம் கதைகள் சொல்லும்’ என்கிற மாதிரி ஒரு கிராஃப் ஒரு பங்கின் நடவடிக்கைகளை புட்டுப்புட்டு வைக்கும். பங்கின் விலை மேலே போகிறது; இல்லை, இறங்குகிறது; இல்லை, எங்கேயும் போகாமல் பக்கவாட்டு மார்க்கெட்டிலேயே இருக்கிறது என்பதை எல்லாம் சுலபமாகச் சொல்லிவிட முடியும். அது மட்டுமல்லாமல் டிரெண்ட்லைன்களை வரைந்தும், பங்குகளில் சப்போர்ட் மற்றும் ரெசிஸ்டன்ஸ் லெவல்களைத் தெரிந்து கொள்ளலாம்.
ரொம்ப ஈஸியாச் சொல்றீங்களே என நீங்கள் கேட்கலாம். டெக்னிக்கல் அனாலிசிஸ் என்பது ராக்கெட் சயின்ஸ் இல்லை. அது ஒரு கலை. உரிய பயிற்சி பெற்றால் யாரும் அதில் ராமானுஜன் ஆகலாம்.

5. திட்டமிடு! கொண்டாடு!

'உங்கள் முதலீட்டைத் திட்டமிடுங்கள்; திட்டமிட்டபடி முதலீடு செய்யுங்கள்’ என்பது ஒரு சத்தியமான வாக்கு. எப்படி திட்டமிடுவது?
''என் முதலீடு இவ்வளவு, இதனை இத்தனை பாகங்களாகப் பிரித்து முதலீடு செய்யப் போகிறேன்; இன்னின்ன விதிமுறைகளின் படி, இன்னின்ன பங்குகளில் இன்ன விலைகளில் முதலீடு செய்யப் போகிறேன், என் முதலீடு நான் நினைத்ததற்கு எதிர்த்திசையில் நகர்ந்தால், என்னால் இந்தக் குறிப்பிட்ட அளவு சதவிகிதம் நஷ்டத்தைத் தாங்க முடியும். எனவே, இந்த லெவலில் ஸ்டாப்லாஸ் போட்டு விற்றுவிட வேண்டும். லாபம் கிடைத்தால் இவ்வளவு வந்தால் போதும் என்று நினைத்து விற்றுவிடுவேன்'' என்றெல்லாம் ஒரு டைரியில் எழுதி வைத்துக்கொண்டுதான் அதன்படி முதலீடு செய்யவேண்டும்.

இதுதான் உங்கள் புளூபிரின்ட். இதைத் தொலைத்தீர்கள் என்றால் முகவரியைத் தொலைத்துவிட்டு காதலியின் வீடு தேடி அலையும் தாடிவிட்ட சினிமா கதாநாயகன் மாதிரி ஆகிவிடுவீர்கள்.

6. காற்றின் திசையில் செல்!

'மார்க்கெட் தனது போக்கில் வருகிறவர்களைத் தன்னுடன் அழைத்துச் செல்லும். எதிர்ப்போக்கில் செல்கிறவர்களை உதறித்தள்ளும்!’ என்பது சந்தைச் சொல்லும் தத்துவம்.

ஒரு டிரெண்டைக் கண்டுபிடித்து அந்த டிரெண்டின் திசையிலேயே, ஒருவர் தன்னுடைய டிரேடுகளை அமைத்துக் கொண்டால் சக்சஸ்தான். ஒரு பங்கை வாங்கிய பின் சில நாட்களில், சில வாரங்களில் விலை உயர்ந்தால், அந்தப் பங்கு அப்-டிரெண்டில் இருக்கிறது என்று அர்த்தம். இந்த நேரத்தில் சப்ளை குறைந்து டிமாண்ட் அதிகமாக இருக்கும் என்பதால் உங்களுக்கு லாபம்தான். ஒரு பங்கை வாங்கிய சில நாட்களில், சில வாரங்களில் விலை குறைந்தால் அது டவுன்-டிரெண்ட். இந்தச் சமயத்தில் டிமாண்ட் குறைந்து, சப்ளை ஓவராக இருக்கும். இதனால் உங்களுக்கு நஷ்டம்தான். டிமாண்ட் அதிகரிக்க அதிகரிக்க, மார்க்கெட்டில் காளைகளின் ஆதிக்கம் அதிகமாகி, நீங்களும் ஒரு காளையாக இருக்கவேண்டும். ஆனால், சப்ளை அதிகமாகி விலை கீழேயிறங்கும்போது, கரடிகளின் ஆதிக்கம் அதிகமாகும். அப்போது கரடி அவதாரம் எடுத்தாக வேண்டும். அந்தச் சமயத்தில் நான் காளைதான் என்று நின்றீர்கள் எனில் கரடிகளிடம் கடிபடுவதைத் தவிர வேறு வழியில்லை.
காளை, கரடியாக இல்லாமல், இந்தப் பக்கமா, அந்தப் பக்கமா எந்தப் பக்கமும் குதிக்கத் தயாராக இருக்கும் மதில்மேல் பூனையாக சந்தை இருந்தால்..? சாதகமில்லாதச் சந்தையில் 'சும்மா இருப்பதே சுகம்’ என்பதை அறிந்து, கையைக் கட்டி வேடிக்கைப் பார்ப்பதே நல்லது.

7. நேரம் பார்த்து வெட்டிவிடு!

பங்குச் சந்தை முதலீடு ரிஸ்க் நிறைந்தது என்பதை ஆரம்பத்திலேயே சொன்னேன். ஆனால், இந்த ரிஸ்குகளைக் குறைப்பதற்கான (ரிஸ்க் மேனேஜ்மென்ட்) வழிகளை இப்போது சொல்கிறேன்.
பங்குச் சந்தை அனுபவஸ்தர்கள் ‘Never marry a stock’ என்று சொல்வார்கள். எந்த ஒரு பங்கையும் கல்யாணம் பண்ணிக்கொள்ளாதீர்கள்! எப்போது ஒரு பங்கினால் நமக்கு நஷ்டம் வருகிறதோ, அப்போதே அதை கைகழுவிவிட வேண்டும். விலை குறையும் பங்கு கீழ்நோக்கி வரும் கத்தி மாதிரி. அதைப் பிடிக்க நினைத்தால், நம் கை ரத்தக்களறி ஆகிவிடும்.
அதேபோல, நாம் வாங்கிய பங்கின் விலை லாபத்தில் இருக்கிறது. போதும் என்கிற மனமே பொன் செய்யும் மருந்து என்று நினைத்து, நேரம் பார்த்து வெட்டிவிட வேண்டியதுதான். உச்சத்தில் இருக்கும் பங்கு விலை மீண்டும் குறையும். குறிப்பிட்ட அளவு குறைந்தபிறகு மீண்டும் உயரும்.
ஒரு பங்கு இப்படி ஒரு டிரெண்டில் இருக்கும்போது மீண்டும், மீண்டும் என்ட்ரி வாய்ப்புகளை மார்க்கெட் தந்துகொண்டே இருக்கும். எந்த ஒரு பங்கையும் அளவுக்கதிகமாக காதலித்து கட்டிப்பிடித்துக் கொண்டிருந்தால், புல்பேக் (pullback) எனப்படும் பின்னிழுப்பு ஏற்படுகிறபோது பங்கின் விலையோடு நாமும் விழவேண்டியிருக்கும்.
நஷ்டத்தைக் குறைத்து லாபத்தை வளர்க்க வேண்டுமெனில் நேரமறிந்து வெளியேபோய், மீண்டும் உள்ளே வரவேண்டும்.

8. மனம் ஒரு குரங்கு!

கத்திரிக்காய் என்றால் கால் கிலோவுக்கு இவ்வளவுதான் காசு தரவேண்டும். கேரட் விற்கவேண்டும் என்றால் ஒரு கிலோவுக்கு இந்த விலைக்குத்தான் விற்க வேண்டும் என்பதெல்லாம் நமக்குத் தெரியும். ஆனால், பங்குச் சந்தையில் இந்த விஷயத்தில் நாம் மிகவும் குழம்புவோம். என்ன விலை தந்து வாங்குவது என்பதில் ஆரம்பிக்கும் குழப்பம், என்ன விலை தந்து விற்பது என்கிறவரை தொடரும். இந்த லாபம் போதுமா என்றால், விலைதான் ஏறுகிறதே! இன்னும் கொஞ்சம் பொறுத்தால் கூடுதல் லாபம் கிடைக்குமே என்றுதான் நினைக்க வைக்கும் இந்த மனக்குரங்கு. மூழ்குகிற கப்பலை மீண்டும் மீண்டும் இறுகப் பற்றிக் கொள்ளச் சொல்லும். ஷேர் மார்க்கெட் என்கிற சின்ன கிரவுண்டிலேயே ஒழுங்காக ஓடி முடிப்பதற்குள் எஃப் அண்ட் ஓ என்கிற பெரிய கிரவுண்டில் ஓட உசுப்பேற்றும். இதுமாதிரி, மனக்குரங்கு குட்டிக்கரணம் அடித்து குசும்பு செய்யும் வேளையில் அதன் தலையில் தட்டி உட்கார வைக்கவேண்டியது நம் வேலை. கையில் பிரம்பு இல்லை என்றால் குரங்கு ஓர் இடத்தில் உட்காராது. முதலீட்டில் கட்டுப்பாடு இல்லை என்றால் நாமும் குரங்கு மாதிரி தாவ ஆரம்பித்துவிடுவோம், உஷார்!

9. தொட்டதெல்லாம் துலங்கும்!

இதுவரையிலும் மேலே சொன்னதை எல்லாம் பின்பற்றி நஷ்டங்களைக் குறைத்து, கொஞ்சத்திற்குக் கொஞ்சமாவது லாபம் பார்க்க ஆரம்பித்தவர்கள் மேலும், மேலும் புதிய ஸ்ட்ராடஜிக்களைக் கற்றுக்கொண்டு, எப்படியெல்லாம் முதலீடு செய்யலாம் என்கின்ற புளூபிரின்ட் தயார் செய்து, அதன்படி தங்களது முதலீட்டு யுக்திகளை விரிவாக்கிக்கொள்வதே 'சிஸ்டம் டிரேடர்’ என்கிற நிலை. இந்த ஞான நிலையில் தொட்ட தெல்லாம் துலங்கும். இந்த நிலையிலே உங்களது கையிலே ஐந்துக்கும் மேற்பட்ட முதலீட்டு யுக்திகள் இருக்கும். உங்கள் போர்ட்ஃபோலியோவும் நீண்ட கால முதலீடு, ஸ்வீங் டிரேடிங்/பொசிஷன் டிரேடிங் என்றும் விரிவடைந்திருக்கும். இந்த நிலையிலே டே டிரேடிங் (ஒரே நாளில் வாங்கி விற்பது அல்லது விற்று வாங்குவது) செய்தாலும் தவறில்லை. ஆனால், அதற்கான முதலீட்டு விழுக்காடு குறைவாக இருந்தால் போதும்.


10. கூட்டம்போட்டு விவாதி!


இதை நெட்வொர்க்கிங் என்பார்கள். வெறும் டிப்ஸ், வதந்திகள் பரிமாறிக்கொள்வதற்கு மட்டுமல்ல இந்த நெட்வொர்க்கிங். பல்வேறு புத்தகங்கள், கட்டுரைகள், ஸ்ட்ராடஜிக்கள் முதலானவை பற்றிப் பேசவும் தெரிந்து கொள்ளவும்தான். உதாரணத்திற்கு உங்கள் சக முதலீட்டாளர்களுடன் ஒவ்வொரு தினமும் செய்த முதலீடுகள் பற்றியும், அவற்றிலே நீங்கள் கண்டுகொண்ட EPS, P/E ரேஷியோக்கள், சார்ட்பேட்டர்ன்கள், ஸ்டாப்லாஸ்கள், பங்கு களின் போக்கு முதலியன பற்றியும் தகவல்களை விவாதித்துக்கொள்ளலாம். வெறும் ஆர்வக் கோளாறில் அரையும் குறையுமாகப் படித்துவிட்டு அலைகிறவர்களை கண்டறிந்து ஒதுக்கிவிட்டு, ஆழமாக ஆராய்ந்து படிக்கிறவர்களை நண்பர்களாக்கிக் கொள்ளுங்கள். அவர்களின் நட்பு உங்கள் லாபத்தை வளர்க்கவில்லை என்றாலும் நஷ்டத்தை உருவாக்காமல் பார்த்துக்கொள்ளுங்கள்.
இந்தப் பத்து வழிகளையும் நீங்கள் பின்பற்றினால் காளைகள் மட்டுமல்ல, கரடிகளும் உங்கள் வசப்படும்!

-நாணயம் விகடன்